الله يرحمك يا علاء ولي الدين .. لما اتسأل و لما احب اخاطب شعب مصر.. أكلم مين؟؟ :)))
معلش يا جماعة احنا معظمنا هنا شباب و بنحب الجري و الحرق و الكلام ده كله..

و أهالينا خايفين علينا و مش حاسين بقيمة القرش و متهورين و عايزين نضرب بالنار

بس لما محور NA و اوتوستراد النادي الاهلي و كورنيش المعادي.. السرعة القصوي فيهم 60 !

و الدائري و المحور و طرق السفر (عين سخنة و اسكندرية و السويس..) 90 .. يبقي انا حاجرب العربية ازاي و اجري بيها امتي و انشكح اوي لما الاقي المؤشر زاد عن 140 فين ؟؟!

طب ده الناس اللي سايقة مانيوال عمرها ما حاتحتاج تجيب الخامس؟!!!

الله يمسيكي بالخير يا بيجو 405.. عربيتي حبيبتي.. عربية البوليس.. كانت بتجيب 140 و هي لسه علي الرابع!

و دلوقتي واحد زميل في قسم كيا يقوللي احنا في مرحلة تفتيح الموتور.. طب انا و لحقت افتحه الحمد لله... غيري حايفتحه امتي!

و لما معاكوا فلوس تشتروا رادارات.. طب ما تصلحوا المطبات و البلاعات و النقر اللي مالية الشوارع... يعني هو حاجة من اتنين.. يا يطلعلي بلالين في الكاوتش (و ما شاء الله السيراتو مابتتوصاش) يا امشي بالعربية كأني جايبها من ابو الجوخ!! كأني عجلة ماشية بتتفادي البلاعات..

و الردارات دي حاتحمينا من الحوادث..؟؟ طب و المقطورة و الاتوبيس السياحي اللي بيرمح و لا اللي ماشي علي 40 في اقصي الشمال و لا اللي مفيم و مجنط و مقضيها غرز و لا العربية النقل اللي محملة بنزين و ولعت فجأة و غيره و غيره.. مين يحمينا منهم؟؟

ارجوكوا مش عايز ردود مواساة الواحد مش ناقص.. بس انا عايز طريق واحد يوحد ربنا اعرف اجري فيه.. و دمتم سالمين و مضحوك عليكم معايا من اصحاب بيزنس الرادارات..