الموضوع: تقرير صيانة ال50 الف كيلومتر في منصور الهرم مع تغيير طقم سيور كامل + طلمبة مياه

السلام عليكم ورحمة الله وبركاته
تحياتي لكل اهل المنتدي
انا بس حبيت انقل لكم تجربتي لصيانة ال50 الف مع منصور الهرم الكيلو 4.5 لعربية اوبترا مانيوال 2009
في الاول اتصلت علي الرقم المختصر وحجزت الصيانة بعدها ب4 ايام وكان ميعادي الساعة 9.45 صباحا ورقمي هوة 26 علي فكرة انا من اسيوط يعني مشوار المهم ركبت العربية باليل الساعة 4 الفجر وكان الجو برد فظيع وصلت الساعة 8 صباحا علي الساعة 8.30 كان الموظفين والعمال بدأوا في الدخول المهم كان فيه كشف مع الامن بالناس الي هاتعمل صيانة في اليوم ده دخلت اول عربية كانت كنت متوقع اني هانتظر دوري رقم 26 يعني فيه 25 واحد قبلي هايعملوا صيانة بس لقيت مهندس الاستقبال دخل علي العربية قالي هاتعمل صيانة ال50 الف قولتله بس عاوز اغير طقم سيور علشان العربية كانت عاملة 51 الف ولقيت اني ممكن اجي بعد شهرين تلاته علشان اغيرهم فقولت بالمرة بس قالي فيه حاجة بتشتكي منها في العربية بصراحة مكانش فيه حاجة في دماغي تخوف او حاجة كبيرة ممكن تقلق المهم قولتله عاوز اغسل موتور بالفوم بس قالي لو هاتغير سيور هاتستلم العربية الساعة 3 وممكن تكلفك من 2500 الي 3000 جنية علشان بنعمل حساب لو محتاجة تيل فرامل لو محتاجة اي حاجة تاني من الحاجات المستهلكة بس استلم مني العربية ودخل علي اماكن الصيانة المكشوفة الي بره مش الي تحت الهنجر المقفول فكونت شايف الصنايعي وهوة بيشتغل المهم كنت شايف كل حاجة بيعملها فك العجلتين الاماميتين وكشف علي التيل وبعدين ابتدى يفك في سير الدينامو ووش التقسيمة وسير الكاتينة هوة كان باين عليه صنايعي مش اد كده المهم فضلت متابعه من بعيد لغاية ما راح جاب كام علبة كده وسيرين من مخزن قطع الغيار بس وركب وخلص وركب العجل الامامي وطبعا كان المفروض يفك العجل الخلفي ويبص علي تيل الفرامل طبعا البيه راح شايل الحزام الي رابط بيه طاسة العجل وراح مركب اتنين جداد علشان يبان انه فك العجل الخلفي طبعا حركات خايبة ومفهومة المهم نزل العربية من علي الكوريك ودورها وطلعها في المكان الي بيركنوا فيه العربيات روحت اشوفها قالي هانسيبها شغالة كده نص ساعة علشان نتطمن علي دورة الميه بس روحت الحسابات واليكم الآتي :
1 - صيانة كل 5 الاف 153 جنية
2 - تغيير شدادة سير محرك 102 جنية
3 - تغيير طلمبة مياه 178.50 جنية
4 - فلتر زيت 14.09جنية
5 - سير دينامو 80.91 جنية
6 - شدادة سير دينامو 207.47 جنية
7 - سير كاتينة 203.64 جنية
8 - شدادة سير تقسيمة 226.36
9 - بلية كاتينة 112.73 جنية
10 - طلمبة مياه 186.36 جنية
11 - اويل سيل طلمبة مياه 1.14 جنية
12 - خامات ومواد مستعملة 4.07 جنية
13 - منظف موتور 27.17 جنية
14 - منظف كربراتير ووحدة خنق 19.31 جنية
15 - زيت موبيل 1 للموتور 250 جنية
16 - 10% ضريبة مبيعات
يبقي الاجمالي كله 1918.43 جنية
طبعا دفعت المبلغ زي الباشا واخدت العربية ومشيت من الهرم علي اسيوط طوالي

المشاركة الأصلية كتبت بواسطة mhmdalsaadany

ربنا يباركلك فيها ان شاء الله ويديلك خيرها ويكفيك شرها

ربنا يبارك فيك ياباشا ولا يحرمنا من تشجيعك لينا ووقفتك معانا