الموضوع: تقرير مفصل بالصور عن تركيب سبويلر لنيسان صنى

اعزائي اعضاء قسم نيسان "نادي نايل موتورز" الحبيب




احب اسرد تجربتي اللي عيشتها حوالي 10 ايام و بدايتها كانت لما الاكصدام الخلفي اتخبط من الشمال و كنت عملت موضوع عشان اخد ارائكم اذا كان اعمله مع التأمين ولا اصلحه علي حسابي.



علي العموم صلحته علي حسابي لكن الحاجه الجميلة اللي اخدتها فرصة و كان نفسي اعملها من زمان و هي اني اشتري سبويلر للعربية لأنوا بيحلي العربية اكتر و كمان بيعمل ثبات اكتر للعربية في السرعات العالية مش بنسبة كبيرة لأنه طبعا مش حسب المقاييس لكن انا عملته للشكل الجمالي من الدرجة الاولي و طبعا دا بسبب ان العربية مش بتنزل بالاسبويلر.



المهم عندنا مصنع فايبرجلاس بيعمل احلي شغل في تعديل العربيات فروحت و اتفرجت علي اسبويلرز كتيرة لغاية لما استقريت علي اللي متركب في العربية.



المهم احب اقولكم الاول العربية اخدت كام بالظبط في الليلة ديه كلها من ساعة خبطة الاكصدام لغاية تركيب الاسبويلر :

فك و تركيب اكصدام = 30 جنيه



لحام الاكصدام = 20 جنيه لحام روعة روعة



بوية للاكصدام و الاسبويلر = 110 جنيه و فاضل منها كمية .. البوية نوعها "R.M"


ملمع امريكي = 50 جنيه



الاسبويلر و تركيبه = 100 جنيه فقط



ملحوظة على سعر الاسبويلر :
( السعر ده كان خاص ليه فقط عشان رايح بمعرفة , والاسعار مفروض انها اغلى من كدا )


اكرامية تركيبه = 15 جنيه



توصيل كهربا الاسبويلر = 15 جنيه



مصنعية دوكو و تلميع = 50 جنيه



اكرامية تلميع = 20 جنيه



المجموع كله = 410 جنيه بالظبط



يابلاش مش كده ....

نيجي بقي للتجربة كلها صورة صورة و ناخدهم بقي علي مهلنا.


1- الصورة الاولي طبعا بتبين العربية قبل ما نعمل فيها اي حاجه خالص لكن طبعا الاكصدام رشيت فيه بس مكان الخبطة فقط






2- الصورة التانيه بتبين الصنايعي المتوحش بشنيوره و هو بيخرم في شنطة العربية لكن كنت عادي :)





3- الصورة الثالثة بتبين الشنطة بعد التخريم لتركيب الاسبويلر






4- الصورة الرابعة و الخامسة بيبنوا حاجه لذيذة اوي و هي ان الكهربائي المحترم اهتم بإن سلك كهربا الاسبويلر ميكونش باين و دخله في الضفيرة الخاصة باسلاك لمبات النمرة و الشنطة و الضفيرة عبارة عن سوستة مشقوقة نصين بالطول و ملفوفة بشيكارتون .. طبعا شال الشيكارتون و ادخل سلك الاسبويلر من شق الضفيرة و قفل تاني و رجعت زي ما كان المصنع عاملها بالظبط








5 - بقية الصور بقي بتبين الاسبويلر بعد الانتهاء من التركيب و العربية داخلة علي مرحلة التلميع .. فقولت اخد كام صورة في الارض الفضاء .. و اسيبكو بقي مع الصور





















6-الصورة دي لو ركزنا شوية هنلاقي ان حرف الاسبويلر موازي تماما للسوكة اللي في الرفرف.



















في نهاية التقرير اتمني ان يكون الاسبويلر عجبكم و اكون عرفت اسرد التجربة الجميلة ديه


واوعدكم
احاول اوصل الى اتفاق مع المصنع بالاتفاق مع ادارة نايل موتورز
عشان اجيب لكم خصم زى اللى حصلت عليه للاعضاء



اخوكم



بيشوي Peaceman

المشاركة الأصلية كتبت بواسطة baskota

تسلم ايدك عالتقرير بيشوى
ومبروك عليك السبويلر لايق جدا وكأن العربية جاية به

متشكر خالص يا بسكوتة علي مرورك الكريم و انا يجي ايه تقريري من تقاريرك الرائعة و اللي فعلا بتكون محايدة من الدرجة الاولي

المشاركة الأصلية كتبت بواسطة ahmed.tv

تقرير فوق الروعة , منسق وجميل

وكمان الاسبويلر تحفة على العربية وشكله جميل جدا ماشاء الله

وواضح التركيب بنظافة جدا

وايه الاسعار اللقطة دى ياعم

عاوزينك تدلعنا وتدلع الاعضاء معاك كدا ويبقا احنا كمان لينا معزة عن الراجل اللى ركبلك هههههههههه

عشان ناخد خصم زيك

مبروك يا باشا والف مليون مبروك على الاسبويلر وفعلا خالا العربية شكلها شبابى اكتر

يا احمد باشا انا تحت امر المنتدي و اعضاء المنتدي .. ربنا يرتب و ان شاء الله اتصل بالادارة عشان تعمل مع الراجل اتفاق للاعضاء الكرام .. و الف شكر علي مرورك الكريم