البنزين مرة كمان وكمان

**mostafa123** · 25-12-2010 03:43 PM

الإخوة الأفاضل جميعا
السلام عليكم ورحمة الله وبركاته
كنت أود أن أعلق على بعض الموضوعات المثيرة فى المنتدى خلال الأيام الماضية خصوصا تلك التى تتعرض لمشكلة إستهلاك البنزين ولكن للأسف الشديد حالت الظروف دون ذلك لظروف بعضها صحية وبعضها أسرية..

المهم قمت بتجربة بسيطة بناء على نصيحة أحد الإخوة هنا وهى بخصوص تجربة بنزين 90 بدلا من بنزين 92 .. أنا أعلم فعلا أن الأخير أسرع إحتراقا وإستهلاكا من الأول وربما يزيد الإستهلاك لذلك ولكن يقابل ذلك ضعف فى الإداء إلى حد ما وربما برجلة الموتور مع بنزين 90 وده كان سبب رئيسى فى ترددى لتجربة بنزين 90..

منذ حوالى إسبوع قررت أن أخوض المخاطرة ولكن بطريقة أقل مجازفة بعد أن أستبد بى الغيظ من الفلوس اللى بدفعها فى البنزين.. أنا بدفع حوالى 500 جنيه شهريا.. طبعا خراب بيوت مستعجل.. المهم قبل ما التانك يخلص بشوية وتقريبا كان فيه 7-10 لتر على ما أعتقد قمت حطيت 20 لتر 90 وقلت أجرب وربنا يستر ويبقى الخليط حاجة كده بين 90 و 92 يعنى تقريبا 91 لو جاز حساب الأمر بهذا الشكل.. المهم رجعت من الشغل للبيت ومركز جدا مع العربية علشان لو سمعت أى صوت أو أى برجلة أو أى شئ غير طبيعى هاتوقف على طول وأفضى اللى فيها بأى طريقة وأرجع 92 زى ما كان .. المهم .. مشيت 40 كم ومفيش حاجة خالص ولا الهوا.. قلت أصبر لتانى يوم وأركز تانى .. برضه مفيش أى حاجة وكان عندى شبه شك إن السحب تحسن بنسبة طفيفة أوى بس برضه مش متأكد.. المهم كملت لحد ما التانك فضى ومفيش مشاكل خالص.. دخلت على البنزينة وتوكلت على الله وفولت بنزين 90.. وبعد كده مشيت إمبارح والنهارده حوالى 250 كم منهم حوالى 100 كم بمفردى و150 والعربية حمولة كاملة أنا وأربع اشخاص أخرين .. المفاجأة يا سادة يا كرام ... سحب العربية معايا وانا لوحدى كنت طاير على الأرض وجبت 160 كم/ساعة بمنتهى السهولة والعربية لسه فيها لو عايز أجيب 200 كم كمان.. والعربية ثبات رهيب على الأرض وماكنتش بقف إلا لما أنا خفت لأنى أصلا متعود على 90 - 100 بس برضه تعمدت امشى على سرعات عالية يعنى مشيت حوالى تقريبا نص المسافة اللى أنا مشيتها على سرعات من 120-160 .. والباقى على 80-90.. المفاجأة الأخرى إن سحب العربية لم يتأثر بتاتا بالحمولة .. يعنى العربية لا كانت بتنتع ولا بتسحف ولا بتسقف ولا أى حاجة خالص ولو كنت عايز أجرى بيها على 160 وهى كاملة الحمولة كنت هجرى بس طبعا يبقى إنتحار رسمى لإن القصور الذاتى هيبقى رهيب وأنا مضمنش الطريق ولا المخابيل اللى عليه ممكن يعملو إيه بس مشيت فترات بسيطة جدا على 120 بدون أى مشاكل .. المفاجأة الأخيرة وهى الأهم وخلوا بالكم منها كويس قوى قوى لإن ده بيأكد لى إن أجهزة الشركة فيها شئ مش مظبوط.. إيه هى المفاجأة .. أقول لحضراتكم.. كنت بلغت فى صيانة الألف والخمس ألاف على أن العربية لو سخنت منى سحبها بيقل وبتسقف على خفيف.. فى المرتين قالوا لى مفيش مشكلة فى الموتور ولا الكهرباء لأن الجهاز بيقول إن مفيش حاجة غير طبيعية.. طبعا هنا لا يمكن نلوم صنايعى أو مهندس لإن هو بيقول إللى بيطلع على الكمبيوتر.. المهم ساعات بيبقى فى كمائن لطيفة كده على الدائرى عند الأكاديمية كده علشان الحزام .. وبرضه ساعات الطريق بيقف علشان حادثة من إياهم بتوع مساطيل النقل وساعات بسبب سفلتة طريق السويس .. كنت كل ماقف الاقى العربية تسخن والمروحة تشتغل فتبرد وبعدين تسخن وتشتغل وهكذا ورا بعض دون توقف.. بعد ما أطلع من الزنقة دى ألاقى العربية بتسقف على خفيف والسحب أضعف كتير مع إنى لوحدى فى العربية وبالكتير زوجتى معايا.. أما بقى لو حصل الكلام ده ومعايا الآولاد كمان وهم على فكرة كلهم على بعض مايكملوش 130 كجم.. بلاقى السحب قل جدا والعربية لا تعود إلى سابق عهدها إلا أن تبرد تماما.. المهم يا سادة يا كرام.. مع بنزين 90 تعرضت لنفس الموقف والعربية فيها أربعة أنفار غيرى .. والسحب لم يتأثر والعربية لا سقفت ولا صفرت ولا غنت ظلموه.. ده معناه إيه؟؟ فى رأيى الضعيف .. مع إنى مش متخصص... إن ظبطة العربية الموجودة دلوقت وخصوصا الكهرباء وخلط البنزين بالهواء وتوقيت إشعال البوجيهات كله متظبط على بنزين 90 وليس 92.. علشان كده بقول الجهاز فيه حاجة مش مفهومة ومش مظبوطة علشان معرفش يشخص فى عربيتى أنا على الأقل إن البرنامج الموجود ده مظبط على 90 مثلا وليس 92.. أو ربما يكون فعلا غير معاير كما قلت سابقا والخطأ بين الواقع والمفترض فى الجهاز هو الفرق بين 90 و 92 وجاء الأمر مصادفة ليس إلا..

