كلاكس الماروتي ودعني خلاص وتجربتي مع تكنو وان في الحرفيين
السلام عليكم يا شباب
اعذروني لقلة دخولي بسبب كثرة الامتحانات وانشغالي بظروف بسيطه ان شاء الله
انا من كام يوم رحت لتكنو وان وقلت اخليهم يشيكو عالعربية ككل ويعملو صيانة ال 20 ألف
المهم هما ربطولي العفشه ورجلشو الفرامل الخلفيه وقالولي ان التيل لسا بدري ان شاء الله عليه وطلعو البوجيهات وقالولي لازم تتغير مع اني معملتش بيهم غير 10 آلاف كيلو
فبقول ليه اغيرهم قالولي البنزين اللي بتستخدمه مش كويس
فقلتله اني بعبي 80 من فتره قريبه
قالي هوا ده السبب
هههههههههههههههههههههههه
المهم بعد ما ظبطوها واستلمت العربية بعد ساعتين ونص
رجعت بالعربية للبييت والمسافه بيني وبينهم 6 كيلو فمش مقياس
المهم اليوم اللي بعدها العربية طلعت عيني على ما دارات من خامس مره ورجرجه واييييييييييييييه
طبعا الباشا اللي مد ايده (اللي عايزة القطع) على الكربيراتير لعب في خليط البنزين والهوا وهوا ده المشكله
انا قلت تلاقي البنزين هوا السبب ورحت فولت مرتين والله 92 ولا تغير والسحب مش قد كده
فقلت ما بدهاش ياولد اظبط كربيراتيرك بنفسك واستعوض ربنا
كان ممكن ارجعلهم لكن مش هرجعلهم على حاجه هايفه زي دي وهما فعلا مقصروش لان كانت الفرامل الخلفيه اليمين بتفرمل قبل الشمال والميكانيكي قالي احمد ربنا انك مفرملتش على سرعه عاليه كانت هتلف منك وللاسف ده كان حصل معايا من 5 ايام قبلها على صلاح سالم الفجر كنت ماشي على 100 وربنا سترها معايا والله فهما عملولي شغل حلو في العربية كلها ماعدا الكربيراتير...
طبعا بالنسبه للسعر بتاعه حتى بعد خصم المنتدى فهوا رقم خيالي
صيانة ال 20 ألف من غير تغيير الزيت ولا حتى فلتر الهوا كلفتني 180 جنيه بعد خصم نايل موتورز
بالنسبة للبوجيهات اللي ركبوها كانت ان جي كي بس مش ياباني انما كوري والحقيقه مش عارف ليه هيا اتقل من اليابانيه لكن هيا نفسها بالظبط وللاسف ادوهاني بسعر عالي جدا
(الطقم ب 65) في حين اننا بنجيب اليابني من بره ب 32 فقط....
حاليا في حاجه غريبه حصلتلي
الكلاكس كنت ماشي وتمام التمام
بزمر لقيته صوته مخنف قوي وبيقطع كده
وشويه يرجع وهكذا
قلت لتكون السلكه فيه ملمسة ولا حاجه
شفت السلوك لقيتهم ماسكين كويس
قلت ماشي يومين واعمله
النهارده بقا لقيته قاطع خالص مفيش صوت
ياترى كده هوا خلاص ودع ولا ايه المشكله؟
وياترى ايه اللي يخلي الكلاكس يبوظ؟؟
وحاليا لو عايز اغيره هل فيه نصيحه معينه ولا اعمل ايه لانه ضروري في البلد دي....
وفي حاجه كمان
النهارده نزلت العربية من شويه
بولع نور العربية لقيت ان التابلوه مكان زرار تشغيل الهوايات منور
في حين اني عمري ماشفته منور قبل كده
فهل في علاقه بين نور التابلوه ده والكلاكس؟؟
ولا هوا من كتر ما هوا نور ضعيف انا عمري ما اخدت بالي منه.؟؟؟
تحياتي للجميع
