ينفع أزود حجم الموتور نفسه من 1400 ل1600

**MOTORULE** · 20-12-2010 10:14 PM

أنا معايا فيات تيبو ال1400
بقلب النت من كام يوم لقيت أن مقاسات البستم و عمود الكرنك بتوعها مشتركين في حاجات كتير مع موتور الماريا و الستيلو ال1596 سي سي(ماعدا سفر البستم طبعا)
فعايذ أعرف ينفع أغير عمودين الكرنك مكان بعض ولا لا
ولو ينفع هيبقي لازم تتغير حاجات كتير ولا لا

**x_gomgom** · 20-12-2010 11:02 PM

موضوع انك تزود سعه الموتور ميكانيكياً ممكن لكن المشكله لو عربيتك انجكشن انك تظبط الحساسات على القرايات الجديده....
لانك هتحتاج كميه هواء و بنزين مضغوط اكتر ودا عايز الحساسات تتقبل القرايات الجديده.....
هي ليها حسبه معينه على الاساس دا ممكن تعرف اكبر سعه ممكن توصلها باستخدام نفس البلوك اللي عندك...
انا عملت الموضوع دا في البولونيز عندي بس للاسف بقت سفاحه بنزين (غيرت كرنك و البساتم و صرفت هوالي 4800 جنيه)

**kamalsalem** · 20-12-2010 11:06 PM

كله بيتخرط يا باشا... بس لا أنصحك... اشتري مكنة جديدة وخلص نفسك... عشان الاجزاء الجديدة هتكلفك تمن مكنة

**MOTORULE** · 20-12-2010 11:32 PM

نورتوني و الله يارجالة
أول حاجة أنا كاربيراتير و العربية أصلا فاضية لا باور و لا أنجكشين ولا أي حاجة خالص ممكن تضايق العملية دي
تاني حاجة أنا عايز أغرف الكرنك ده بالذات هيحتاج خراطة أو تعديل في البلوك ده بالذات
و كمان هحتاج أغير أيه بالظبط زي مثلا وش السلندر و الكامة الكاربيراتير وكده يعني
و موضوع تغير الموتور نفسه هو فكر محترم طبعا
بس صعب عليا لأني كاربيراتير لو جيت أشتري موتور جديد هطمع بقي و أجيب أنجيكشن و غير الضفيرة و أطلع و أنزل و عوم فراشة و علي ضهرك
أنما موضوع ال1596 في الخفيف كده لما أجي أعمل عمرة
ولا أيه رأيكوا

**usama735** · 23-12-2010 01:13 AM

الفرق فى مقاس البستم فقط 86.4 مم .............................وشكرا

usama735@yahoo.com

**heshamzaky** · 23-12-2010 01:56 AM

طيب يا باشا لما أنت معاك تيبو مش بتدخل رابطة التمبرا لية أنت عارف اللينك و لا لآ http://www.nilemotors.net/Nile/189802-a-60.html

و الاسهل بمنتهى السهولة بما ان عربيتك مش أنجيكشن أشترى موتور 1600 سى سى حا يركب بمنتهى السهولة مفيش حاجة شيل و حط شوية حاجات صغيرة جدا الى حا تتركب و الموتور لو لعبت فية صدقنى انسى أن اى خراط يعرف يعمل الى انت عاوزة

**pro_samir** · 23-12-2010 08:13 AM

الخرط بيكون ليه حدود وإلا فارغة الموتور ممكن تتكسر والله أعلم

**heshamzaky** · 23-12-2010 09:52 AM

بص با باشا الكلام دة حا يبقى فى الخيال و علشان تعرف طقم الاسطوانة و الديسك بتوع ال 1400 أصغر من بتاع ال 1600 سى سى قولى حا تتصرف أزاى حا تعدل ازاى

**MOTORULE** · 24-12-2010 02:48 PM

المشاركة الأصلية كتبت بواسطة heshamzaky

طيب يا باشا لما أنت معاك تيبو مش بتدخل رابطة التمبرا لية أنت عارف اللينك و لا لآ http://www.nilemotors.net/nile/189802-a-60.html

و الاسهل بمنتهى السهولة بما ان عربيتك مش أنجيكشن أشترى موتور 1600 سى سى حا يركب بمنتهى السهولة مفيش حاجة شيل و حط شوية حاجات صغيرة جدا الى حا تتركب و الموتور لو لعبت فية صدقنى انسى أن اى خراط يعرف يعمل الى انت عاوزة

المشكلة أن اللي أعرفه أن كتير من المواتير الأستيراد بتحطها من هنا و مفيش كام شهر تلاقيها محتاجة عمرة
يعني زي البطيخة ده غير حوارات المرور اللي بأمانة معرفش عنها حاجة