مش شغال إلا فى تخصصى.....!!!!

بناء على المناقشات اللى جرت فى الموضوع القديم حديث تخرج..!!!!!!!!!!!!!!

وكم التباين الفكرى الى ظهر وقد أيه فى شباب يفرح.. بيجرى على لقمه عيشه ومهتم بمستقبله وأمثله لناس بدأت صغيره وبقت دلوقتى حاجه كبيره ..ماشاء الله...

هفضفض معاكوا بحاجه تانيه....

دلوقتى أيه رأيكم يا شباب فى اللى ينشف دماغه ويقول انا مشتغلش غير فى تخصصى....!!

يعنى لو خريج أداب قسم تاريخ مثلا...هيشتغل أيه فى تخصصه؟

لو مهندس ميكانيكا باور أو إنتاج....ومش متوفرله دلوقتى شغل.....يشتغل حاجه تانيه ولا يقعد لما يلاقى شغل؟

بصراحه انا فعلا محتار...ساعه أقول يشتغل اى حاجه والشغل بيجيب شغل وياخد خبره حياتيه فى التعامل مع الاصناف المختلفه من البشر ..!!

وساعه أقول لو إشتغل أى حاجه هيخسر وقت كان ممكن يكتسب فيه خبره فى مجاله وهينشغل بمجال تانى....

لكن لما نحلل الموضوع هنلاقى اننا معندناش حاجه اسمها فى تخصصه...!!!

ليه؟

99% مننا داخل الكليه او المعهد بمجموعه فقط....

بمعنى...

دماغنا مترتبه طالما المجموع كبير يبقى أحط كليات القمه بالترتيب وأدخل اعلى كليه فى الكليات المتاحه بمقياس درجه القبول....

أنا عن نفسى كان مجموعى فى ثانويه عامه 87 %..وده فى وقتها كان مجموع هايل جدا...

طبعا عملت زى كل الناس ورصيت الرغبات بالكربون زى كل بيت مصرى..طب بكل فروعه وبعدين صيدله بكل فروعها وبعدين هندسه وهكذا...

والنتيجه كانت انى سبت الكليه العمليه من أول كام يوم ورحت حولت تجاره....لأنى دماغى مكانتش جايه مع الكليه العمليه وادوات التشريح والبالطو....

كذلك معظمنا...

بيدخل الكليه اللى مجموعه يسمح انه يخشها...بدون بقى الالتفات لما قد يكون من حب للمجال او كره ليه....!!

يعنى ابقى صيدلى او دكتور حبا فى الوجاهه الاجتماعيه وإستخسار للمجموع العالى....!!

فكده محدش يقولى مجالى وتخصصى...!!

لأنك كيفت نفسك على المجال ده...فلو ربنا كرمك بشغل فى تخصصك يبقى زى الفل ولو مش متوفر ...أشتغل حاجه تانيه لغايه ما الاقى تخصصى....!!

والاهم انك تتميز فى المجال اللى تشتغل فيه...!!

يعنى فى حوار مع صديقى احمد كمال قاللى ان ال store manager فى فرع من فروع فودافون طبيب أسنان..يعنى مؤهله يشتغل طبيب أسنان لكن تميز فى المبيعات لغايه ما بقت وظيفته المؤقته شغله الأساسى ودخله منها بقى اضعاف دخله من مهنه الطبيب...

ليه؟؟

عشان اتميز فيها .....ومقالش انا دكتور هقف فى محل ابيع موبايلات وخطوط!!

ولا قال هيدونى كام يعنى انا لو سافرت الخليج هقبض قدهم 5 أضعاف....!!


ولا قال منظرى قدام أصحابى وزمايلى شكله أيه..!!

أرجع وأسأل السؤال المهم تشتغل بتخصصك ولا اى شغلانه دخلها كويس ومحترمه؟

اقتباس:

---

المشاركة الأصلية كتبت بواسطة أشرف فتحى

ب
أرجع وأسأل السؤال المهم تشتغل بتخصصك ولا اى شغلانه دخلها كويس ومحترمه؟

---

مش شرط اشتغل بتخصصي بالذات لو ملاقتش نفسي فيه ومافيش قبول ..اي شغلانة الاقي نفسي فيها بطلع فيها مهاراتي وتكون مهارة مناسبة لطبيعة العمل اكيد هبقي في قمة السعادة في الشغل ده ويمكن معرفش اشتغل شغلانة غيرها وبالتالي هتبقي الخبرة نتيجة للكلام ده....اذن يبقي التخصص اللى مينفعش اشتغل غير فيه هو التخصص اللى اشتغلت فيه وفيه درجة عشق ما بيني وبينه مش التخصص اللى موجود في شهادتي.

ومن تفرغ لشيء اجاد فيه

عن نفسى أشتغل شغلانه دخلها كويس ومحترمه لغاية لما الاقى تخصصى
لان قدر ملاقيتش تخصصى يبقى هفضل قاعد فى البيت لغاية أما ربنا يسهل بعد سنة ولا اتنين
ساعتها اقول كنت زمانى بقيت حاجة لو كنت قبلت الوظيفة دى ومش مهم المجال
وعلى فكرة لو حسيت إن الشغل الى مش فى تخصصى أحسن من تخصصى هفضل فيه مهما يكون
بس بشرط أنى أحاول اطور نفسى أولا ب أول عشان اعرف اعمل لنفسى كارير
وبعدين فى مصر معظم الناس مش شغالين بشهادتهم

هقول كلمة واحدة او مقولة واحدة مقتبسة من مقولة ( حب ماتعمل حتي تعمل ماتحب ) عشان تلائم الوضع الحالي والظروف الصعبة والمقولة بعد التعديل ( حب ماتجد من العمل المحترم حتي تجد ماتحب ).

