الموضوع: تقرير مفصل و مصور عن الايفو مانيوال pk2

الحمدلله العربية معايا بقالها حوالي 3 اسابيع و عاملة دلوقتي 1000 كم
انا هاتكلم بالتفصيل عن كل حاجة في العربية و ان شاء الله يكون التقرير ده مفيد لاي حد معاه العربية او ناوي يشتريها

انا معايا الايفو مانيوال باكيدج 2 اللي تمنها 99 الف جنيه و التقرير ده عنها

مبدئيا نشوف شكل العربية للناس اللي ماتعرفش الفيات بونتو ايفو و ماشفتهاش في الشارع لانها لسه مش منتشرة و ان كنت اتوقع انها هاتكتسح سوق الهاتشباك الاوروبي في 2011










الموتور و سحب العربية:
أنا هابتدي بالنقطة دي لأنها عليها جدل كبير و ممكن تكون نقطة الضعف في العربية بالنسبة لناس كتير رغم انها بالنسبة لي و لناس كتير في المنتدي من ملاك الايفو مش فارقة و مش حاسسين ان الموتور ضعيف خالص...انا حبيت ابتدي بيها لان ممكن نتفق و نختلف في قوة الموتور لكن غير كده العربية ماحدش هايختلف علي مميزتها

الموتور 1400 سي سي 77 حصان....في ناس شايفة انه موتور ضعيف مش بتاع شد و في ناس شايفة ان الموتور كويس...طب ليه الناس مختلفة؟! لان ببساطة مسألة السحب دي حاجة نسبية...يعني لو معاك بيكانتو و ركبت بعدها الايفو هاتحس ان العربية جواها وحش مش موتور...لو معاك جولف و ركبت الايفو هاتحس انها بطة...أيوة بطة...و خد عندك أمثلة كتير و مقارانات لا نهائية مع جميع الانواع الاخري...طيب نقرب الحكاية للناس ازاي عشان اللي عايز يشتري يعرف او يتخيل السحب لان Test drive اختراع لسه مانزلش مصر...قارن سحب العربية بعربية تانية تكون عارفها كويس...أنا اقدر أقول انها احسن من 3 عربيات كانت معايا قبل كده و هم
كيا ريو موديل 2001 1300 سي سي
لانوس موديل 99 1500 سي سي
سبيرانزا 2007 1600 سي سي
يعني لو معاك او جربت حاجة من ال3 عربيات دول أقدر أقولك الايفو سحبها أشد منهم...و في ناس قالت قبل كده ان سحبها زي اللانسر 1300 سي سي...اللي أحب اضيفه ان الموتور دلوقتي بعد 1000 كم أحسن من اول يوم و في ناس بتقول هايفتح اكتر بعد 5000 كم....النقطة التانية...مش كل الناس محتاجة عربية تشد بيها و تقطع اللي حواليها...لو سواقتك هادية انت مش محتاج اكتر من كده...لو بنت أو سيدة مش محتاجة اكتر من كده...و لو بتاع شد مش هاتكسفك بس برده ماتروحش تشد بيها مع فرنا مثلا ولا عربية 1600 سي سي ياباني...شد مع اي حاجة 1300 سي سي و ان شاء الله مش هاتكسفك....و بعدين أنا عايز اسأل الناس بتاعت الشد...ماهو القوي في اللي اقوي منه....يعني لو معاك عربية موتورها 100 حصان هاتطلعلك عربية 150 حصان تزعلك و لو معاك 150 حصان هاتطلعلك حاجة 200 حصان و مش هاتخلص...علي العموم انا مش بتاع شد و العربية سحبها معايا ممتاز و مش محتاج أكتر من كده و الموتور مش ضعيف زي ما ناس متخيلة...الموتور عادي بالنسبة لحجم العربية. سيبك بقي من الموتور عشان دي الحاجة الوحيدة اللي فيها خلاف و غير كده ماحدش هايختلف معايا في مميزات العربية

الثبات:
ثبات العربية ممتاز و بتحس بيه في الملفات...ماجربتش اخد ملفات علي سرعة عالية لأان سواقتي هادية بس برده باحس بثبات العربية في الملفات علي سرعات متوسطة و ده مقارنة بالعربيات اللي ركبتها قبل كده