بالنسبة لإستهلاك البنزين لسه ماحسبتوش.. بس بالنسبة لى حتى لو فضل الإستهلاك كما هو ف بنزين 90 افضل على الأقل من ناحية السحب وعدم التسقيف.. فيه حاجة أخيرة مهمة جدا كنت هنسى اقول لكم عليها... صوت الموتور العالى .. بقى أهدأ بعض الشئ ولكن مازال صوته عالى فى سرعات معينة.. كنت قلت لكم قبل كده إنى هكتب موضوع مخصوص عن صوت الموتور وقمت ببعض التجارب البسيطة كده هتوضح ليه صوت الموتور عالى ,, لكن للأسف الشديد لم أتمكن من كتابة الموضوع حتى الأن بسبب ظروف صحية بالأساس ثم بعض الظروف الأسرية.. أوعدكم إنى هكتبه فى أقرب فرصه وبرضه هتلاقوا فيه بعض المفاجأت ..

ياريت ترجعوا هنا تانى بعد يوم ولا إثنين أقول لكم على معدل إستهلاك بنزين 90..

ملاحظة أخيرة ليس لها علاقة بالبنزين...
دى كانت أول مرة أركب 3 أشخاص ورا فى الكنبة وللأسف الشديد .. العربية هبطت جامد جدا مع العلم أن متوسط وزن الواحد فيهم 75 كجم ولأول مرة أحس إن أنا "مدلوق" على ورا ومش شايف قدامى.. والمطب الصناعى الوحيد اللى كان فى طريقى وكان فى التجمع الخامس فشلت السيارة بجدارة فى إجتيازه وحكت من تحت فيه ده غير أن الطوب والحاجات البسيطة اللى كانت العربية بتمشى عليها كنت بحس بيها جدا .. بجد أتعكننت واتنرفزت جدا .. أمال لو الشنطة مليانة ولا اللى ركبوا دول كانوا من الأوزان المصرية المعتادة على المحشى والكشرى والمكرونة كانت العربية حصل فيها إيه؟؟