يبقي مش ناوي تشتغل

يا عمونا انا بشتغل في بدون مؤهلي اللي اهلي صرفوا عليا لحد ما اتخرجت ودلوقتي بشتغل شغلانة لا تمت بصلة الي مؤهلي
والحمد لله دخلها كويس

سيبك انت من الكلام اللي ميأكلش عيش واشتغل

اقتباس:

---

المشاركة الأصلية كتبت بواسطة أشرف فتحى

أرجع وأسأل السؤال المهم تشتغل بتخصصك ولا اى شغلانه دخلها كويس ومحترمه؟

---

اعتقد أن الاجابة عند ناس كتير ...هتبقى الاختيار التانى

لأن فى ظل ظروف معيشية ما بتوفرش الحد الادنى لحياة آدمية بسهولة ...أصبح الدافع الاساسى للعمل

هو تحقيق ظروف معيشية مناسبة....و التى لو كانت متوفرة كان ممكن ساعتها يكون فى اسباب تانية لاختيار نوع العمل

زى ان انت تكون بتشتغل حاجة ممتعة بالنسبة لك او عندك شغف بيها....او رغبتك من انك يكون لك دور معين فى حياة الناس ...و عملك فى وظيفة تحقق ده من خلالها

او.....او.....و غيرها من الاسباب اللى تخليك توصل فى شغلك لدرجة الابداع...مش الاتقان بس

و متحولش الشغل بالنسبة لك لمجرد مصدر دخل فقط...."و يبقى على قد فلوسهم"

و بما ان الضروريات بقيت تتوفر بصعوبة ...ده اذا توفرت اساساً...فكده اصبح ما سبق ذكره يندرج تحت بند الرفاهية

و كلام ما بيأكلش عيش (الا فى ما ندر) ....و ما فيش مانع تعتبره سك عفش!!!

هتقولى لخص و عايز ايه من الرغى الكتير ده ؟؟

هأقولك انه ببساطة فى الظل الظروف اللى احنا فيها ...الكل او المعظم بيدور ع المهنة اللى توفره حياة كريمة

و لما تتوفر ما فيش مانع ندور على وظيفة تخليها اكتر كرماً

حتى اللى بيبان فى اختياره لمجال معين انه مبنى على رغبة منه ....لو دققت فى اسباب رغبته سواء كان

مهندس او دكتور او ظابط او ...هتلاقى الدافع و ان ماكنش ظاهر هو التمتع بمميزات اى مهنة منهم و نظرة التقدير ليها

و ده مش عيب و لا غلط...بس الغلط انه يضحك ع نفسه و يصدق انه واخدها رسالة فى الحياة

لأن احياناً بعد ما تخيب توقعاته و ميحققش نجاح فيها....بيفضل متمسك بيها حتى لو توفرت فرص اخرى يحقق بيها اللى هو عاوزه

بالنسبة لموضوع التخصصات و ع ذكر ميكانيكا باور....و انتاج ...طيب ايه رأيك فى بتوع طيران؟؟

احتمال انه يشتغل فى مجاله كم %....و اعتقد فى قسم فلك فى كليه علوم...ده ايه موقفه؟؟

طبعاً غنى عن الذكر ان فى مجالات كتير التخصصات نفسها تشعبت ....و السوق بقى يخلق و يفرض تخصصات جديدة

و بالتالى التمسك المستميت بتخصص معين بدون توفر اسباب النجاح فيه...يعتبر خطأ

اسف على الاطالة و الكلام الملخبط...و تحياتى ليك ع الموضوع يا باشا

اشتغل شغلانة شايف نفسي فيها

انا كنت على وشك بل اشتغلت بالفعل business english instructor في شركة كبيرة ..
بس للأسف بعد فترة .. ملقتش نفسي في الشغلانة خالص
حسيت اني بضيع وقت

أنا درست كيميا وذرات كربون .. لما دماغي ورمت ..وكنت بنام أحلم بأول فوكسيد الفوتاسيوم
هههههههههههههههه
وأديني واقف ببيع في محل إسمه صيدلية
............
وقريب أوي هجمع تمن أول عربية مستعملة .. وهتاجر فيهم
أي حاجة نزود بيها الدخل في الايام السودا دي

السلام عليكم
هقولكم على تجربتى و اعتقد ان ده حال كتير من الشباب
انا متخرج من كليه ادارة تخصص بنوك و الدفعة بتاعتنا فى السنة 150 واحد ... طبعا و احنا فى الكلية الناس عمالة تنفخ فينا و تفرشلنا الارض ورد و الواحد قال بس انا هتخرج اشتغل مدير بنك او على الاقل نائب مدير بنك (( بهزر طبعا )) .. بس الحقيقى ان فعلا كان فى حاجة فى ذهن كل الدفعة زى مسلمات كده ان اول ما هنتخرج البنوك هتجرى تخطفنا عشان نشتغل فيها

المهم اتخرجنا و محدش لا جرى و لا مشى و لا حتى بصلنا
طب اروح انا بقى اقدمفى البنوك عشان اشتغل و بصراحة كان تفكيرى فى الموضوع لسه مفيهوش النضوج لانى كنت لسه بفكر بعقلية واحد لسه خارج من الجامعة و طبعا مع النفخة الكدابة اللى شرحتها فى الاول
و لا حد اتصل و لا الدموع ... طب و بعدين
فضلت ادور ...ادور ... ادور
لغاية ما اشتغلت sales لكروت فيزا فى احد البنوك معجبتنيش الشغلانة و قولت لا مش انا و مش لاقى نفسى و حاجات كده
قعدت فىالبيت و قلت استفيد من الوقت و اخد كورسات و قد كان ... اخدت كورسات انجليزى و كمان كنت بدأت انى ادرس صينى (( اه و الله صينى )) فضا بقى
و اخدت كورسات فى التحليل الفنى للبورصات (( الحمد لله دخلت دماغى اوى الحكاية دى و نجحت بتقديرات عالية الحمد لله و بقيت عمال اخد كورسات اكتر تخصصا فى الموضوع ده و شهادات و كلام جميل اووى ))
ادور بقى لى شغل فى شركات الاوراق المالية... مفيش طبعا و ده العادى فى بلدنا ( ام الدنيا ) .. __ الدنيا من الدناوة __
و كل الفترة دى قاعد فى البيت
اوحش حاجة فى الفترة دى انى عندى الاحساس انى المفروض انى على الاقل اصرف على نفسى مش لسه باخد مصروف .. طبعا غير الجانب النفسى انى عايز احس ان ليا لزمة فى المجتمع (( انا بشتغل اذن بنتج اذن انا ذو قيمة )) .. غير ان معظم صحابى اشتغلو و شغل محترم
جالى احباط من كل العوامل دى كلها لما تكالبت عليا و كنت قاعد فى البيت حوالى 8 شهور دا بعد ما كنت شغلانة الفيزا الفقرية دى (( ممكن تكون مناسبة لناس تانية )) .. دى ارزاق
المهم فى واحد بتاع عطور فى الشارع بتاعنا و قعد يقولى تعالى اشتغل معايا محاسب فى المكتب و المصنع و قعد يقولى كذا مرة و انا اقول لا لا و اتهرب منه
لغاية ما طفح بى الكيل و مش قادر اقعد اكتر من كده و قولت لو قالى تانى هنزل اشتغل معاه .. و قد كان
فعلا نزل اشتغلت معاه و كان عنده شغل متاخر من 6 شهور فى الحسابات و حاجات ملخبطة و دفاتر رايحة و اوراق جاية .. لميت كل الشغل و عملته فى excel cheet و معادلات و الراجل مكانش مصدق اللى بيحصل الكلام ده خلص فى اول شهر و كان مرتبى 450 جنية ( الحمد لله ) بس قولت اهو ابقى بعمل حاجة
تانى شهر شغل الحسابات كان اتظبط فى الشهر الاولانى قالى تعالى بقى اشتغل مع العمال امسح اقزايز بتاعة البرفانات و املى كحول .... قولت و الله لو هضرب نفسى بالنار ما هعمل كده ((( مش تكبر و لكن مش اخر ان الواحد قعد يدرس و يتفحت سنين و ابحاث و كورسات و نيلة منيلة بطين انى فى الاخر اقعد امسح قزايز برفانات زيى زى عيل بيمسح منخيره فى كمه .. و بردو مش بقلل من شان حد ))
سيبته و دورت على شغل تانى ... و اشتغلت مندوب لبنك بردو فى قسم قروض السيارات و كانت شغلانة مش وحشة و لكن مع وجود بعض العيوب بس الحمد لله على كل حال
كل ده و انا مكمل فى الكورسات بتاعة التحيل الفنى زى ما انا
المهم واحد صاحبى قالى انت مش كنت مقدم عندنا فى البنك قولتله اه ... طب و ايه اللى حصل قولتله محدش اتصل .. قالى ابعت السى فى تانى و شوف ... و قد كان
بعد فترة لقيت الناس بتتصل بيا و من هنا لهنا ... الحمد لله انا شغال دلوقتى فى احد البنوك المحترمة و فى شغلانة محترمة

