وزارة المالية تستعد لإعادة طرح مشروع إحلال الملاكى مرة أخرى

**MASERATI** · 19-12-2010 02:44 PM

المشاركة الأصلية كتبت بواسطة ahmedamin

هما أخرهم .... هيعقدوا شوية عمليات الترخيص للعربيات القديمة + هيزودوا الرقابة عليها (مخالفات وامن ومتانة وعادم ....الخ ) علشان يزهقوا النااس فى عيشتهم ويبيعوها ....................................

السلام عليكم و رحمة الله و بركاته

بالظبط فعلا , هو ده الحل المنطقى اللى ممكن حكومة شريفة عفيفة زى الحكومة بتاعتنا تتبعه مع الناس.

و تلاقى اتنين , كل واحد معاه عربية بيجو 504 مثلا و تلاقى واحد منهم بيرخص و التانى لأ و لو سأل يقولوله , أصل عربيتك مش مطابقة للمواصفات -على أساس أننا مش هنفهم فى شغل الباشمهندس المرتشى اللى فى المرور بأه- و على أساس أن التانى عربيته مطابقة لأن معاه واسطة فى المرور و أنتوا سيد العارفين, المرور هو أبو الواسطة اللى فى الدنيا .

**Maged_Samy** · 19-12-2010 02:49 PM

الموضوع ده هيفشل تماماً لانه فكر غريب جداً .... انت ممكن يكون عندك عربيه بقالها 30 سنه ومحافظ عليها وحالتها احسن 100 مره من عربيه موديل 2008 او 2009 تكون مع واحد مهمل ومبهدلها ... العربيه حاله مش سنه صنع وده رأيى الشخصى .

**MBhead** · 19-12-2010 03:53 PM

قانون متخلف
في ارقي دول العالم مافيش فانون زي دي انا مش فاهم هما عايزين ايه ....اكيد حيشدادوا اللاجراءات و يزودو التراخيص و خلاص
انا معايا مرسيدس 350SE موديل 79 و بعتز بيها جدا و بحبها و مش بفكر ابيعها و حتي لو جبعتها حيبقي عشان اجيب حاجة اعلي بورش مثلا اوي حاجة امريكاني انا شايف ان العربيات الكلاسيك ممتعة اكتر العربيات الحديثة انا مبركبش غير الكلاسيك
اما انا مش فاهم يعني لما حيطبقوا قانون الاحلال دا و يخدو العربية المرسيدس اللي معايا حيجبولي S-class زيرو ولا ايه
دا غير ان سعرها مليون و شويه دي ترخصها اغلي من عربيتي و بردوا انا مش عايزها
و لو العربيات القديمة غير مطبقا للمواصفات هل الطرق مطبقا للمواصفات؟؟؟؟
يا جماعة مصر فيها كم كبير من العربيات الكلاسيك و الماركات العريقة و الحالات النادرة انا اعرف ناس معاها تحف لو اي حد بيروح معرض فورميلا الاهرام و يشوف جناح العربيات الكلاسيك و التحف اللي فيه
انا مش عارف معالي الوزير يوسف بطرس غالي حيعمل فينا ايه اكتر من كده

**ainshouka** · 19-12-2010 06:21 PM

فى نفس الجريدة كان مكتوب مانشيت بالبنط العريض فى الصفحة الاولى ان الحكومة حتدى حوافز تصل الى 8000 جنية لصانعى السيارات لزيادة نسبة المكون المحلى الداخلة فى التصنيع

وبعدين ييجى يتكلم عن احلال الملاكى

وبالرغم من انه ذكر الرأى المعارض لفكرة الاحلال الا انه قالها صراحة فى الاخر انها تجربة تستحق تبنيها والعمل بها وانا معرفش ايه وجه الاستحقاق فى كده

بس ماعلينا

الحكومة زى مانتوا شايفين غلبانة وممعهاش فلوس والكبار عاوزين سبوبة لان اخر مشروع عملوه طلعوا فيه بسبوبة خلص خلاص

فيعملوا ايه؟

يروحوا يقعدوا على قهوة تانية

يشوفولهم مشروع جديد يقسموا فلوسه مابينهم ومابين نفسهم من المواطنين الغلابة وعشان نخلي المواطنين يقدروا يشتروا نقسطلهم وندلعهم وندخل شركاء تانيين يتحملوا جزء من الفلوس (زى شركات الدعاية اللى كانت على التاكسيات)

وبكده يبقى شغلنا كله على كله ويكسبوا هما بالهابولى

انا عندى فكرة احسن

هما بدل ميقعدوا يلفوا علينا ويعملوا الحركات القرعة دى فيشوفوا هما عاوزين كام واحنا نجمعهلهم ونديهولهم علطول

وهما لو محرجين ممكن يبعتوه جواب مسجل وعليه طابعين دمغة وختم النسر الى الشعب عشان يبقى اتشال من عليهم الاحراج

وبعدين احنا لازم نكون كلنا ايد واحدة

يعنى يرضيك ويجيلك نفس تنام وانت شايف الوزير نفسه فى الجاجوار ومش قادر يجيبها

بلاش بقى نفكر بانانية كده

مش الوزير دا بيبقى عليه مسؤليات برضه

يعنى عنده مصاريف الشاليه ابو 80 فدان وحمام السباحة 300 متر

يعنى من الاخر

الله يكون فى عونهم وعوننا