هجيب gps من انجلترا ، استفسار من النفيجاشيناوية !!

اختصار لوقتكم اللى اكيد ضاع منه كتير فى استهجاء الخليط المصرى الانجليزى الملاحى المشترك اللى فى العنوان

ببساطة واستغلال لعروض الكريسماس ( اشمعنى يعنى كريم منير ) ، ليا صديق نازل من انجلترا اليومين دول وكنت عايزه يجيب لى معاه جهاز GPS جارمين لقيت سعره كويس كدا من على امازون

Garmin Nuvi 255W Satellite Navigation with Full EU: Amazon.co.uk: Electronics

هو المنتج ده ، طبعا مقارنة بأسعار مصر هو سعره خرافى

حوالى 720 جنيه فى حين انى لما سألت بشكل عام لقيت اى جهاز ماركته وقريب من مواصفاته فى مصر بيتكلم فوق الألف جنيه على طول

يعنى حتى لو اشتريت الخريطة بحوالى 300 جنيه من شركة شوتك المعلنة مع المنتدى هبقى وفرت برده كتير ، ده اذا مكركتش خريطة مضروبة :)

المهم انا عايز اعرف هل هيبقى فى مشاكل فى تشغيل الجهاز هنا فى مصر تحت اى ظرف ؟؟ ، ولا هو مجرد ما ينزل عليه خريطة اى مكان هيستقبل فيه عادى ؟؟

وهل فعلا السعر ده كويس ولا ممكن مثلا الاقى زيه واغلى حاجة بسيطة من غير خرايط برده بس ليه ضمان هنا واوفر الجميل على الراجل اللى هيجيبه ؟

وهل حد ليه تجارب سيئة مع الجهاز او يرشح حاجة تانية فى رنج السعر ده ، انا المراجعات اللى قريتها ليه كلها بتشكر فيه

وشكرا مقدما لأى نفيجاشياوى هيفيدنا بالمعلومات اللازمة

وان شاء لما اجيبه هغيظ كريم منير علشان هو دفع 1500 فى جهاز وانا لا ، بعيداً عن موضوع سرقة الخرايط يعنى :)

هل من مساعدة ؟؟

على فكرة ممكن تنزل في سعره لو قلتلهم مش عايز خرايط الاتحاد الأوروبي معاه... وان شاء الله خرايط مصر مقدور عليها

الجهاز ده انا عارفه.. كويس واستقباله عال العال

اقتباس:

---

المشاركة الأصلية كتبت بواسطة kamalsalem

على فكرة ممكن تنزل في سعره لو قلتلهم مش عايز خرايط الاتحاد الأوروبي معاه... وان شاء الله خرايط مصر مقدور عليها

الجهاز ده انا عارفه.. كويس واستقباله عال العال

---

مجتش فى دماغى الفكرة دى للأسف ، خاصة ان الوقت ضيق قوى لمراسلتهم اللى ممكن تاخد وقت علشان اخر ديلفرى من امازون هيكون بكرة وعايز الحقة لأن بعد كدا يبقى غالبا الحاجات مش هتوصل لصاحبى غير بعد الكريسماس وهو نازل اخر الشهر

أحمد باشا أنت الأول أخدت بالك إنه جهاز مجدد ومعاد بيعه؟ لو مش فارقة معاك ابعت اسالهم السؤال دا مباشرة اذا كان عليه اي نوع من انواع الحظر ولا لأ بس هو غالباً لأ

اقتباس:

---

المشاركة الأصلية كتبت بواسطة أبومريم

أحمد باشا أنت الأول أخدت بالك إنه جهاز مجدد ومعاد بيعه؟ لو مش فارقة معاك ابعت اسالهم السؤال دا مباشرة اذا كان عليه اي نوع من انواع الحظر ولا لأ بس هو غالباً لأ

---

دى اول حاجة لفتت نظرى لما لقيت سعره فى الضياع كدا

والله انا قعدت اشوف رأى الناس على النت فى منتجات جارمين المعاد بيعها دى ولقيت ان الكل بيقول مازالت الجودة عالية ومحصلش منها مشاكل ، ده بجانب فرق السعر الخرافى اللى يغفر للمغامرة دى

حتى فى اسوء الظروف صاحبى بيسافر هناك كتير ممكن ادبسه فى ترجيعه عادى :)

وفعلا سألت فى موقع لبيع الجهاز عن اذا كان متاح انى انزل عليه خرايط لبلاد تانية قالولى مفيش مشاكل