بجد من تجربتى مع انها بسيطة و لكن اتعلمت منها حاجات كتير

1 - ان لواحد يجتهد على قد ما يقدر فى حياته عموما و ميخليش الكبرياء يعميه بس فى نفس الوقت ميتساهلش اووى لدرجة انه يبقى عديم الكرامة
2 - ان الشغل مهما كان بسيط او اقل من امكانياتك فى كل الاحوال احسن من القعده فى البيت لانه بيحسسك ان ليك قيمة (( مش عشان الفلوس .. لانى كان معايا فلوس و بخرج و بصرف و مبرطع فى الدنيا زى الحمار الحصاوى ... لكن المقصود القيمة المعنوية ))
3 ان الواحد مييأسش و يحاول بدل المرة الواحدة الفمرة و مليون مرة كمان
4 - ان بلدنا دى بلد الكوسة و دى مش جديدة عليكو و ده انا شفته ( لان معايا واحدة فى الشغل بتشتغل فى بنك و هى كانت حقوق او اداب و متعرفش اى حاجة عن التجارة و لا الارقام ) .... حسبى الله و نعم الوكيل .. لان اللى المفروض يشتغلو و اكفأ منها قاعدين على القهاوى و مش لاقيين شغل
5 - اللى عيز يشتغل بسهولة يعمل حاجة من اتنين أ ) يكون معاه واسطة يضمن بيها انه يشتغل فى مكان محترم
ب ) يطلع من اوائل الدفعة بتاعته

فى النهاية لنا الله جميعا .. و الحمد لله .. مش هقول لو كان معايا واسطة كانت قصرت عليا المدة اللى اتبهدلت فيها .. لكن انا شايف انى لما دخلت بتوفيق ربنا و بدون واسطة احسن فى نظرى من ناحية الكرامة مش اكتر لانى بصراحة شديدة ضد الواسطة و المحسوبية و الكلام الفاضى ده ... و حسبى الله فى اللى بيستغل منصبه او وضعه فى اهدار حقوق الناس اللى تستاهل

اسف انى طولت عليكم .. بس بجد الموضوع شدنى انى اتكلم فيه .. مع انى مش بحب احكى كتير عن الحكاية دى و خصوصا الجزء بتاع البرفانات ده

لكم جميعا التحية
و بحييك يا ا/ اشرف على الموضوع الجميل ده

استاذ اشرف ..فيه ناس بتتدخل كليات القمه زي ماحضرتك بتقول علشان الوجاهه الاجتماعيه واستخصار المجموع

بس برضه فيه نسبه كبيره ..بتدخل الكليات دي علشان تحقق احلامها وطموحها وعلشان الكليات دي متفصله عليهم ..فيه ناس بيبان عليهم من وهما صغيرين هما هيبقو ايه ..الضابط بيبان انه ضابط من وهو صغير والدكتور والمهندس والمحاسب والمحامي وغيرهم... .بيبقى مرسوم عليهم من وهو صغيرين .. (انا بتكلم على فئه معينه )
والفئه دي حرام تدفن نفسها في شغل غير تخصصها

انا مش بقول انهم يقعدو في البيت ويستنو الفرج !!!
لا طبعا
لو الظروف اضطرتهم للعمل في غير تخصصهم ..يشتغلو ..ولكن يكون الشغل بصفه مؤقته لحين تيسر الحال ولما ربنا يأذن بانه يشتغل في تخصصه ويبتدي يحقق احلامه ..واللي بيدور وبيتعب اكيييييييييد ومليون في الميه بمشيئة الله هيحقق حلمه

