الموضوع: سبيرانزا 516 مو 2011

[frame="9 80"]بصراحة العربية عاملة لحد دلوقت معايا 108 كيلو ....لسه مش عارف اديلك عنها تقرير مفصل بس بحد دلوقت مافيش عندى ملاحظات غير التالى :


1 - فيه صوت من ورا يمين زى مايكون فيه حاجة عايزة تتربط او زى كاوتشات ناشفة شوية

2 - الكلاكس ...الاستجابة بتاعته لضغطة الايد مش حلوة خالص(قالولى ان ده العادى فى الاسبيرانزا مش عربيتى بس )

3 - السنتر مش بيقفل عند سرعة 40 زى ماكنت عارف ( احتمال الـ LS ) مافيهاش الاوبشن ده بس سهل جدا انه يتعدل فى التوكيل او حتى عند اى كهربائى نص نص . (انا ناوى اخليهم يعملوهولى يقفل مع اول فرامل ) مش عند سرعة 40

4 - عايزة ظبط زوايا

بصراحة طبعا بما انها عربية زيرو - المفروض مايكونش فيها الحاجات دى و المفروض انها تطلع مافيهاش الهوا

بس برضه انا واقعى : بما انى جايب عربية عاملة 60.000 جنيه وتقفيل مصرى .... يبقى الحاجات دى عادية و سهلة وماتخلنيش اتضايق لان برضه العربيه مافيهاش حاجة تانية تزعل بصراحة

العربية واسعة جدا جدا جدا

وانت سايق من جوا العربية والله ساعات ممكن تنسى انك راكب اسبيرانزا - يعنى ممكن ف لحظة تتخيل انك راكب عربية زى تويوتا - متسيوبيشى - كده يعنى

كماليات العربية ممتازة

الخامات البلاستيك اللى جوا ( مقابض الفتح - زرار السنتر اللى فى المقبض ) جيدة وليست جدية جدا

الكاوتش من نوع جيد جدا - - - - goodyear ( بس حط فيه نيتروجين و خليه منفوخ على 28 او 30 )
لان على القايم مكتوب ان العربية لما يكون فيها 3 افراد تخللى ضغط الهوا للعجلتين اللى قدام 33
والضغط للعجلتين اللى ورا 30
ولما يكون عدد الافراد اربعة او اكتر يكون ضغط اللى قدام 36 واللى ورا 34

الشماسة بتاعة الفرد اللى جنب السواق لما تنزلها تلاقى ليها باب لما تفتحه تلاقى مرايا ليه كشافين شيك اوى على الجنبين

دى موجود مثلا فى الاوكتافيا و طالع ( حاجة جميله بجد )

الباور بتاعها تحـــــــــــــــــــــــ ــــــفة بجد و احسن وانعم و مناورته اعلى بكتيرررررررررر من الفيرنا

الصاج حقيقى تقيل و محمل

الكاسيت تحـــــــــــــــــــــــ ـــــفة و بيشغل اى Extension زى الـ ( AMR - WAV - MP3 ) و الراديو بتاعه حلو جدا
العربية فيها 4 سماعات مش 6 زى الـ 516 التانية بس صوتهم حلو جدا جدا جدا وكفايه اوى بصراحة

العربية عالية عن الارض ودى حاجة حلوة جدا فى بلدنا لان الفيرنا كانت بتحك فى اى مطب حتى وانا ماشى لوحدى ماعيش مراتى وولادى

الـ516 بصراحة حتى لو ركبت 3 ورا ....... ولا الهوا....بجد دى ميزة حلوة اوى عاجبانى اوى لانى كنت بابقى متعكنن اوى لما احك فى مطب وانا ماشى .

الشنطة واسعة جدا جدا جدا بس بصراحة لما باجى اقفلها ساعات لازم اقفلها اكتر من مرة عشان تتقفل معرفش ليه بس حاخليهم يشوفوها برضه فى مركز الصيانة

وانا عن نفسى شارى من وكيل . بصراحة كلمتهم فى الحاجات اللى مضيقانى او عليا ليها تعليق حجزولى فى مركز الصيانة بكرة ان شاء الله الساعة 9 و نص وانا شايف ان دى استجابة جيدة و سريعة ( لما اشتكى الثلاثاء يقولولى تعالى الاربعاء) ومش مشكلة لو كنت رخصت او لسه يبقى دول ناس محترمة ( عموما مش حاستعجل الحكم اللا بعد مايشوفوا التعليقات بتاعتى و يصلحوها )

عموما العربية لحد دلوقت تقييمها بالنسبالى 75%
اعتقد ان ده تقييم كويس لعربية زيرو صينى تقفيل مصرى سعرها 61000 جنيه[/frame]

[frame="4 80"]زى ماوعدتكم انى حانقل لكم تجربتى فى مركز الصيانة النهاردة .... ادينى حاقولكم ايه اللى حصل بكل صراحة