العفشة:
العفشة ناعمة و بتقلل الاحساس بالمطبات و التكسير في الطريق...رغم ان المعروف ان الثبات لما يزيد العفشة بتبقي ناشفة شوية بس بصراحة الايفو جمعت التنين...ثبات ممتاز و عفشة ناعمة...و ارتفاع العربية مناسب جدا..عالية شوية بالنسبة لعربيات تانية من نفس الفئة و لو محمل مش هاتحك في المطبات
التقفيل و الخامات:
الخامات ممتازة و العربية بتيجي من ايطاليا علي المشتري علي طول و التوكيل مش بيمد ايده عليها ولا بيشيل او يعدل اي حاجة فيها...العربية بتديك احساس جميل بالفخامة و الشياكة الداخلية بالاضافة للشكل المتميز و التصميم الجذاب من الخارج

العزل:
العزل ممتاز و صوت الموتور و الطريق بيختفي تماما لما تقفل الازاز و كمان في خاصية مهة في الكاسيت ان الصوت يعلي حاجة بسيطة مع زيادة سرعة العربية...يعني لما تبقي السرعة 100 و صوت الموتور و الطريق يعلي شوية الكاسيت يعلي صوته شوية عشان يغطي عليه و المحصلة النهائية انك بتحس انك معزول تماما عن العالم الخارجي

التكييف:
انا استلمتها في نص 11 يعني كان الصيف خلص بس المروحة قوية و التبريد سريع...لو راكنها في الشمس يادوب اشغله علي 4 دقيقتين و بعدين انزل علي 1...بس طبعا الاختبار الحقيقي هايبان الصيف الجاي في الايام الي الحرارة بتوصل فيها ل 45
و تاثير التكييف علي السحب مش محسوس قوي

الأمان:
العربية مجهزة ب 2 ايرباج و في امكانية فصل الايرباج للراكب اليمين بجوار السائق...طبعا مانصحش حد يفصل الايرباج التاني لو بيركب معاه ناس دايما...بس لو طول الوقت سايق لوحدك و ماحدش بيركب جنبك ممكن تفصله عشان لا قدر الله لو حصل حادث ادي لفتح الايرباج مايفتحش الايرباج بتاع الراكب اليمين علي الفاضي لان تكلفة اعادة تركيب اليرباج عالية طبعا و شركات التأمين مش بتتحملها كلها
العربية فيها نظام
ABS Antil lock Break System
EBD Electronic Break Distribution
في كمان نظام أمان بيشتغل في حالة الحوادث...لو العربية تعرضت لتصادم شديد النظام ده بيفصل البنزين عن الموتور و يطفي الموتور و يعمل UNLOCK للابواب و يولع كل انوار العربية...يعني بيقلل فرص اشتعال السيارة نتيجة حادث و كمان يسهل خروج االي بداخلها
في بقي نقطتين متعلقتين بالأمان كنت متضايق منهم شوية بس بدأت اتعود عليهم..
اول حاجة...العربية مش هاتسمحلك تمشي بيها علي سرعة أعلي من 20 كم من غير ماتربط الحزام و هي مش بتهزر في الحزام....يعني مش هاتربط الحزام و هاتعدي 20 كم هتلاقي انذار اشتغل و مش هايبطل و صوته مزعج و حتي لو وقفت بالعربية بعد مايضرب مش هيبطل غير لما تربط الحزام زي الشاطر او تطفي العربية و تنزل منها...يعني اللي مش متعود يربط الحزام العربية هاتعلمه الأدب...بس برده الواحد من جواه بيحترم المعايير الاوروبية للامان و تحس كده انك غالي عليهم قوي حتي لو انت بايع نفسك و مش فارق معاك سلامتك و هم لما بيحددوا معايير معينة للامان و يلتزموا بيها بيكون بعد تجارب و اختبارات مش عشوائي و خلاص و مش هايعملولك صوت انذار يقرفك و خلاص غير لو كان فعلا في خطر عليك...اخويا من سنتين تقريبا دخل في رصيف في شارع ضلمة و كان ماشي علي 20 تقريبا لانه كان يادوب بيكسر و دخل في شارع ضلمه و لبس في رصيف عالي..اخويا كان رابط الحزام و ماحصلوش حاجة و الي جنبه ماكنش رابط الحزام و لبس في الازاز و شرخه و خدله غرزتين في راسه...يعني فعلا علي سرعة 20 كم ممكن لو لبست مرة واحدة الحزام هايحميك

تاني حاجة تغيظ في العربية...ان تانك البنزين مش بيفتح من جوه و طبعا فتح التانك من جوه مش تكنولوجيا بس هما قاصدين يعملوا كده عشان تضطر تطفي الموتور و تنزل تفتح التانك بالمفتاح او تدي المفتاح للعامل...المهم انه يجبرك انك تطفي الموتور و انت بتمون (للامان)..في ناس بتخلي النسخة الاحتياطي من المفتاح في العربية و تخلي العامل يفتح التانك بيها من غير ما يبطل الموتور (مفيش فايدة في المصريين)...بس انا شايف اني لو مشيت بالنسخة الاحتياطي تبقي فقدت قيمتها...يعني المفروض المفتاح الاحتياطي يسعفك لو مفتاح العربية ضاع و مش مفروض يكون متساب جوه العربية لما المفتاح الاساس يضيع

