تقييم التيجو بعد صيانة 5000
بسم الله الرحمن الرحيم
فضلت اني ما تكلمش عن العربية غير لما ادي نفسي فرصة الاول عشان احكم عليها صح وما ابقاش متسرع في حكمي من حيث اني ابقي متحيز عشان من ملاكها او بهاجمها عشان فيها حاجة مضايقاني ، عشان كده استنيت لغاية ما كملت بالعربية 5000 كم و تقريبا 3 شهور، جربت العربية في كل الظروف جوه البلد علي طريق سفر...الخ
نبدأ التقييم:
1- الشكل الخارجي : الشكل الخارجي كويس وابعاد العربية في السواقة كويسة جدا ، عندي 3 اصحابي من دول مختلفة عجبتهم تصميم العربية الخارجي جدا، وعموما هو الشكل االخارجي بالنسبة لي مناسب جدا
2- داخليا: داخليا العربية نسخة من الراف 4 موديل 2003 بس مع الفارق ان المواد المستخدمة في الراف 4 عاملة شكل حلو انما اعيب علي التيجو ان المواد المستخدمة فقيرة جدا وبصراحة كانت محتاجة تبقي انضف من كده حتي لو العربية هتزيد 3 او 4 الاف جنيه،
- العربية فيها اماكن تخزين كتيرة عند السواق او في الشنطة.
- وجود ولاعة في الشنطة مخليني عاوز اجيب تلاجة صغيرة للشنطة بس لغاية دلوقتي ملهاش اي استخدام عندي
- عدم وجود حامل كوبيات امامي عند السواق من السلبيات في العربية
- الكراسي الامامية كويسة ونوعا ما مريحة إنما الكنبة الخلفية صغيرة نوعا ما ، بس مش فارقة معايا قوي لان تقريبا مفيش حد بيركب ورا غير بناتي (3 و 5 سنين)
- الشنطة كبيرة جدا، يعني تشيل وانت مستريح، شلت فيها 6 سجاجيد كبار مطبقين وخدتهم كلهم
الكاسيت: الكاسيت كينوود بيشغل كل حاجة Mp3 شرايط شغال، USB و AUX والعربية كانت مجهزة بشاشتين في الكراسي
السماعات: السماعات كانت سيئة وغيرتها بسماعات سوني بس طبعا لو بتدور علي البيز فا هو مش اد كده والحل طبعا بازوكا في الشنطة بس مش داخله دماغي دلوقتي وبدور علي حل تاني
التابلوه: العدادات كويسة بس يعيبها الاضاءة الضعيفة صباحا، يعني اللمبات في النور ممكن ما تعرفش ان في باب مفتوح عشان مش واخد بالك ان في لمبة منورة
انوار السيارة الداخلية ، في 3 انوار، نور امامي عند السواق، نور صالون ونور للشنطة والتلاتة كويسين ما فهومش اي مشاكل
فتحة سقف: عن نفسي فتحة السقف ما بتفرقش معايا كتير بس العربية فيها ميزة ان فتحة السقف بتقفل اول ما تبطل العربية طبعا عشان اللي بينسوا زي
الزجاج كهربا، مع وجود وحدة رفع ، ميزة وعيب، يعني ميزة لو بتنسي تقفل الزجاج، عيب لو عايز تسيب جزء من الزجاج مفتوح عشان التهوية
العزل: العزل كويس مش سوبر بس احسن من عربيات كتير زي الهيونداي
أداء السيارة:
الموتور (2000 سي سي ) الفتيس اوتوماتيك: أداء الموتور جيد بالنسبة لحجم العربية ، النقلة الاولي ضعيفة شوية بس اداء العربية علي النقلة التانية والتالتة جيد جدا وسحب اكتر من رائع إنما علي الرابع السحب بيقل جدا
- الفتيس تقيل شوية ومش ناعم
- جربت العربية لغاية سرعة 150 كم علي طريق الاسماعيلية، التسارع جيد وثبات العربية جيد جدا ، وعموما انا مش بحب اجري اكتر من 120 بس كنت بجرب العربية.
