الموضوع: استشارات مطلوبه من خبراء 128

المشاركة الأصلية كتبت بواسطة ameirnabel1977

يا جماعه انا كان فى شويه حاجات عايز اسأل عليها وياريت حد يقدر يفيدني.
اولا:
انا كنت فكيت تانك البنزين علشن كان اتخرم والحمد الله لحمته وركبته تاني المشكله بقي ان عداد النزين مش شغال وانا مش عارف اعمل ايه.

روح لكهربائي يظبط السلوك بتاعة العوامة لأنها مش راكبه .. أو راكبه غلط .. ودي مشكلة مش حتاخد 5 دقائق وبسيطة .


ثانيا:
في صوت حكه كده بسمعها من ناحيه العجل اللي قدام لما رحت للعفشجي قالي الاتي انا العربيه موديل 84 بس راكب فيها فتيس 5 غيار فلازم اغير الميزان بتاع العربيه بواحد بتاع عربيه جاند لوكس لان الميزان هو اللي بيحك فى الفتيس.
انا بصراحه مش مقتنع علشان انا من ساعه ما اشتريت العربيه وهي فيها الفتيس والميزان زي ماهما وصوت الحكه ده لسه طالع من اسبوعين بس فياريت لو حد يعرف ايه السبب يفيدني.

صوت حكه ولا خبطة لما تنزل في المطبات .. على العموم الميزان في موديل 90 فيما فوق بيختلف عن الموديلات الأقل .. لو صوت خبطة يبقى فعلاً الميزان بيخبط في الفتيس .. لو صوت حكة في المشي المستمر يبقى فيه حاجة تانية .

ثالثا:
العجل اللي ورا اتمسح تماما وانا مش عارف ليه هو انا عندي العجل اللي ورا قافل شويه ( على شكل حرف V) بس مش جامد يعني وانا اما ركزت فى العربيات التانيه لقيت اغلب 128 العجل اللي ورا عامل كده والكاوتش بتاعهم زي الفل فهل ان العجل قافل هو اللي عمل كده ولا فيب حاجه تانيه.
انا عارف اني ممكن اعمل زرجينه للعجل بس فى ناس كتير فى المنتدي هنا قالوا ان زرجينه لو متعملتش كويس ممكن تبوظ الدنيا اكتر علشان كده انا قلقان منها.

العجل القافل شوية ده دليل أن العفشة متربطة .. ولما العربية بتمشي على سرعة العجل بيفتح .. ومسح الكاوتش ممكن يكون أن الكاوتش قديم أو محتاج ظبط زوايا لو كان فيه تكرار لمشكلة أن الكاوتش بيتاكل .. بالنسبة أن تعمل زرجينة أو متعملش فده اللي بيحددة بتاع الزوايا .

رابعا: ( وياريت ما كونش طولت عليكما)
انا الشكمان عندي كان مفكوك من الوسط رحت ركبته ( اشتريت 2 خطاف دراع طويل ) المشكله بقي ان من وقت ما ركب وانا فى بعض الاحيان بسمع صوت الشكمان وهو بيخبط فى شاسيه العربيه من تحت فالمفروض اعمل ايه.

تروح لبتاع الشكمانات تاني يراجعلك على اللي ركبه ويخليه محكم وميبقاش سايب .. وخليه يقرط على المسامير اللي عند الفرن بالمرة .