انا وصلت هناك الساعة 9:45ص واول ماوصلت دخلت على مهندس اسمه/محمد عبد العال ( فى منتهى الذوق)
طلع معايا شاف العربية فيها ايه وانا باشتكى من ايه فيها و كتب ملاحظته فى ورقة صفراء ودخل العربية وعطى اوردر انهم يشوفوا فيها ايه و طلع معايا مهندس تانى اسمه/مهندس هشام ( شاب صغير بس ذوق اوى ) وفعلا ساق العربية وانا جنبه وسمع الصوت اللى مضايقنى ( اللى هو تقريبا كما اعتقد انه مساعدمحلول شوية و عايز يتربط ) وجرب الكلاكس وقاللى انه كده طبيعى لانه الكلاكس مش جلد لكنه فيبر و لما استخدمه اكتر شوية حينعم معايا بس وعدنى انه يحاول يخليهولى احسن شوية لحد ماينعم معايا
وسالته عن ان السنتر مش بيقفل على سرعة 40 كيلومتر/الساعة ( قاللى انهم لغوا الاوبشن ده من 2010) لان فيه ناس كتير اشتكت ان اللى بيبقوا راكبين ومش عارفين ان السنتر مقفول كل مايجوا يفتحوا الباب ويلاقوا المقبض معلق معاهم يتعافوا عليه ف يكسروه - وقاللى كمان ان الاوبشن ده بيحمل على الكارتة الكهربائية كتير - المهم انهم لغوه ومطلعش فيه عيب ) وكنت عايز اظبط زوايا لانى كنت حاسس ان العربية بتحدف يمين شوية صغيرين

المهم

أخدوا منى العربية و رحت قعدت على كافيه ساعة و ربع و بعدين رحتلهم لقيت العربية لسه ماتعملش فيها حاجة ( بصراحة كان المركز زحمة جدا اليوم ده بجد) فلما سالت قالولى لسه والله مافيش ونش فاضى والزوايا بعد الساعة 3 العصر

مشيت وقولتلهم لما تخلصوا كلمونى اجى اخدها

كلمونى الساعة 4 الا ربع قالولى العربية خلصت رحتلهم .. وصلت على الساعة 4 و نص تقريبا

طلعت اجرب العربية لقيت التالى :
الصوت اللى فيها من ورا زى ماهو
التارة معوجة يمين اوى

لفيت و رجعتلهم واتكلمت معاه بهدوء بصراحة و الناس بجد كانوا ذوق اوى وبلغونى ان فيه مهندس اسمه مهندس/طارق ) مدير المركز) هو اللى جربها و قال ان خلاص مافيهاش حاجة

المهم بصراحة عدلولى التارة بتاعة الدركسيون و بقت 100 فل و عشرة ( كانت التارة هى اللى معوجة مش الزوايا عايزة تتظبط)

و المهندس/هشام بصراحة كان ذوق اوى وطلع معايا تانى عشان يتأكد ان الصوت لسه موجود ووعدنى انى اجى فى يوم تانى وانه يقف على العربية بنفسه وقاللى : ( انا اسف بجد بس النهاردة كان فيه 6 عربيات تغيير سير تقسيمة و 4 عربيات حل مواتير )

قال لى والله انا بجد اسف ووعد منى انك فى الميعاد الجاى اللى حتيجى فيه انى اقف على العربية ينفسى وحاطلعهالك من هنا مافيهاش الهوا - انا عارف فيها ايه وحاعملهالك بنفسى و اتأسف لى تانى وقاللى انا مش عايزك تزعل بجد بس

رحت للمهندس/محمد عبد العال ( مهندس الاستقبال ) اخد لى ميعاد يوم الاتنين القادم

بس بصراحة وانا راجع بالعربية لقيتها انعم من امبارح بكتير بصراحة والعربية بقت استجابتها اكبر .

ولقيت حاجة صغيرة بس ماكانتش باينة اللا لما سقتها بالليل النهاردة ( الكشافات الامامية نورها حادف شمال اكتر من اليمين )

ودى حاجة بسيطة ممكن اى كهربائى حتى يعملها ( الكشافات عايزة تترجلش و تيجى يمين شوية بس )

بس برضه حاقولهم عليها لما اروح مركز الصيانة تانى ان شاء الله

الملخص

بالرغم من الحاجات اللى انا لقيتها فى العربية ( حاجات بسيطة كلها عيوب تجميع من الشعب المصرى العريق )

العربية بصراحة تحـــــــــــــــــــــــ ــــــفة وكل مدى ما بتبقى انعم على الطريق بصراحة وكل ما الكاوتش بيمشى على الطريق اكتر كل ما بيبقى احلى و انعم و اطرى

العربية عاجبانى لحد دلوقت بس كنت اتمنى انى مالاقيش عيوب التجميع دى فيها ( كانت حتبقى بجد 10 على 10 )

بس البركة فى الشعب المصرى المتفانى فى العمل[/frame]

ربنا يخليك يا باسم باشا عامل ايه واحشنى .... انا قولت برضه فينك

كنت مستنيكى تباركلى من زمااااااان

عقبالك يا رب كده و نفرح لك ان شاء الله لما تجيب ال bmw

alshahba

ربنا يعوضك خير عن عربيتك و يرزقك احسن منها ان شاء الله

ومتشكر ليك