تعبت أنـا ..بجد أنا تعبااان قووي
السلام عليكم يا رجالة
أنا عاوز أفضفض شوية بإللي ف قلبي معاكم
يمكن الأقي حل
وخاصة أنا بقالي سنة هنا فالمنتدي وبجد إرتحت جدآآآ لطريقة كلامكم مع بعض
ومعظمكم ناس كبيرة فالسن أنا مش قصدي عواجيز يعني :)
أنا قصدي ناس عندها خبرة فالحياة أكتر مني
أنا بس كل الموضوع إني مبقتش عارف أنا مين ؟ وعاوز أعمل إيه؟
ودايمآ بحس إن فيه حاجة نقصاني
بس مش عارف إيه هيا
أنا الحمد لله بصلي معظم الفروض فالمسجد وأصوم وبقرأ قرأن دايمآ
بس يمكن أنا منطوي علي نفسي أو خجول شوية زيادة عن اللزوم وبعض الناس ممكن تفتكرني كئيب شوية
ساعات كده بحس إني طاااااير أووووي من الفرحة بدون أي سبب فرحان وخلاص مش عارف ليه
وساعات ببقي حاسس إن فيه حاجة كاتمة علي نفسي ومش قادرأتكلم مع أي حد
أصحاب مثلآ؟ الحمد لله عندي أصحاب بس مش كتير أوي
بس بثق ف كلام 2 أو 3 منهم
الباقي أيوة ملتزمين بس ساعات بحس إنهم ممكن يعملو حاجات أنا مقدرش أعملها
مثلآ أنا مبعرفش أعاكس بنات أو أجرر كلام حتي
مش عارف ليه يمكن السبب راجع لتربيتي بس بردو الشيطان شاطر وبيلعب ف دماغي
بس بردو أرجع أفتكر إن ليا أخت وكما تدين تدان ولو بعد حين فمبقدرش
والدي ووالدتي؟ الحمد لله عمرهم ما قصرو معايا ف أي حاجة
وبحمد ربنا إنهم ربوني أحسن تربية
بس بتخنق من حاجة إسمها السؤال المتكرر
يعني مثلآ سؤال عاوز كذا ولا كذا؟
أرد وأختار بردو الأقيهم يعيدو نفس السؤال مرة وأتنيتن وساعات تلاتة
بحس إنهم متوقعين إنهم هايلاقوني غيرت إجابتي أو عاوزيني أختار إللي هما عايزينه
مع إنهم عارفين إن كلامي دايمآ قليل جدآآ ومبحبش أرغي كتير
ويمكن ده إللي مخليني بتعصب بسرعة بسبب التكرار
وبيخليني أخد قرارات ببقي عارف إنها صح لكن بأخدها متأخر جدآ بعد فوات الأوان
وأرجع أندم إني معملتش كذا مع إني كنت عارف إنه صح
وساعات بأخد قرار ف موضوع معين ببقي متأكد إنه سليم 100% ومش بيغضب ربنا
الأقي الناس كلللللللللللهم يعاتبوني ويطلعوني غلطان
هوا أنا يعني مبقتش قادر أفرق بين الصح والغلط؟؟؟!!
وحاجة تانية بردو مثلآ لما أخرج مع أصحابي
لازم أحدد ليهم مكاني وخط سيري ومين معايا كل ساعة مثلآ
وياويلي ياسواد ليلي لو الموبايل ماسمعتهوش أو فصل شحن مثلآ
ودي حاجة بتخنقني جدآآآ مع إنهم مخلفين راجل مش سوسن
ومحدش من معظم أهالي أصحابي بيعملو معاهم كده
ساعات بيسألوني عن الحل أو رأيي ف موضوع معين وأقولهم رأيي وفي أغلب الأوقات بيأخدو بيه وبينفذوه
أنا ساعتها ببقي مبسوط بس ببقي ف نفس الوقت محتار إذا كان ده إختبار منهم ليا ولا هما فعلآ مش عارفين يأخدو قرار؟
ولما أحاول أواجههم بالحاجات إللي بتخنقني وتضايقني
وأفهمهم إني شاب عندي 21 سنة يعني خلاص كبرت
أسمع بقي كلام من نوعية إنتا قلبك حجر وانتا مش عارف بنبقي قلقانين قد إيه وإنتا هاتكبر علينا ووو...إلخ
فبتكسف من نفسي وببقي ف نص هدومي وأرجع أعتذر
هما مش بيتحكمو ف تصرفاتي ولازعلان منهم يمكن يكون عندهم حق لكن
أنا بس عاوز الأقي حل لأني تعبت ومبقتش قادر خلاص آخد أي قرار ف حياتي
وأنا أهوه خلاص في آخر سنة فالكلية وبدعي ربنا يسترها وأعدي علي خير لآني إتبهدلت أوي فيها
إدعولي بالله عليكم ياجماعة إني أعدي السنادي علي خير سليم بدون إصابات
ويارب يوريني طريق الخير فين
وآسف للإطالة عليكم