- الفتيس الاستبترونيك: تمت التجربة في الاوتوستوراد اكتر من مرة، جيد جدا في الجري مع اي عربية طبعا في التاني والتالت، بصراحة مجبتش بيه اكتر من التالت عشان الطريق ما بيسمحش بس عموما انا ما بستعملوش إلا نادرا وكان فيه واحد مهندس نصحني اني ما انقلش من اوتوماتيك لمانيوال والعربية ماشية، لازم العربية تكون واقفة عشان الفتيس ما بيستحملش.
- استهلاك البنزين: جوه البلد تقريبا من 150 ل 180 كم في الصفيحة، علي السفر من 180 ل 200 : استهلاك عالي شوية بس ديه ضريبة ال 2000 سي سي (الله يرحم الفيرنا الصفيحة كانت بتعمل معايا من 250 ل 280)
- الفرامل: ما واجهتيش اي موقف والحمد لله استدعي اني ادوس فرامل جامد عشان اقيم اداء الفرامل بس في الفرامل العادية هي كويسة بس ما اقدرش احكم عليها قوي ولا علي ال ABs لأنو ما اشتغلش معايا ولا مرة
التكيف : العربية اشتريتها في شهر سبتمبر، يعني كان الحر الشديد قوي خلص، بس كان في كام يوم حر شغلت فيهم التكيف، الاداء جيد يعني العربية بتاخد وقت برضه عشان تسقع (المساحة الداخلية للعربية كبيرة) يعني نقدر نقول انه مش ضعيف بس مش زي الهيونداي ولا التويوتا. عموما الصيف اللي جي هو اللي هيحكم لان العربية هتبقي معايا من اول الصيف
العفشة: العفشة مش ناعمة بس مقدرش اقول انها ناشفة قوي، بس في السفر ادائها احسن من جوه البلد، واحساسك بيها بيقل علي الطرق الطوالي، وادينا بندور علي حل ليها (بعد تدوير ولف لقيت مساعدين مونرو رقمهم TS 37199 دول بيركبو مكان المساعدين بتوعها انا عندي مقاسات المساعدين المونرو بالمللي لو حد عنده مقاسات المساعدين التيجو يا ريت يبعتهملي، بس المشكلة اني لما رحت التوكيل بتاع مونرو قالولي احنا مش بنجيب النوع ده عشان معلهوش طلب :dzey:انا كنت عاوز اشتري مساعد واحد عشان اجرب المقاس دلوقتي الحل اني اشتري الاتنين من بره وبختك يا ابو بخيت، هو تمن الواحد 50 دولار من غير شحن ولا جمارك، والمساعدين ديه غاز علي زيت يعني ما تتوقعوش انها هتبقي ناعمة قوي بس اكيد هتبقي احسن من اللي راكبة فيها)
العفشة بتحتاج تتربط كل فترة، اول ما العربية كانت معايا كانت كويسة علي صيانة ال 5000 كانت فعلا محتاجة تتربط، صيانة 5000 بيربطوها
ارتفاع العربية عن الارض: ديه من اهم مميزات العربية، مرتفعة جدا عن المطبات والبلاعات والارصفة والطوب وكل ما تتمناه في الشارع المصري، حتي لو مركب تلاتة ورا، برضه العربية عالية عن الارض
سلبيات السيارة الاخري:
1- التقفيل: سيء جدا في فروق واضحة في التقفيل الداخلي، الابواب بتقفل بصعوبة، كاوتش الباب الخلفي بيسرب مياه، كاوتش فتحة السقف بيسرب مياه
2- مقابض الابواب الخارجية تقيلة قوي يعني بناتي الصغيرة ما بتعرفش تفتح الباب من بره
3 - صوت الموتور عالي جدا خصوصا والعربية لسه برده ، بعد كده الصوت بيبقي مقبول شوية
4- أول مرة اشوف تكيف ممكن يشتغل والموتور مش داير :H_angry[1]:
5- تيل الفرامل بيصفر علي السرعات البطيئة (ناوي اغير التيل بأي حاجة نضيفة - لو حد عنده اقتراح يا ريت يقول)
6- شداد فتحة تانك البنزين تقيلة جدا وباب التانك بيفتح بصعوبة
7- جهاز إنذار ملوش اي لازمة وصوته واطي جدا وما فهوش حساس اهتزاز يعني العربية اتكسر الزجاج واتقلبت والانذار نايم في سابع نومه :36_1_50[1]:
التعامل مع التوكيل:
اتعاملت مع التوكيل في صيانة ال 1000 وال 5000 ابو الفتوح فرع العباسية
في صيانة ال 1000 قولتلهم علي الابواب وظبط الزوايا وصوت الموتور ، قالولي هو صوت الموتور كده وهنعملك الابواب والزوايا، النتيجة الزوايا ما فرقتش كتير، وكنت متوقع كده والابواب عملوا اتنين وسابولي 2 تذكار
في صيانة ال 5000 قولتلهم علي صوت الموتور (غلاسة) برضه نفس التعليق بس المرة ديه قالوا هنشيك علي الموتور والشكمان، وقولتلهم علي كاوتش الباب وفتحة السقف اللي بتسرب مياه وتيل الفرامل بتصفر علي السرعات البطيئة، النتيجة صوت الموتور زي ما هو كاوتش الباب بقي تمام، الفرامل زي ما هي ، فتحة السقف بدل ما كانت بتسرب نقط صغيرة بقت اكنها مش موجودة
تاني يوم رحتلهم وقولتلهم عليها راحوا من غير كلام مغيرين كاوتش فتحة السقف ومظبطين البابين اللي كانوا سايبنهم في صيانة الالف
عموما انا رحت التوكيل 5 مرات، 3 مرات الصيانة وكاوتش فتحة السقف ومرتين قبل ما اشتري عشان اسأل علي العربية وفي الخمس مرات ما لقيتش حد بيتخانق ولا بيشتم ولا حاجة
موقف العرببة كانت اكتر من توقعاتي:
- كنت بجري في شارع المرغني بعد نادي هليوبوليس في اتجاه المرغني وبعد فتحة صلاح سالم في اليو تيرن للي جي من المرغني عاوز يلف، المهم ان عند اللفة ديه واحد كان في اقصي اليمين راح كاسر مرة واحد عليه وبسرعة جامدة رميت شمال راح الكاوتش الشمال الامامي خابط في اخر رصيف اللفة ولقيت اجزاء من اسمنت الرصيف بيطير علي الزجاج الامامي ، طبعا قولت بس يا ريس الجنط راح والكاوتش راح وربنا يستر علي باقي العربية
ركنت العربية ونزلت وركبي بتخبطرفي بعض، ببص علي الكاوتش سليم زي الفل، الجنط سليم زي الفل، العفشة الحمدلله ما حصلهاش حاجة
طبعا الحمد لله وحده علي ان العربية ما حصلهاش حاجة بس انا كنت متاثر قوي بالهجوم علي العربيات الصيني وان اي خبطة تخلي العربية تتطبق والجنط اللي بيتكسر والكلام ده
- اتحطيت في موقف اني اجر عربية لادا والحمدلله أداء العربية اثناء الجر كان كويس جدا
موقف العربية فيه كانت اقل من توقعاتي
- في المطالع اداء العربية بيقل جامد خصوصا علي الرابع وبدوس كيك داون واحرق عشان اعلي ال RPM عشان اعوض ضعف الاداء
الملخص:
العربية جيدة ، أدائها جيد وكماليتها جيدة جدا، العيوب يمكن التغاضي عنها وما فيهاش اي حاجة قاتلة
التعامل مع العربية مش انها عربية شيروكي او باجيرو، بس اتعامل مع العربية اكنها عربية سيدان بس عالية عن الارض وممكن تطلع بيها علي الرصيف ميزة كبيرة في الشوارع المصرية وخصوصا في الركنة
يا رب اكون افادتكم وانا مستعد لاي سؤال