لكن محددتش لهم البلد فقولت اسأل اخواننا هنا علشان كالعادة الدنيا كلها بتبقى بنظام ومصر خلف خلاف

بص يا باشا الجارمن جهاز محترم ..... و موضوع السوفتوير و الخرايط ما تشغلش بالك بيهم ... كل الاجهزة دي بتبقي PNA , windows
CE . يعني ممكن نطنش السوفتوير الاصلي و تشغل اي حاجه تانية زي الاميجو او اي جو او ميو او رووت 66
بس علي فكره هو ده سعره الطبيعي ....لو تستني بعد الكريسماس بيوم او اتنين هيتعمل تخفيضات جامده و ربنا يوفقك

الف شكر يا استاذ سامح على الإفادة

والحقيقة لظروف اللى هيجيبهولى لازم اجيبه اليومين دول ، والحقيقة اول مرة اعرف ان بعد الكريسماس كمان فى خصومات اكتر

جارمن لها موزع في مصر
ممكن تعرف سعره كام جديد بالضمان
Garmin: Dealer Locator - Egypt
SUBMIT2=Show+Dealers+for+this+Country

هو مفيهوش مشكلة في تحميل الخرائط والخرايط نفسها موجودة على النت اعتقد ان شاء الله 99% هيشتغل عادي

أ/ احمد السلام عليكم
نصيحتى لا تشرى الجارمن و أشترى igo او حتى راوت 66
لا تسطيع مسح الجارمن من على الجهاز لانه جهاز اصلى وليس صينى ,الصينى بيعتمد على نظام الوندوز موبيل ce5 وده ممكن تحط اى برنامج مكرك عليه او خريطه مكركه , الاصلى لا
خرائط الجارمن لمصر 80 % من الخريطه باللغه الانجليزيه والجزء اللى بالعربى لن تسطيع البحث عليه لانه لا يوجد كيبورد عربي وده اسوء شىء عدم وجود كيبورد عربى
التحديث فى الجارمن لمصر بطىء جدا بالنسبه للخرائط توجد خريطه الان ل 2010 اوسع تغطيه من ال igo لكن فى المعظم النيفجاشين مش راكب على الطريق يعنى احداثيتك فى مكان و الطريق فى مكان تانى

اقتباس:

---

المشاركة الأصلية كتبت بواسطة ahmadalaaeldin

جارمن لها موزع في مصر
ممكن تعرف سعره كام جديد بالضمان
Garmin: Dealer Locator - Egypt
SUBMIT2=Show+Dealers+for+this+Country

---

هو انا مكلمتش الجماعة بتوع الدلتا الحقيقة ، بس بنظره على موديلات جارمن على مواقع البيع فى مصر الكل بيتكلم فى حدود الالفين جنيه

مفتكرش ان الموزع هيكون ارخص ...

اقتباس:

---

المشاركة الأصلية كتبت بواسطة SAiF3S

أ/ احمد السلام عليكم
نصيحتى لا تشرى الجارمن و أشترى igo او حتى راوت 66
لا تسطيع مسح الجارمن من على الجهاز لانه جهاز اصلى وليس صينى ,الصينى بيعتمد على نظام الوندوز موبيل ce5 وده ممكن تحط اى برنامج مكرك عليه او خريطه مكركه , الاصلى لا
خرائط الجارمن لمصر 80 % من الخريطه باللغه الانجليزيه والجزء اللى بالعربى لن تسطيع البحث عليه لانه لا يوجد كيبورد عربي وده اسوء شىء عدم وجود كيبورد عربى
التحديث فى الجارمن لمصر بطىء جدا بالنسبه للخرائط توجد خريطه الان ل 2010 اوسع تغطيه من ال igo لكن فى المعظم النيفجاشين مش راكب على الطريق يعنى احداثيتك فى مكان و الطريق فى مكان تانى

---

كيف احوالك يا استاذ سيف ، ان شاء الله تكون بخير

متشكر جدا على النصيحة دى ، الحقيقة الموضوع بقا محير قوى

لما بحثت على امازون دلوقتى ملقتش اجهزة iGo عندهم ، بس لقيت راوت 66 ولكن للأسف موديل مواصفاته اقل كتير جدا وتقييمه سئ

ده علاوة على ان البائع مش امازون فالمنتج هيوصل بعد 25 ديسمبر ويمكن اخر الشهر خالص وده صعب

النافمان برده بصيت عليه فيه موديلات كويسة بس مازالت مشكلة الشحن قائمة

غالبا كدا خلاص هكنسل الفكرة