والله هو دة الموضوع اللي شاغلني اليومين دوول
وعملي قلباان في البيييت
انا لسة متخرج السنادي من اكاديمية كنت بدرس فيها محااسبة
يعني معايا دلوقتي بكالريوس محاااسبة
وانا طبعا معرفش اي حااجة في البطيييخ
انا معدي كدة بظروفهاااااا
فجينا بقي في حوار الشغل انا والدي والجماعة ف البيت
احنا اساسا تجاار كاوتش وانا شغال مع واالدي بس انا عايز حااجة الاقي نفسي فيها وهيا (تجارة العربيااات)
انا الحمد الله غاوي الكلام دة من زمااان ومعارفي كتير دايسين في الحوار دة من زماااان والحمد الله مكسبها حلو
الحاج بقي بيقلي خد كورسااات والحاجات دة وشفلك شغلانة في اي حتة
وانا مش بتاع كورساات ومذاكرة والكلام دة دة اولا
ثاانيا والله الشغل كتيير
قدااامي شغلانة في المينا بتاعت اسكندرية ومرتبها 2000 جنية في الاسبوعين وبتنزل اسبوع اجااازة والاكل كلة عليهم والنوم عليهم وفي فندق كمااااااااان
بس هاتعمل اية بقي في الشغل هاتشيل حاجات يبعتك مشااوير
شغلانة من الاخر متلقش بواحد معاة بكالريووس تجااارة
فربنا يكرمنا انشاء الله ... وكل وحد يحقق كل اللي هو عايزة

magyver اقولك جرب الشغلانة ام 2000جنيه دي وصدقني انت الكسبان معرفة من تحت لفوق والدنيا ماشية ازاي يعني حتشوف الدنيا من زاوية تانية لحد ماتلاقي الزاوية اللي تكون فيها اكثر استقرارا وتحقق نفسك فيها
البني ادم كل يوم يعدي عليه متعلمش فيه حاجة جديدة يبقي راح عليه اليوم ده
وحتزود معارفك بالطبع واكتساب خبرات والدك بينصحك بالافضل وانت استثمر المتاح

زى مااتكلمت فى الموضوع التانى يأشرف
انا معايا بكالوريوس تجاره جامعه القاهره
دخلت الكليه دى بمزاجى وبمحض ارادتى مش حسب التنسيق
كنت مخطط انى هخلص هشتغل مع والدى فى البنك اللى هو بيشتغل فيه
لكن دائما تأتى الرياح بما لا تشتهى السفن
بمجرد ماأتخرجت صدر قرار من مجلس اداره البنك بمنع تعيين الأقارب من الدرجه الأولى والثانيه لحد الخامسه عشر ههههههههههه فقرى
المهم قعدت فى البيت الفتره بتاعت التجهيز للتجنيد وما بين انى ادخل الجيش او اخد تأجيل
أخدت تأجيل وبدأت رحله البحث عن عمل عشان ماأمدش ايدى اول الشهر لبابا واقولو هات
مكنش فى توفيق زهقت وأكتأبت نفسيا لما ملقتش شغل فى مجالى اللى انا حابب ابقى فى حاجه من زمان
اول شغل قابلنى اشتغلتو واللى ممكن يشتغلو واحد حاصل على محو اميه مش بكالوريوس (موظف امن فى اأحد المصانع) والدى قالى يابنى الشغلانه دى مش من مقامنا ولا من مستوانا الأجتماعى قلتلو كلو بيبدأ صغير وهو أحسن من القاعده فى البيت على الأقل أجيب مصاريفى
المهم صاحب المكتب اللى كنت شغال معاه موظف امن قابلنى مره بالصدفه وانا بقبض اخر الشهر (كان اول شهر اقبضه)
لقيته بيقولى انت شغال ايه معانا قلتله موظف امن قالى بس انت شكلك مؤهل عالى قلتلو الشغل مش عيب عرف انى معايا بكالوريوس تجاره
قالى انا عايز حد بيفهم يمسكلى المكتب دا ويكون امين وانا متوسم فيك دا
قلتلو تحت امرك مسكتلو المتب شهرين وبعدين ظهر قدامى مطعم مجهز بعدده بكل احتياجاته قلت اخده ايجار واجرب حظى لكن فشلت فيه بسبب ان كل دخله كانه واكلينه الصنايعيه (لازم تبقى بتفهم المهنه كويس وتشتغل بأيديك كمان مطعم فول وطعميه )
قفلت المحل وبدأت ادور على شغل تانى
ملقتش قدامى غير مدرس محو أميه للعاملين بجامعه عين شمس مقولتشس لأ اشتغلت مع كم الضغط من انك تتعامل مع اشخاص ذو اعمار كبيره ولكن بعقل اطفال صغيره
وانا شغال فيها اتعمل اعلان فى الجرائد عن مكان طالب مندوبى مبيعات
رحت قدمت عملت انتر فيو وكانت شركه لتجاره الأدوات الصحيه والسيراميك المحلى والمستورد وكانت من تانى اكبر شركتين فى المجال ده (من الأخر بياع سيراميك وخلاطات ومستلزمات سباكه بس بشياكه شويه لابس يونيفورم والناس بتقولك يا بشمهندس )
الحمد لله نجحت فى الشغلانه دى وعملت فلوس حلوه
وكونت علاقات مع ناسي زو مستويات عاليه ورجال اعمال
وفى يوم من الأيام الكئيبه حزنى على انى مشتغلتش فى المجال اللى كان نفسى اشتغل فيه ظهرلى احد رجال الأعمال اللى كان من ضمن لسته العملاء بتوعى عرف بشكل او باخر انى تعبان فى شغلى وانى خريج تجاره طلب منى أنى اروح اشتغل معاه فى التسويق العقارى لأحد قراه السياحيه بشرم الشيخ قولت يافرج الله رحت واشتغلت فى الموضوع ده 6 شهور لكن بسبب اداره الشركه التسويق اتحول لشريك معاه وتولى هو التسويق فأصبحت بلا عمل مره أخرى ولكن لم يتركنى الرجل
عينى معاه محاسب فى احدى شركاته الأخرى العامله فى مجال تعبئه وتغليف البن (بن رانيا برازيليا )ومنها بدأت اتعلم الحسابات واخيرا اشتغلت فى مجالى وشويه واتغيرت أداره الشركه دى ومعجبنيش اسلوب التعامل فى الأداره الجديده فأكرم الله وجه الرجل تم نقلى للشركه التى كنت اعمل بها فى مجال التسويق ولكن فى اداره الحسابات واخدت منها خبره لمده خمس سنوات ومنها انتقلت مع احد الشركاء زو الحجم الكبير
بوظيفه مدير حسابات لشركه من ضمن مجموعه شركات أل علام والحازق للمقاولات اللى شغال فى المقاولات هيعرف ثقل الأسمين دول
والحمد الله على النعمه اللى انا فيها
خلاصه الرغى اللى رغيته ايه
انى مصممتش اشتغل فى مجالى واشتغلت حاجات بعيده كل البعد عن مجالى ومن الشغل دا خدت خبرات حياتيه وكونت علاقات ومن خلال العلاقات دى وصلت لمجالى وكبرت فيه والحمد لله