فى أمان الله
السلام عليكم ورحمة الله وبركاته

إخلاء مسؤلية

أنا قمت بتجربة بنزين 90 على سيارتى ولا أضمن لأى شخص أن يحصل على نفس النتائج التى حصلت عليها إذا أستخدم بنزين 90 فى سيارته.. فأنا لست مسؤلا عن أى خلل يحدث فى سيارة شخص ما إذا قام بإستخدام بنزين 90 بناءا على مداخلتى هذه وليتحمل هو أى عواقب جراء إستخدامه لبنزين 90 دون تحميلى أى عتاب أو لوم أو مسؤلية

**memos** · 25-12-2010 04:13 PM

شكرا جزيلا علي المعلومه وعالله تنفع التجربه وان كنت مستغرب الرفض التام للتوكيل للبنزين 90

**mmmmgogommmm** · 25-12-2010 07:03 PM

متفق مع سيادتك ممكن البرنامج يكون مظبوط على بنزين90 بس مننساش لو البنزين مخلوط بمية العربية هتسقف حتى لو90 او 92 او95 معظم المحطات خزاناتها مش معزولة عن المياة الجوفية------- المهم الاستهلاك فول العربية على الاخر وخد قراءة العداد وامشى داخل البلد50 كيلو فى الشوارع المزدحمة (شوارع القاهرة) بدو استخدام المحور او الدائرى 50كيلو يعنى مشوار25 كيلو ذهاب ومثلهم عودة وفول بعدكدة وشوف استهلكت كام راعى بدون استخدام التكييف////////////////////ملحوظة بنزين 92 ينتهى سريعا لانة اسرع فى الاحتراق واكفا

**Emad Habib** · 25-12-2010 07:25 PM

مجالات الخبرة:

موضوع منقول عن التوفير فى استهلاك البنزين والوقود ( معدل )

افضل الطرق لتوفير الوقود
----------------------------

السلام عليكم ورحمة الله

تلاحظ خلال الفترات الماضية ارتفاع مؤشر الأسعار بالأسواق في بعض السلع بدرجات متفاوتة وعليه بدأ الكثير من الناس يتساءلون ...

ما الذي يمكن فعله لخفض اجمالي النفقات ومواجهة حمى ارتفاع الاسعار...؟

هنالك عدة عوامل قد تنهك ميزانية الفرد ومن أهمها الوقود الذي يستهلكه يومياً...

ولكن...!

*
هل تعلم انه بالإمكان خفض كلفة الوقود بنسبة كبيرة تصل الى 37%...؟!!

*
هل ترغب حقا في التوفير في قطع الغيار الاستهلاكية للسيارة وإطالة عمرها

*
هل تعلم بأن كل جالون من الوقود تحرقه سيارتك يساهم في تلويث الهواء بقدر يصل الى 20 رطل من ثاني أكسيد الكربون؟!

*
أتود أن تصبح قيادتك على الطريق آمنة وأن تحفظ نفسك والآخرين - بمشيئة الله- ؟

*

نعم، بإمكانك أن توفر نقودا حقيقة، ان تحافظ على سيارتك متينة وقوية، ان تقلل من ظاهرة الاحتباس الحراري، وأخيرا قيادة آمنة بحفظ الله. كل هذا يمكن ان يتم بواسطة جهاز لا تخلو منه اي مركبة...

إنه دواسة البنزين !!

.. كيف؟

قبيل الإجابة ينصح المستهلكين بأخذ الحيطة اللازمة من الحملات الترويجية والدعائية والتي لا تستند على مصادر علمية موثوق بها.

حيث:

تدعي العديد من الشركات في العالم بان لديها منتجات جديدة تعمل على تقليل استهلاك الوقود وبالتالي توفير الأموال. ومع ذلك، فهي تنصح الزبائن على إتباع خطوات معينة عند القيادة من أجل تحقيق الفائدة المرجوة من منتجاتها، وإلا فإن المنتج المُروج له لن يعمل بالشكل المطلوب. في حقيقة الأمر، يستطيع المستهلك تحقيق أفضل النتائج في تقليل الاستهلاك سواء أكان قد أشترى ذلك المنتج ام لا، فتطبيق تلك الخطوات كفيل بإعطاء النتيجة المرجوة دون اي اضافات.

