الموضوع: هذا ما حدث فى صيانة الــ 5000 لعربيتى الساجا

تم بحمد الله عمل صيانة ال5000 ... روحت التوكيل الصبح كنت أول عربية تدخل التوكيل وجالى م/ محمد عبدالهادى وقالى إن شاء الله هنعمل صيانة ال5000 وهيتم فيها (تغيير زيت – تربيط عفشة – تغيير فلتر زيت – تشييك على الكهرباء ) ولو عندك ملاحظات تانية قولتله طبعا" عندى ملاحظات (كنت كاتبها فى ورقة عشان منسهاش) وهى كمايلى:
1) الفتيس عندى رخم جدا" جدا" فى النقل خصوصا" الغيار الأول والثانى ( بمعنى مثلا" لو أنا ماشى بالعربية عادى وبعدين قابلنى مطب وهديت العربية فهنقل للغيار الأول فى النقلة دى الغيار بيجى معايا بالعافية ولا أكنى سايق عربية 128 (مع إحترامى ليها ) وكذالك الغيار الثانى بيكون فيه عضة ........ ودى ثالث مره أشتكى من الموضوع ده فقالى مهندس كان واقف هنشوف الحكاية دى يافندم.
2) يوجد خبط شديد فى جانبى العربية من الأمام وبيظهر من أقل مطب أو فى طريق غير مستوى
3) مفتاح الريموت أتفكك خالص ( أصل أنا أولادى بسنت وسيف ما شاء الله شياطييييييييييييييين رمولى المفتاح من الدور الثامن ) ... م/ عبدالهادى قالى خلاص ممكن نشيل الحاجة اللى جوه المفتاح ونجيب جسم للمفتاح بس مش عارف الجسم بكام أدخل أسئل علية جوه المهم دخلت سألت علية وكانت المفاجأة ( جسم المفتاح بـ 240 جنية .... لييييييييية دى كتييييير ضحك الأستاذ اللى قاعد وقالى هوه سعره كده قولتله طيب سعر المفتاح كله كام قالى بـ 450 جنية !!!!!!! ألف شكر المفتاح اللى معايا شغال وزى الفل سلام عليكم .
وقعدت قى الأستراحة وكان ميعاد الأستلام الساعة 2:30 ظ ... وحوالى الساعة 2 جالى مهندس الصيانة تقريبا" أسمة طارق وطلع معايا بالعربية عشان نجرب الفتيس وكمان الخبط اللى موجود فى جانبي العربية مشينا تمام مفيش خبط ولا حاجة بعد ما العفشة أتربطت .... طيب والفتيس ياهندسة أيه أخباره قالى والله أصل هوه كده مفهوش حاجة ولو فيه حاجة أقدر أعملها كنت عملتهالك وعمال ينقلى على الثالث والرابع فقولتله طيب هدى السرعة كده وبعدين أنقل للغيار الأول وفعلا" هدى ونقل بصعوبة وأنا شايف حركة يده ويقولى مفيش حاجة صدقنى قولتله إزاى يقولى هوه الفتيس كده يأستاذ محمد ولازم تاخد علية ممكن يكون لسة مطبعش وإن شاء الله هيجى مع الوقت .... بينى وبينكم زهقت من الكلام وقولت لنفسى طيب لما أشوف يمكن فعلا" على صيانة ال 10000 يكون أتعدل .
وأستلمت العربية ودفعت 240 جنية من غير الزيت لأنى كنت جايب الزيت معايا إنما لو بالزيت هتبقى الصيانة بحوالى 350ج ومشيت روحت وتانى يوم وأنا رايح الشغل سمعت صوت خبط بس خفيف فى جانبى السيارة مش عارف إزاى !!!!!!!!!!!!!!!!!
وعلى فكرة وأنا مروح أخ بتاع ديلفرى راكب موتوسيكل خبطلى المرايا اليمين وكسرلى قاعدة المرايا ( الجزء اللى متثبت فى الباب ) هوه الجزء دى كان مكسور من فترة بصراحة ورحت عملتة عند واحد بتاع فيبر ... رحت انا بقى متفذلك فيها وجبت أنبوبة أمير وقلت ألزق بيه ورحت رشه على الجزء اللى مكسور وسبته وفراح الأمير مسيل على باب العربية ونشف ومش عارف أشيلة إزاى ... شوفت بقى أخر اللى يعمل فيها ناصح ويتفذلك .......... أسف على الإطالة

[QUOTE=Eng. Rafy Samy;3873167869]الف مبروك على الصيانة وعقبال المليون ان شاء الله

بالنسبة للفيتيس ففي حاجة مهمة جداُ كلنا لازم نعرفها علشان منبوظهوش
الفتيس فيه نو امان مبيسمحش ان العيار الاقل يجيي إلا عند ار بي ام معين
بص بصة على الموضوع دة المشاركة رقم 90 بالذات حتلاقي الحل
http://www.nilemotors.net/Nile/125902-a-3.html
ألف شكر يابشمهندس رفيق على الموضوع الجميل ده أنا قرأت المشاركة بتاعت حضرتك وجارى التجربة بس لو الموضوع ده فعلا" بجد كان المفروض يتكتب فى كتاب التعليمات اللى بيجى مع العربية صح ولا لا