لو شغلانه مش تخصصى بس الاقى نفسى قيها مفيش مشاكل بس صعب اكون مهندس و أروح أشتغل فى أى حاجه
انا مثلا مهندس كهرباء دفعه 2008 قعدت سنه ونص شغال فى شركه اسما بس انا مهندس انما خبره مفيش حاليا كل مقابله بتدخلها بفشل فيها فشل ذريع موضوع اى شغل والسلام بالنسبالى فاشل وسيبت الشغل اللى انا فيه عشان حسيت انى بنفخ فى قفص ده غير انهم اصلا معندهمش شغل فيه خبرخ بربع جنيه ملخص الكلام كالأتى
اشتغل اى شغل تاخد فيه خبره بأى مرتب تحت أى ظروف انما شغل مفهوش خبره ولا فلوس ولا مستقبل يبقى تقعد فى البيت احسن

واللة المسئلة بالنسبالى راحة نفسية وماديا يكون كويس
يعنى انا اتخرجت من جامعة خاصة بس للااسف مش تمام ومؤهلها مش حلو فا كان لازم اشتغل اول ما اخلص بأى شكل (المؤهل مراقب جودة ) جامعة عمالية
خلصت فترة انظار الجيش وتأجيل بس مقعدتش فى فترة الانتظار اشتغلت حاجات عجيبة
فى سايبر الصبح وفى السوق باليل يعنى على فرش فى الشارع بتتعامل مع بلطجية واشكال كويسة واشكال مش ولا بد بعدها واحد صاحبى عارفنى مجنون عربيات وكنت بقولة انى عاوز اى شغل تانى قالى انو ممكن يدخلنى توكيل بس الشغلة مش حلوة قلت ماشى وكان دخلت وبقيت مساعد فنى كهربائى وقعدت فيها 9 شهور يشاء القدر ان واحد من امناء المخازن يمشوا ويحتاجو واحد متعلم يكون مساعد لاامين المخزن
ودة يكون انا ودخلت وبعد كام شهر بقيت امين مخزن لتوكيلات تانية (الشركة الى انا فيها معاها 8 توكيلات ) وفى الكام شهر دول لقيت نفسى
امين مخزن لثلاث توكيلات وبقيت نسبيا فرد مهم فى الشركة مع ذالك عاوز امشى علشان الراتب مش شايفة مناسب بس
تقدر تقول انى ارتبط بالشغلة دى بسبب انى بقالى فيها 4 سنين وربنا يوفق الجميع وانا منهم والاقى شغل افضل

أولا أحب أحييك على الموضوعين وأتفق معاك فى الموضوع السابق (قرأتة كلة بس متأخر وردي كان هيبقى أخو رد أحمد نوح)

المهم أنا حديث التخرج هندسة ميكانيكا قوى ، مُنتظر الجيش وحاليا ببحث على شغل (وإن كان صعب بسبب الجيش)

وكان هدفي وطموحي أشتغل فى مجال الطاقة الشمسية وتحلية المياة ، ولأني عارف إن عندي مُشكلة (الجيش) فأنا كنت بدور على أى شغل (هندسة ) وواحد زميلي كان جايبلي شغل في خدمة عملاء قدمت فية برضوا (وبرضوا كانت المشكلة الجيش) ولسة أمبارح عامل مُقابلة فى شركة على أساس مهندس مبيعات (مع إني مبحبش الشغلانة دي ، مش من باب مستقلها ، بس لأني أحسن فى مجال المشاريع ) المهم برضوا كانت المشكلة الجيش

فأنا شايف أن طالما فى صعوبة إني أشتغل فى الحاجة اللى بحلم بيها فهأجلها شوية وفى نفس الوقت هدور على أي شغل تاني وكل ما كان أقرب لهدفي أو يخدمة يبقى أفضل ، وأكيد أكيد أى شغل هشتغلة هيفيدني فى حياتي عموما (إن ما أفدنيش فى شغلي)

وأكيد برضوا هيكون مرحلة فى حياتي وهرجع لحلمي تاني بإذن الله

اقتباس:

---

المشاركة الأصلية كتبت بواسطة waelfarid

magyver اقولك جرب الشغلانة ام 2000جنيه دي وصدقني انت الكسبان معرفة من تحت لفوق والدنيا ماشية ازاي يعني حتشوف الدنيا من زاوية تانية لحد ماتلاقي الزاوية اللي تكون فيها اكثر استقرارا وتحقق نفسك فيها
البني ادم كل يوم يعدي عليه متعلمش فيه حاجة جديدة يبقي راح عليه اليوم ده
وحتزود معارفك بالطبع واكتساب خبرات والدك بينصحك بالافضل وانت استثمر المتاح

---

عفوا انا اتلخبطت بس في المرتب هيا 1000 جنية في الاسبوعين وبتنزل اسبوعين اجااازة
اولا انا مش محتاج قوي علشان انزل اشتغل عامل يشيل ويحط
يعني انا عندي محلي وقااعد فية
انا بس عايز حااجة ازود بيها الدخل والاقي نفسي فيها اللي هيا (تجارة العربيات)
انا غاوي العربيات من زماااان والكلام دة
انما مش ارووح اشتغل عامل حتة واحد معاهوش شهاادة يقلي اعمل كذا ومتعملشي كذا
ولا انتوا رايكوا اية

والله أنا رأيى وعن تجربتى فى الدنيا انك لازم تشتغل أى شغل يجيلك وبجد بتاخد منه خبره مهما يكون بعيد عن مجال دراستك

يعنى أنا بكالوريوس هندسة قسم اتصالات ومن وانا فى الكلية حابب مجال الكمبيوتر والشبكات ومخبيش عليكم كمان انا كنت داخل الكلية والانجليزى بتاعى فى الضياع التعليم الحكومى بقى بس طبعا نتيجة ان الدراسة فى الكلية بالانجليزى فمستوى الانجليزى اتحسن شوية بشوية مع الوقت غير ان انا كنت بدرب نفسى وفى فترة الدراسة اخدت كام دوره كمبيوتر وشبكات فى فترة التدريب الصيفى وكده

أول طبعا ما اتخرجت فى 2004 مكنتش لاقى حاجه ولو لقيت بفشل فى الانترفيو عشان مفيش خبره لكن بردو كنت بطور نفسى ومش ساكت