فيما يلي ستجد تلك الخطوات المهمة كاملةً والتي تساعد سائق المركبة على تحقيق أكبر قدر من التوفير. هذه الخطوات درست بعناية وقد تم اعتمادها من قبل هيئات ومؤسسات عالمية:

1- تولى القيادة بإعتدال

الحقيقة المذهلة: توفير يصل الى 37% في إستهلاك الوقود.......!

هذه الخطوة هامة وسهلة التنفيذ ايضاً، ولكن الكثير من السائقين لا يطبقونها...!

عند القيادة،

- حاول ان تأخذ نظرة بعيدة المدى للطريق وبها تكشف معالمه وظروفه.
- يجب ان يكون كلا من تسارع السيارة والفرملة متدرجاً وسلساً.
- اذا كان ناقل الحركة يدوي، فعليك بنقله الى الخيار الاعلى المناسب بسرعة كلما امكن ذلك.

قد تسأل نفسك لماذا ؟..

- التسارع بسلاسة يقلل من عدد دورات المحرك وبالتالي يقلل الحاجة الى الوقود.
- أكثر من 50% من الطاقة المطلوبة لتحريك المركبة تضخ في التسارع. والفرملة الغير ضرورية تهدر تلك الطاقة.
- التسارع من صفر الى 100 خلال 20 ثانية بدلاً من 10الى 15 ثانية يحقق وفراً ملموساً في استهلاك الوقود على الأمد الطويل.
- القيادة المعتدلة تعمل على تخفيف الضغط والاهلاك على الإطارات والمكابح.
- القيادة بإعتدال قيادة آمنة لك ولغيرك، كما وأنها قيادة رزينة.

2- حافظ على صيانة سيارتك بإنتظام

الحقيقة المذهلة: توفير يصل الى 20% في إستهلاك الوقود.......!

لقد أثبتت الدراسات أنّ:

- الصيانة الضعيفة وغير المنتظمة تزيد من إستهلاك الوقود بنسبة 10-20%.
- معالجة المشاكل الفعلية كالخلل في مستشعر الأكسيجين يحسن من صرفية الوقود بنسبة 40%0
- الزيت النظيف يقلل كثيرا من عملية الاحتكاك الحاصلة بين الأجزاء المتحركة في المحرك مما يؤدي الى سلاسة في الأداء ومن ثم صرف أقل للوقود.
- مصفيات الهواء الجديدة (الفلاتر) تعمل على خفض استهلاك الوقود وايضا حماية المحرك.
توصيات

- اتبع جدول الصيانة الكاملة والموصى به من قِبل المُصنع والمُضمّن في دليل المالك.
- استخدم الزيوت والمصفيات ذات الجودة العالية والموصى بها.

3- تجنب التسخين المفرط للمحرك

الحقيقة المذهلة: توفير يصل الى 19% في استهلاك الوقود.......!

نتيجة غير متوقعة!!... اليس كذلك؟
"عندما تجعل المحرك يدور والسيارة لا تتحرك فسوف تقطع صفر كيلو متر للتر الواحد"

لا يوجد أي داعي لتحمية المحرك لفترة تزيد عن دقيقة واحدة. حيث أن أغلب السيارات الآن لا تحتاج للتحمية كالسيارات القديمة وذلك بسبب التقدم التقني في عالم صناعة السيارات.

نقاط مهمة جداً:

- في الصباح: أدر المحرك وتحرك بعد دقيقة واحدة، ومن ثم إجعل تسارعك متدرجاً.
- أوقف المحرك عند تعبئة الوقود، لسلامتك أولاً ولتوفير الوقود ثانياً.
- أوقف المحرك إن كنت تتوقع أنك ستقف في مكان ما لأكثر من دقيقة (يستثنى الزحام المروري).
- التسخين المفرط للمحرك يعمل على إفساد وإتلاف زيت المحرك سريعاً وأيضا يلوث الجو من حولك.

4- استخدم مثبت السرعة (Cruise Control) عند القيادة على الطرق السريعة

الحقيقة المذهلة: توفير يصل الى 14% في استهلاك الوقود.......!

انها طريقة مفاجئة وفعّالة للتوفير...!