استهلاك الوقود :
اقتصادية جدا بتعمل 16 كم بلتر واحد جوه البلد و في خاصية اسمها Start stop دي بتخلي الموتور يطفي لو وقفت في اشارة و مورت الفتيس و شلت رجلك من علي الدبرياج و أول ما تدوس دبرياج تاني عشان تجيب أول و تطلع العربية تدور بسرعة...مش هاتحس بيها و مش هاتعطلك في الطلعة لانك يادوب هاتدوس دبرياج العربية تدور و لسه هاتجيب اول و تدوس بنزين...يعني طفي الموتور مش هايعطل طلعتك بالعربية... و علي فكرة الحكاية دي متبرمجة كويس عشان توفر بنزين و في نفس الوقت تحافظ علي العربية يعني انا لاحظت لو باقف كل ثانية و اتحرك تاني الموتور هايبطل يطفي لانه فهم ان مش هاتقف فترة كافية توفر بنزين و بالتالي مفيش داعي يطفي و يدور بعد ثانية...كمان لاحظت لو وقفت و الموتور طفي و فضلت واقف 5 دقايق مثلا هايدور تاني لوحده حتي لو انت لسه واقف و تفسير الحكاية دي ان النظام عايز يوفرلك بنزين بس مش هايسيب الموتور يبرد يعني تحس ان العربية زكية Smart car
انا في الاول كنت مش مستظرف حكاية ان الموتور يطفي لما اقف لان ده بيفكرني بايام ال 131 لما كانت تطفي عشان دايما ناقصة زيت...و كنت بافصله...يعني في زرار توقف الخاصية دي لو مش عاجباك بس لما تطفي العربية و تدورها تاني هاترجع ON تاني لحد ما تفصلها...نصيحتي سيب الوبشن ده شغال لانك دافع تمنه و هايفرلك شوية بنزين محترمين مع الوقت...و لو قلقان من كتر الدوارة...اخرها تغير جلب مارش بعد 3 سنين بدا 6 سنين (مثلا) طبعا تمنها ولا حاجة جنب التوفير اللي هاتوفره و طبعا اللي اخترع النظام ده اكيد عامل مارش يستحمل مش هاتفوت عليهم يعني.

الكماليات:
و دي أهم حاجة في العربية و ممكن نتكلم فيها للصبح هاكتب كل الكماليات بعد ما قرأت المانيوال من اوله لاخره و الكلام علي باكيدج 2

- الاوبشنز العادية: ازاز كهرباء امامي فقط و الخلفي مانيوال للاسف – تكييف – كاسيت سي دي – سنتر لوك

- فاميه خلفي يتم اثباته علي الرخصة و مفيد جدا للحفاظ علي خصوصية من يركب في الخلف و يقلل تأثير الشمس

- Corner lights توجد كشافات جانبية في الاكصدام لانارة جانب السيارة عند كسر الدركسيون في اتجاه معين او عند اعطاء اشارة الاتجاة يمين او شمال...مفيدة جدا لزيادة مساحة الرؤية في الشوارع المظلمة...يعني لو داخل شارع ضلمة..اول ما تكسر الدركسيون (لو منور العالي) هتلاقي اضاءة قوية في اجاه كسر الدركسيون غير المصابيح الامامية

- فوجات أمامي و خلفي

- جنوط مش طاسات

- خاصية City وده زرار بتدوس عليه يخلي الباور بتاع الدركسيون خفيف قوي و دي مفيدة في الركن و الزحمة و مفيش قلق لو سبتها مفتوحة لانها هاتفصل عند سرعة 40 كم و الدركسيون مش هيبقي خفيف لو ماشي علي سرعة عالية طبعا

- -البلو اند مي Blue&me و ده اجمل حاجة في العربية..ده سوفت وير معمول من مايكروسوفت مخصوص لفيات و بيسمح باستقبال مكالمات التليفون عن طريق البلوتوث و التحكم في وظائف الكاسيت بالاضافة لوجود مخرج USB في العربية يسمخ بتشغيل الاغاني من فلاشة. اجمل حاجة في النظام ده انه اولا مدمج بالعربية مش راكب عليها يعني انت بتشوف من بيتصل و تشوف اسامي الناس اللي عندك علي الموبايل في شاشة التابلوه مش علي الكاسيت و ممكن لو في بعض انواع المبايلات اللي فيها ويندوز تقرأ رسائل علي شاشة التابلوه و بتشوف الفولدرات اللي فيها الاغاني علي الفلاشة قدامك علي شاشة التابلوه و تقلب فيها من الزراير اللي في الدركسيون