المهم لاقيت اعلان فى الجرنال شركة سيارات كبرى تطلب بائعين متكسفتش ورحت وطلعت المصرية للسيارات كلكم عارفنها والمرتب 300 جنية وانت وشطرتك فى البيع والبقشيش كنت بقف على رجلى من 10 الصبح ل 12 بالليل ويدوبك اروح عشان الحق انام واصحى تانى يوم اروح الشغل فضلت فيها شهرين وفى نفس الوقت كنت بدور على حاجة فى تخصصى لقيت اعلان صغير فى الاهرام مطلوب مهندس اتصالات حديث التخرج روحت طلع شركة صغيره بتاعت واحد بيركب سنترلات وكاميرات مراقبة والكلام ده المهم شغلنى ب 300 جنيه وقالى انا هعلكمك ومش عارف ايه ومتبصش للفلوس قلت كويس طلع البيه عايز صبى وسواق كنت بسوق له عربيته وطول اليوم رايح جاى طبعا سيبته وخلعت بعد كام يوم وطبعا كنت على طول اى اعلان فى الجرنال ابعت السى فى

شركة من اللى كنت مقدم فيهم كلمونى ورحت اعمل انترفيو طلعت فى عمارات العبور شركة بيع طابعات واحبار وماكينات تصوير فى الانترفيو الراجل قالى انا عايزك فى المبيعات انت شكلك كويس واسلوبك كويس قولتله انا مليش فى البيع انا راجل تكنيكال قالى لا ولازم تجرب وانا محتاجك قولت اجرب كده كده مفيش اشتغلت بمرتب 500 جنية وكنت اقعد الف على رجلى طول اليوم واسافر اقاليم احضر مناقصات قعدت فيها كام شهر وبعدبن سيبتها

ليا واحد صاحبى مدير محل فى سيتى ستارز اول ما فتح قالى فى محل جديد بيفتح جنبنا بتاع طباعه على تشيرتات وكلام من ده ومحتاجين حد فاهم كمبيوتر وفوتوشوب قولت شغال ونزلت على 700 جنيه قعدت فيها كام شهر وبعدين حصل خلافات مع اصحاب المحل سبت الشغل

من زهقى سافرت كام يوم البلد مع والدى وسبحان الله العربية كانت بايظه وسافرنا من غيرها واحنا راجعين قعدت فى السوبر جيت جنب واحد كان ماسك جرنال الاخبار وانا طول عمرى مش بشتريه انا دايما اجيب الاهرام لاقيت الراجل فاتح على صفحة كلها اعلان لشركة كمبيوتر جديدة بتفتح وطالبه تخصصات كتير اخدت الجرنال من الراجل ونقلت البيانات واول ما وصلت القاهره بعت السى فى طلعت مجموعة شركات بهجت جروب وجولدى عملولنا كذا اختبار وصفصفوا المتقدمين على 40 واحد كنت انا منهم الحمد لله وبدأت معهام بمرتب 1200 جنيه ومقلكوش كنت طاير بيهم ازاى ساعتها قعدت فيها سنتين وكنت دايما مش ساكت وباخد كورسات جديدة والحمد لله بعد فتره بقيت تيم ليدر بس واخدت خبره كويسة فى مجالى اللى انا دارس فيه وبحبه بس مشكلة الشغل انه كان شفتات والموضوع ده متعب جدا اسبوع تشتغل الصبح واسبوع بالليل

مديرى فى الشغل ساب الشركة وراح شركة تانيه اكبر فى نفس المجال هى تعتبر اكبر شركة محليه مصرية فى مجال الكمبيوتر والشبكات وهى وكيل ل ميكروسوفت و DELL و hp طبعا اول لما احتاجوا ناس هناك بعتلى ورحت اشتغلت هناك بمرتب اعلى وعمولات وبدلات ونتيجة لطبيعة شغلى انى كنت بروح اعمل شغل لشركات تانيه زى فودافون وموبينيل واتصالات واريكسون والكاتيل وبنوك ومعظم الشركات العالميه اللى فى مصر فكونت معارف وصدقات مع الناس هناك ومنها شركة عالميه فى القرية الذكية اللى انا شغال فيها دلوقتى اول لما احتاجو ناس كلمونى وعملت مقابلات كتييييييييييير مع مديرين مصريين واجانب عشان مش سهل انك تدخل شركة مالتى ناشيونال ورغم المنافسه مع ناس كتير كويسين لكن الحمد لله ربنا كرمنى بالوظيفة وع الوقت اثبت نفسى اكتر واخدت ثقة الناس واهى الدنيا ماشية

واتجوزت وربنا كرمنى ب كريم دلوقتى عنده سنة وشهرين

طبعا بعد كل ده هتفتكرونى عجوز ابدا انا 31 سنه وفى كمان حاجات كتير بين السطور مكتبتهاش عشان مطولش اكتر من كده لكن الواحد فعلا تعب تعب تعب وبالبلدى اتمرمتط ومش عيب بس كل ده هو اللى وصلنى للى انا فيه ولما الواحد بيقعد يفتكر الحاجات بيفرح انه قدر يعمل كده

ربنا يكرم كل واحد فيكم بالشغل اللى يتمناه ونصيحة اخيره اشتغل المتاح لحد مايجى الاحسن ان شاء الله

m.mostafa80

اقتباس:

---

قلتلو كلو بيبدأ صغير وهو أحسن من القاعده فى البيت على الأقل أجيب مصاريفى

---

النقطة دي
اتكلمت فيها كتير اوي مع ناس اكبر مني(عمي و خالي مثلاً) و نصيحتهم ليا كانت غريبة الحقيقة .. او مش غريبة .. يمكن مش عملية

يعني
اللي يقولي .. مستعجل على اية؟
الخبرة هتيجي بكرة... هو والدك اللي صرف عليك ده كله مش هيقدر يصرف عليك لحد ما تلاقي شغل مناسب او مش هيقدر يصرف عليك على ما تخلص دراسة... كلام من النوعية دي

انا حالياً مبشتغلش الحقيقة و بدرس (دراسات عليا) + بدور على شغل
لكن الوضع مش عاجبني .. لذلك مع اول فرصة هشتغل .. بس خايف اضيع المجهود + الفلوس اللي مدفوعة في اللي بدرسه

اية رأيكم؟؟

اقتباس:

---

النقطة دي
اتكلمت فيها كتير اوي مع ناس اكبر مني(عمي و خالي مثلاً) و نصيحتهم ليا كانت غريبة الحقيقة .. او مش غريبة .. يمكن مش عملية