إن ميزة مثبت السرعة (Cruise Control):

1- تعمل على التقليل من التَغيُرات الغَير ضرورية في السرعة بشكل كبير! كيف..؟
ان التحكم في ضخ الوقود الى المحرك عن طريق حاسوب السيارة يتم بطريقة اكثر سلاسة ومرونة، حيث تتناسب كمية الوقود المدفوعة الى المحرك مع القوّة المطلوبة منه بشكل دقيق حسب السرعة المحددة. اما السائق فسيصعب عليه تقدير ذلك التناسب بشكل دقيق.

2- تجعل السائق يأخذ نظرة بعيدة الأمد للطريق، وبالتالي تكون ردة فعله لما يحدث في الطريق استباقية وليست فورية. ان ردّّات الفعل الفورية تعني عدد ضغطات أكثر على دواسة البنزين والفرامل وبالتالي استهلاك أكبر للوقود.

ملاحظات:
أ.- اذا كانت هذه الميزة ليست متوفرة في سيارتك فإعمل على تطبيق النقطة الثانية وستوفر الكثير.
ب.- لا تستخدم مثبت السرعة في الطرق الرطبة ولا عند القيادة داخل المدينة.

5- انتبه الى حدود السرعة

غالباً ما تكون السرعة القصوى في الطرق السريعة 120 كم/س، بإستثناء بعض اللوائح التي قد تشير الى اقل من ذلك.

هل تعلم انه/ان:

- عند زيادتك لسرعتك من 100 كم/س الى 140 كم/س فإن إستهلاك الوقود يزيد بنسبة 30%.
- عند خفضك للسرعة من 100 كم/س الى 90 كم/س يتحسن إستهلاكك للوقود بنسبة 10%.
- الوقت الموفر عندما تقود بسرعة 130 كم/س مقارنة بسرعة قدرها 110كم/س هو دقيقتين فقط!!!

تذكر دائماً:

1- ان حدود السرعة هي حدود وليست أهداف، فإجعل سرعتك اقل منها.
2- القيادة تحت حدود السرعة تعني قيادة آمنة تحفظ لك حياتك وحياة ابنائك بإذن الله.
3- تجاوز حدود السرعة يزيد من صرفية الوقود كثيرا، كما انك قد تجبر على دفع غرامات انت في غنى عنها.

6- تحقق من قياس ضغط الإطارات

بإمكانك تحسين استهلاك الوقود بنسبة تصل الى 6% وذلك بالحفاظ على ضغط الهواء المناسب في الإطارات.

تشير الدراسات ان اغلب السائقين يهملون عملية التحقق من قياس ضغط الاطارات بشكل دوري!

عدم وجود هواء كافي في الإطارات يؤدي الى:

1- زيادة استهلاك الوقود.
2- تقليل عمر الإطار بشكل سريع وملحوظ.
3- جعل التحكم في قيادة السيارة صعباً وخصوصاً عند المنعطفات.

**pharonicking** · 25-12-2010 09:01 PM

الله ينور يا باشا انا الحمد لله تقريبا بعمل كل اللى انت كاتبه دة والحمد لله استهلاك البنزين ممتاز

**mmmmgogommmm** · 25-12-2010 09:12 PM

باالمناسبة اعتقد ان مفيش مشكلة من ال90 لو ريح الموتور لان الموتورsoch 1cam واللة اعلم بس فى كل الاحوال الحدالادنى 90 يعنى ال80 مينفعش على الاطلاق----وياريت لو حد جرب زيت شل ال10000كم يقولنا تاثيرة على صوت الموتور------لانى سمعت ان الناس كلها بتغير لزيت شل عشان بيهدى صوت الموتور والكلام دة كان على الكرولا والياريس بعدسرعة 100كم/س صوت الموتور كان بيعلى لما غيروا لشل هدى نفس الكلام لاخويا قالهولى باالنسبة للماتريكس واللة اعلم---------واحنا فى انتظار تجارب دكتور مصطفى لقياس معدل الاستهلاك وكذلك لاكتشاف اسبا صوت الموتور العالى---وطبعا المشاركة مفتوحة لتجارب وخبرات كل الاعضاء من ملاك الbydوالواجا لانها نفس الموتور وشكرا

