اعتمادية بروتون ( تقرير بعد الماءة الف كيلم الاولى لسيارة بروتون جن 2 اوتوماتيك 2008
السلام عليكم ورحمة الله وبركاته
الاخوه والاخوات الاعضاء الكرام
طبعا اغلبكم عارفين اني من ملاك سيارات بروتون
جن 2 اوتوماتيك موديل 2008
ولكن اسمحولي هكرر بعضا من كلامي ومعلوماتي لافادة الاخوه الاعضاء الجدد
تاريخ شراء السياره كان يوم
20 / 8 / 2008
- اسلوب القياده
سرعات عاليه اغلب الاوقات وعلى طرق سريعه دائما وقليلا داخل المدن
يعني العادي بيبقى 110 كم ولكن الغالب 140 وطالع واحيانا 180 كم في الساعه ولفترات كمان ممكن توصل لساعه او ساعتين على ال 140 وال 160 كم
طبعا الوصول للسرعات دي بيبقى بالكيك داون احيانا ولكن مش كتير
يعني بخلي العربيه تاخد راحتها في السرعات ومش بجبرها تجيب السرعه دي لو اتجاه الهوا مثلا ضدي
وكتير داخل المدن باعمل كيك داون على ار بي ام 6000 مثلا ولكن مش عمال على بطال
المطبات بأه بكون حريص جدااا فيها والبلاعات ولكن طبعا لازم احيانا الواحد بياخدله كام مطب عفويا وبلاعتين كده
-نوع البنزين 92 دااااائما وابدا مابحطش غيره
مره جربت ال 95 ماحسيتش بأي فرق غير في جيبي فقط
-نوع الزيت جربت مره موبيل وان مع اني كنت مجربه مره قبل كده في سيارتي الاولى الافيو ولكن لقيته من اسوأ الزيوت اللي ممكن تستعملها ماكملش 5000 كم وصوت الموتور بأه عالي جدا
ورجعت لشيل الترا
او الاصفر احيانا
بغير الزيت ال 10000 كم كل 7500 كم فقط
والاصفر لما بحطه بغيره على 3000 كم بالكتير
زيت الفتيس ايضا بغيره شل ولكن بغيره كل 30000 كم مش 40000 كم زي المصنع مابيقول
- الصيانات كلها بعملها زي ماقال المصنع في معادها ولكن بعد ال 60000 كم بدأت اعملها في ورشة فيصل بقطع غيار اصليه
زي مثلا فلتر الينزين بجيب الاصلي بتاع النوبيرا
البوجيهات اخر مره جبت الدينسو وكنت بجيب الان جي كيه
التيل جربت كل الانواع واسؤهم الريمسا واحسنهم الي في التوكيل ب 240 جنيه
ولكنه مش توب بردو
الطنابير عندي احيانا بتعمل ريجه خفيفه ولكن بتروح تاني لما بغسل العربيه
-قطع الغيار اللي تغيرتلي في الضمان .
مفتاح مرايه في صيانة 1000 كم لانه كان تقيل شويه
كوبلن يمين وجلدة توازن ( الكوبلن لان الفني وهو بيركب جلدة التوازن اللي كانت جايه ناقصه في العربيه اصلا بوظ الكوبلن ) والكلام ده كان في صيانة ال 10000 كم
رشيت الكبوت بوهيه في صيانة ال 20000 كم عشان كان بيقشر وحده
رمان بلي خلفي والسره بتاعته في صيانة 3000 كم
مساعد امامي يمين في صيانة ال 40000 كم
مواتير فوانيس اماميه في صيانة ال 40000 كم
مفتاح زجاج رباعي في صيانة ال 60000 كم
وشكرا للضمان اللي انتهى مني لحد كده
كان نافعني طبعا
بعد الضمان مشيت على جدول الصيانه لحد يومنا ده زي مابيقول
- حالة السياره الان في تاريخ 20 / 12 / 2010
يعني بعد استعمال سنتين واربع شهور
السياره زي ماهي صدقوني
الحمد لله
اللهم بارك لي فيها واعطني خيرها واكفني شرها ويبعد عنها وعني اي سوء
اتمنى تدعولي
- عموما انا كنت متعمد اني اجرب السياره دي واعتماديتها لاني فعلا اخترتها مع اني كان قدامي اختيارات اغلى واضمن على كلام الناس
معلومات تانيه يمكن تفيد حد
انا مش مأمن على عربيتي
انا اول ماشتريت العربيه ذبحت حاجه لوجه الله ووزعتها
واخيرا انا بحب الجن 2
ولكن كان ينقصها تلافي العيوب اللي فاتت
ويزودولها
فتحة السقف
خامات احلى من الداخل
بوهيه افضل للسياره
فرامل اقوى من دي مع ان دي مش وحشه ويعيبها التيل الموجود حاليا
فوجات اجمل واجمد
مرايات جانبيه رؤيتها افضل
فرش جلد
ولاعة سجاير وطفايه لاني مدخن
قطع غيار اصليه وارخص من كده ومتوفره اكتر من كده
اخيرا
ربنا يباركلكم في عربياتكم ويديكم خيرها ويكفيكم شرها
تحياتي للجميع