---

ده طبيعي لأنك أبنهم ومش عايزينك تتبهدل وما الى ذلك ، لكن بجد نصيحة من أخوك لازم تدور (الجميل إن أخك اللى بينصحك عاطل برضوا :D )

(وسؤال خارج الموضوع معلش هو الدراسات العليا عندكم لازم برضوا موقف التجنيد ؟؟؟ )

- أستاذ Conspirator بجد تجربتك جميلة وتُحترم جدا

ودعواتكم ليا علشان عندي مُقابلة بكرة (لسة مكلمني) وأدعولي أنهم ميتلككوش على موضوع الجيش

اقتباس:

---

ده طبيعي لأنك أبنهم ومش عايزينك تتبهدل وما الى ذلك ، لكن بجد نصيحة من أخوك لازم تدور (الجميل إن أخك اللى بينصحك عاطل برضوا :d )

(وسؤال خارج الموضوع معلش هو الدراسات العليا عندكم لازم برضوا موقف التجنيد ؟؟؟ )

---

هههههههههههه
اه لازم للأسف ..

ربنا يوفق الجمييييييييييع انشاء الله

أنا أرجح أن تعمل بدون تخصصك
ناس كتير جدا شغالة فى غير تخصصها وناجحة للغاية
أنا مثلا لا أعمل فى تخصصى وباشتغل فى تخصص مختلف خالص رغم إنى كنت من المتفوقين فى الدراسة الجامعية وفى التخصص
حكاية التخصص دى بقت موضة وراح زمنها خلاص
دلوقتى التعليم للتعليم والشغل لأكل العيش

بالتوفيق

مبدئيا بعتذر عن عدم الرد والمشاركه قبل دلوقتى لظروف مرضيه....


بعتذر للناس اللى فهمت الموضوع غلط....

أنا ولله الحمد بشتغل بقالى 15 سنه ((أه عجوز حبتين يعنى))..!!

وفى مجال بعيد الى حد ما عن مجال دراستى..

والموضوع هدفه انى أقول يا جماعه محدش يقول انا مش هشتغل غير فى تخصصى ...

اشتغل اى حاجه ويا تكمل سا تكتسب خبره حياتيه جديده انا اشتغلت حاجات كتير قوى.....والحمد لله كنت دايما بثبت نفسى ولما أمشى من مكان لمكان أحسن بيفضل الود متصل بينى وبين أصحاب العمل القديم وتهانى العيد وعزومات المناسبات....

إثبت نفسك ولو شغال فى طابونه وبعد كده انت اللى هتحدد مرتبك....

عاوز أقولكوا ان واحد صاحب مصنع فى العاشر بيلف مواتير بيقولى كل الصنايعيه اللى عندى لما يتعوجوا بمشيهم واشتغل مكانهم لانه شغل تقليدى إلا واحد على المخرطه مبيقدرش يكلمه ولو كلمه يلم حاجاته ويسيب المصنع ويقوله مليش نفس اشتغل النهارده....

سألته طب ليه الدلع المرئ ده...

متغوره فى داهيه وتجيب غيره...

رد...ده دكتور فى صنعته ودلعه ده عن استحقاق..وعارف انه متمكن وشغله دقيق جداوبالتالى بيتدلع وانا مضطر استحمله فبالتالى لو كلمته بطريقه متعجبوش يعاقبنى بانه ميشتغلش.....


تخيلوا بقى لما صاحب مصنع وراجل محترم ويقول كده

ونفس الكلام بس المره دى من واحد صنايعى ...

بيقول صاحب المصنع كان يجيبنى ويروحنى معاه فى العربيه ولما سيبت الشغل جالى البيت....


أفتكر كده وصلت...

الشغل اى ما كان مش عيب...المهم تبقى متميز ومتقن لعملك....


كفايه تعرفوا ان يوميه عامل المحاره 140 جنيه وغداء وشاى وعلبه أو علبتين سجائر كمان...يعنى مرتب مدير عام...

ومبلط السيراميك تحجزه قبل شهرين لو دكتور....

كفايه ولا نقول كمان...!!!

اعتقد يا استاذ اشرف ان مافيش حد بيشتغل في تخصصة دلوقتي ويفكر انه يشتغل في تخصصه يبقي مش حيشتغل
بعيد عن الكليات العمالية

انا زهقت من مصر

اقتباس:

---

المشاركة الأصلية كتبت بواسطة doc_semsem

انا زهقت من مصر

---

طب قاعد فيها ليه يا سمسم؟!

أعتقد إن نظرا لصعوبة ظروف الشغل في مصر , صعب قوي إنك تلاقي حد بيشتغل في التخصص اللي درسه

ده لو حصل يبقى إستثناء مش قاعده

بالنسبالي أنا مهندس تخصص ميكانيكا إنتاج , لكن نصيبي جه مع شركات الكهرباء

وحاليا أنا مهندس تصميم في مجال محطات محولات الجهد العالي , يعني برضه مش مجال دراستي خالص

وجه الشبه الوحيد مع دراستي إني بشتغل على الأوتوكاد

استاذ اشرف فتحى انا عاوز ارفع لك القبعة على الموضوعان ده و بتاع الشغل رغم انهم فكرونى بذكريات مش حلوة و مكملتش قريتهم و مكنتش ناوى اشارك

اللى خلانى اشارك بس هو موضوع التخصص لما تشتغل فى تخصصك بيبقى شىء مفيد جدا و بتصقل دراستك و تلاقى نفسك فاهم و نقصك التطبيق

لكن لو مفيش التخصص ده نقعد فى البيت لا طبعا نمسك فى اى شغلة بايدينا و سنانا علشان حاجات كتيير اولهم ان الشغل فى الزمن ده بقى عزيز و لو لقيت النهاردة مش هتلاقى بكرة ثانيهم انك هتتعلم حاجة جديدة و تشوف ناس جديدة و علاقات جديدة و تفتيح سكك ثالثهم من كتر ما هتتعمل مع الناس هتتعلم تقراء البنى ادم كويس و لا بيلف و يدور ولا ابن %#$$^

انا مهندس كهرباء قوى شغال فى مجال توليد و نقل و توزيع الطاقة يعنى فى قلب مجال تخصصى لكن عاوز اسيب المكان اللى انا فيه لاسباب كتيير بعيد عن محتوى الشغل و التخصص لكن تتعلق بالادارة و لو ينفع كنت رجعت شغلانتى القديمة اللى ملهاش علاقة بالتخصص غير انى احمل اسم مهندس