**spirit5** · 25-12-2010 09:36 PM

موضع جامد ومجهود جامد جدا
مشكووووور

**o_shoaib** · 25-12-2010 10:49 PM

موضوع فى غاية القوة صراحة ....يا جماعة انتم بالفعل مميزين
دعواتكم إنى أجيبها يوم الأثنين اللى جاى....وياريت حد يرد على ملحوظة د/ مصطفى فى التحميل على الكنبه الخلفيه...المفروض انها عربيه عائليه ومتوقع فيها التحميل الكتير...هل تحتاج الى تغيير الجنوط مثلا مثل الفيرنا....برجاء من الساده أساطين ال f 3 أن يفيدونا فى هذا الأمر

**elmanahry** · 26-12-2010 12:37 AM

المشاركة الأصلية كتبت بواسطة o_shoaib

موضوع فى غاية القوة صراحة ....يا جماعة انتم بالفعل مميزين
دعواتكم إنى أجيبها يوم الأثنين اللى جاى....وياريت حد يرد على ملحوظة د/ مصطفى فى التحميل على الكنبه الخلفيه...المفروض انها عربيه عائليه ومتوقع فيها التحميل الكتير...هل تحتاج الى تغيير الجنوط مثلا مثل الفيرنا....برجاء من الساده أساطين ال f 3 أن يفيدونا فى هذا الأمر

مع احترامى الشديد للدكتور مصطفى انقل خبرتى فانا دائما اقود سيارتى اما بمفردى اما معى شخص واحد ولكنى تعرضت مرة واحدة الى ان يركب معى ثلاثة فى الكنبة الخلفية و الوزن يقرب من السبعين كيلو لكل فرد منهم وصديق بجوارى وزنه 120 كيلو ووضعت يدى على قلبى لانى كنت اوصلهم الى بلدتهم على بعد 12 كيلو متر وسوف اعدى على ثمانى مطبات صناعية مزدوجة ووضعت يدى على قلبى فقدت السيارة بهدوء وكنت اتوقف تماما قبل اى مطب ثم ابدا التحرك من الصفر بهدوء فوق المطب وللعجب لم احتك بالسيارة فى اى مطب ومع ذلك فى احد المرات كنت لوحدى تماما واحتكيت باحد المطبات الصناعية البشعة ولكنى فيما بعد اخذت هذا المطب بزاوية وكنت اعديه بدون احتكاك عدة مرات اما مارواه الدكتور مصطفى على ان السيارة ارتفعت من الامام ولم يعد يرى فارجو ان يراجع العفشة لان هذا غير وارد فى هذه السيارة

**bassem.naguib** · 26-12-2010 09:11 AM

المشاركة الأصلية كتبت بواسطة mmmmgogommmm

باالمناسبة اعتقد ان مفيش مشكلة من ال90 لو ريح الموتور لان الموتورsoch 1cam والله اعلم بس فى كل الاحوال الحدالادنى 90 يعنى ال80 مينفعش على الاطلاق----وياريت لو حد جرب زيت شل ال10000كم يقولنا تاثيرة على صوت الموتور------لانى سمعت ان الناس كلها بتغير لزيت شل عشان بيهدى صوت الموتور والكلام دة كان على الكرولا والياريس بعدسرعة 100كم/س صوت الموتور كان بيعلى لما غيروا لشل هدى نفس الكلام لاخويا قالهولى باالنسبة للماتريكس والله اعلم---------واحنا فى انتظار تجارب دكتور مصطفى لقياس معدل الاستهلاك وكذلك لاكتشاف اسبا صوت الموتور العالى---وطبعا المشاركة مفتوحة لتجارب وخبرات كل الاعضاء من ملاك الbydوالواجا لانها نفس الموتور وشكرا

فعلاً الشل فوق الممتاز وده عن تجربه لأني بستعمله .. حتى مع العربيات القديمة فعال وبيهدي صوت الموتور بالفعل على عكس موبيل بكافة أنواعه اللي مأثبتش كفاءة خالص .

وفيه زيت تاني أسمع أنه كويس وأسمه فيسكو بس مجربتوش .. وده لينك فيه تقريباً المواضيع المتعلقة بيه .

http://www.nilemotors.net/Nile/131252-a.html