تحذير : شارع الميرغني سرعته القصوى بقت 40 !!
النهارده كنت ماشي في شارع الميرغني في الحتة الواسعة اللي قدام القصر الجمهوري بعد نادي هليوبوليس
و المنطقة دي الناس كلها بتجري فيها لإن الشارع واسع و مفيش إشارات , عشان كده هما حاطين رادار و كانوا كاتبين إن السرعة القصوي المسموحة 60 كم
أنا لما كنت بعدي من الشارع ده كنت بقصد إني أمشي على التالت و مجبش الرابع عشان معديش ال60 و متلقطش على الرادار , لإني سمعت إنهم شغالين الله ينور في الحتة دي
المهم النهارده و أنا معدي من نفس الشارع لقيتهم معدلين اليفط و كاتبين إن السرعه القصوى 40
أنا مش عارف هي العالم دي عايزين إيه مننا بالظبط , معنى كده إن كل العربيات المعديه هاتتلقط مخالفة سرعة لإن مستحيل حد يمشي في الشارع ده على 40
دانا كنت بابقى ماشي 60 و معظم العربيات بتعديني و قليل قوي اللي بيلتزموا فعلا , دلوقتي محدش هايقدر يلتزم بالسرعة دي أبدا
بجد أنا مش عارف أخرتها إيه مع هيئة الجباية المعروفة بإسم شرطة المرور