- خاصية التحكم الصوتي...ممكن تدوس زرار في الدركسيون و تدي اوامر صوتية للاتصال بالتليفون او لتقليب الاغاني ...يعني انا مثلا اخويا متسجل Ayman علي الموبايل...لو دست علي زرار التحكم الصوتي و قلت Call Ayman بعد ثانيتين تلاقي صوت واحدة بتقولك Call ayman ? تقولها Yes ويتم الاتصال فورا...طبعا النظام ده ممكن يلخبط شوية مع الاسماء العربية او الاسماء المركبة...يعني لو عندك اسم متسجلAbd el fata7

ماتتوقعش ان العربية هاتفهم نطق الاسم ده ...لكن الاسامي السهلة القصير او الانجليزي زي father, mother, mama, home بتلقطها علي طول..لو في حد بتكلمه دايما سجل اسمه بصورة بسيطة و نطقها سهل و عيش حياتك مع Voice control و بالمناسبة المايكروفون موجود في غطاء النور اللي فوق عشان في الاول كنت بوجه صوتي ناحية التابلوه او الكاسيت عشان العربية تميز كلامي بس طلع المايكروفون فوق...يعني خليك زي مانت باصص علي الطريق و اتكلم بصوت واضح لا واطي ولا عالي و هتلاقي العربية بتستجيب كويس للاوامر و الناس اللي كلمتها بيسمعوني كويس بس بيقولوا الصوت بيبقي جاي من بعيد شوية بس واضح

- خاصية Follow me home
ممكن بعد ما تطفي العربية و تشيل المفتاح تشد دراع النور علي الشمال مرة واحدة هاتروح العربية منورة النور الامامي لمده 30 ثانية و يطفي و ممكن تشد الدراع كذا مرة كل مرة يزود 30 ثانية بحد اقصي 210 ثانية و الخاصية دي تنفع لو راكن في حتي ضلمة و عايز العربية تنورلك السكة شوية بعد ما تنزل منها
- Cruise control مثبت السرعة
دراع مثبت السرعة علي الشمال ممكن تثبت سرعتك (فوق ال 50) و تشيل رجلك من علي البنزين و العربية سرعنها ثابتة مع نفسها... و اول ماتهدي او تدوس فرامل النظام يقف و لو حبيت ترجع تاني علي السرعة اللي كنت محددها تدوس زرار resume تروخ العربية ترجع للسرعة و تثبت عليها و كمان ممكن تزود السرعة و تقللها من دراع الكروز كونترول كل ماتحركه قدام السرعة تزيد و كل ما تشدة لورا السرعة تقل من غير ماتدوس بنزين

- في علامة في التابلوه بتنور لما تيل الفرامل يحتاج يتغير

- كومبيوتر الرحلات Trip function

يسمحلك تظبط رحلتين A and B و كل رحلة لها معلومات خاصة من حيث الوقت...متوسط السرعة...المسافة المقطوعة...متوسط استهلاك البنزين ...و استهلاك البنزين اللحظي...كمان بتقولك العربية تقدر تقطع مسافة قد ايه بالبنزين اللي موجود في التانك...انا عامل Trip B اللي هي من ساعة ما ستلمت العربية عشان اشوف الاستهلاك علي المدي الطويل و Trip A كل شوية اغيرها و احسب مسافات مختلفة و اشوف متلا استهلاكي في مشوار من البيت للشغل رايح جاي...و بتختار الوحدة اللي عايز تقيس بيها المسافة كم او ميل و استهلاك البنزين لتر لكل 100 كم او كم لكل لتر



تقريبا انا قلت كل حاجة لو في حاجة افتكرتها هاكتبها
و تحت امركم في اي استفسار


المنافسيين من نفس الفئة (هاتشباك اوروبي)
-بولو 1400 سي سي تمنها 130 الف جنيه و بتنزل طاسات مش جنوط و سماعتين بس للكاسيت و فقيرة جدا من ناحية الكماليات
- ابيزا تمنها 125 الف و برده تابلوه شكله قديم جدا و كماليات قليلة مقارنة بالايفو




بالمناسبة الايفو واخدة 5 نجوم في Euro NCAP و الانترا و السيراتو(نفس الفئة السعرية تقريبا) واخدين 3 نجوم