اللى يلقى شغلانة يا جدعان يتوكل على الله علشان اللى ليه واسطة النهاردة مش هيلاقيها بكرة و حتى لو بمرتب قليل انا مهندس و شغال ب 600 جنيه و 12 ساعة فى اليوم و بقالى 3 اسابيع شغال متواصل بدون اجازة و مع ذللك الحمد لله فيه ناس مش لاقيها

اقتباس:

---

المشاركة الأصلية كتبت بواسطة magyver

والله هو دة الموضوع اللي شاغلني اليومين دوول
وعملي قلباان في البيييت
انا لسة متخرج السنادي من اكاديمية كنت بدرس فيها محااسبة
يعني معايا دلوقتي بكالريوس محاااسبة
وانا طبعا معرفش اي حااجة في البطيييخ
انا معدي كدة بظروفهاااااا
فجينا بقي في حوار الشغل انا والدي والجماعة ف البيت
احنا اساسا تجاار كاوتش وانا شغال مع واالدي بس انا عايز حااجة الاقي نفسي فيها وهيا (تجارة العربيااات)
انا الحمد الله غاوي الكلام دة من زمااان ومعارفي كتير دايسين في الحوار دة من زماااان والحمد الله مكسبها حلو
الحاج بقي بيقلي خد كورسااات والحاجات دة وشفلك شغلانة في اي حتة
وانا مش بتاع كورساات ومذاكرة والكلام دة دة اولا
ثاانيا والله الشغل كتيير
قدااامي شغلانة في المينا بتاعت اسكندرية ومرتبها 2000 جنية في الاسبوعين وبتنزل اسبوع اجااازة والاكل كلة عليهم والنوم عليهم وفي فندق كمااااااااان
بس هاتعمل اية بقي في الشغل هاتشيل حاجات يبعتك مشااوير
شغلانة من الاخر متلقش بواحد معاة بكالريووس تجااارة
فربنا يكرمنا ان شاء الله ... وكل وحد يحقق كل اللي هو عايزة

---

بس ياريس من الاخر كده معاك فلوس بتاعتك انت تتاجر بيها اتوكل على الله و كده كده اهلك هينفعوك علشان ايديهم فى التجارة

لو معكش يبقى اقبل اى شغلة لحد متلاقى شغلة تريق بيك او تعمل قرش تعرف تشتغل بيه

انا على فكرة نفسى اخش مجال التجارة لكن مش عارف لانى اتولدت لاقيت اهلى محاسبين و دكاترة و مهندسين و محدش فيهم فكر يسيب مجاله و يتجه للتجارة

اقتباس:

---

المشاركة الأصلية كتبت بواسطة m.osman

m.mostafa80
النقطة دي
اتكلمت فيها كتير اوي مع ناس اكبر مني(عمي و خالي مثلاً) و نصيحتهم ليا كانت غريبة الحقيقة .. او مش غريبة .. يمكن مش عملية

يعني
اللي يقولي .. مستعجل على اية؟
الخبرة هتيجي بكرة... هو والدك اللي صرف عليك ده كله مش هيقدر يصرف عليك لحد ما تلاقي شغل مناسب او مش هيقدر يصرف عليك على ما تخلص دراسة... كلام من النوعية دي

انا حالياً مبشتغلش الحقيقة و بدرس (دراسات عليا) + بدور على شغل
لكن الوضع مش عاجبني .. لذلك مع اول فرصة هشتغل .. بس خايف اضيع المجهود + الفلوس اللي مدفوعة في اللي بدرسه

اية رأيكم؟؟

---

اقتباس:

---

المشاركة الأصلية كتبت بواسطة m.osman

اشتغل شغلانة شايف نفسي فيها

انا كنت على وشك بل اشتغلت بالفعل business english instructor في شركة كبيرة ..
بس للأسف بعد فترة .. ملقتش نفسي في الشغلانة خالص
حسيت اني بضيع وقت

---

ازيك يا باشا انا على فكرة معجب بردودك رغم انى مقبلتك ولا عمرى دخلت معك مناقشة فى اى موضوع

حكاية مش لاقى نفسك فيها ماشى مقولش لا بس المفروض متسبهاش لحد ما تلاقى غيرها

بس شكلك سبتها و بتعانى من وقت فراغ و حكاية تضيع المجهود و الفلوس فدى سيبها على الله ربنا هو اللى بيكرم

فيه فكرة صغيرة :: انك ممكن تدى دروس لزميلك اللى متخرجوش من الكلية منها شغلانة ممكن تسيبها فى اى وقت و تستفيد من الوقت

شوف سنتر او المكان اللى كنت بتاخده فيه كورسات و ربط معه و خصوصا اننا داخلين على موسم امتحانات و بالتوفيق

اقتباس:

---

المشاركة الأصلية كتبت بواسطة m.osman

m.mostafa80
النقطة دي
اتكلمت فيها كتير اوي مع ناس اكبر مني(عمي و خالي مثلاً) و نصيحتهم ليا كانت غريبة الحقيقة .. او مش غريبة .. يمكن مش عملية

يعني
اللي يقولي .. مستعجل على اية؟
الخبرة هتيجي بكرة... هو والدك اللي صرف عليك ده كله مش هيقدر يصرف عليك لحد ما تلاقي شغل مناسب او مش هيقدر يصرف عليك على ما تخلص دراسة... كلام من النوعية دي

انا حالياً مبشتغلش الحقيقة و بدرس (دراسات عليا) + بدور على شغل
لكن الوضع مش عاجبني .. لذلك مع اول فرصة هشتغل .. بس خايف اضيع المجهود + الفلوس اللي مدفوعة في اللي بدرسه

اية رأيكم؟؟

---

انت من وظيفه بعيد عن مجالك مش هتديلك خبره فى مجالك
لكن هتديك خبره عامه فى الحياه والتعامل مع كافه انواع البشر وصدقنى والله ماعيب انى اشتغل اى وظيفه مدام مش حرام ولاعيب

:stink[1]::stink[1]:
بلاش تقول انك عايز تشتغل فى مجال تخصصك بس
لان الحياة العملية غير الكلام
ساعات تلاقى مجالك فى الشغل مليان مشاكل يخليك تكرهه
فجرب احسن وبعدين احكم على شغلك