الموضوع: الى متى الجبروت والظلم؟؟؟ الله المستعان

بسم الله الرحمن الرحيم
الحقيقه مش عارف ابدا منين
لكن النهارده حصلي موقف لم اكن اتخيله ولا في الاحلام
اولا
ربنا يستر طريقنا جميعا باذن الله

النهارده كنت نازل عندي امتحان (بكاليريوس طب القاهره) وعادي مفيش اي مشاكل يوم جميل نشاط صباحي وامتحان
لظرف معين كان لازم زوجتي تيجي معايا النهارده
نزلت من البيت الساعه السابعه والنصف صباحا
الجو ممتاز جدا
دورت عربيتي وسخنت وسميت الله وتوكلت عليه
وماشي بقا في طريقي لا بيا لا عليا
وصلت لحد عند الازهر بارك وشوية وواحد معاه سكودا ماشي بطريقه جنونيه
المهم المكان كان ضيق شويه وكنا مهديين عشان الملف وهوا مصمم يعدي من حته ضيقه جدا بيني وبين واحد تاني
انا متحركتش من مكاني لان يميني مقفول
الباشا خبط مرايتي الشمال
فقلت هيقف المهم لقيته بيشد فلسا هشد وراه لقيته راح كاسر يمين فبقيت انا على شماله
لقيته بيكسر عليا تاني ولا افلام الاكشن وخبط رفرفي القداماني يمين ولسا جاي يدوس رحت زانق عليه لان كده ده تعدي واضرار ليا
ببص لقيته واحد لابس لبس الجيش ففهمت اني خلاص مليش حاجه
فاخدت موبايلي وجي انزل لقيته عند بابي
فنزلت فبيقولي انتا رايح يمين ولا شمال
قلتله يعني ايه مش فاهم
راح عاد سؤاله

فقلتله هوا انتا حضرتك اي حته مزنوقه بترمي نفسك فيها كده؟؟؟
شويه لاقيته بيقولي امشي من هنا لا اديك على وشك!!!!!!
قلتله تديني على وشي؟؟
ورحت صورت عربيته من قدام وللاسف فيما بعد الصورة ملقتهاش عالموبايل اطلاقا!!!!!!!!!!!!!!
قالي اه وانا اعمل واسوي انتا مش عارف انا مين....
قلتله ولا تقدر تلمس شعره مني
الحقيقه انا معايا جنسيتين وممكن فعلا اوديه ورا الشمس لو كان مين لكن انا ورايا امتحان ومش فاضي
المهم فهوا كان خلاص راجع على عربيته
وفعلا فتح باب عربيته وانا خلاص همشي
لقيت عربيه تانيه اكسنت بتقفل عليا
وراح هوا فجأه بايده ضرب مرايتي اليمين اللي بدورها انكسرت في وش مراتي !!!!
وبرجله ضرب زجاج السياره محاولة لكسره!!!!!
فانا طبعا مش هقعد اتفرج عليه وهوا بيعمل كده وفنفس الوقت مراتي معايا وعندي امتحان بعد اقل من نصف ساعه
(لو انتا مكاني هتعمل ايه؟؟؟)
المهم رحت واخد بعضي وجاي اجري واذ بموتوسيكل راح هوب راشق في شنطة العربية من ورايا
وكل ده والتاني لسا عايز يضرب العربية
المهم رحت دايس وكل اللي بعمله اني بدعي عليه
طبعا ملحقتش اخد نمر عربيته ولا حتى العربية التانيه
واتكلت على صورة الموبايل اللي معرفش ازاي مظهرتش

محدش يقولي انتا غلطان انك سبته صدقوني كان عامل زي التور الهايج رغم ان الموضوع مش مستاهل وانا نفسي لو مكنش عندي امتحان ولا المدام معايا كنت وريته شغله

حاليا انا كل اللي خايف منه انه يئذيني لو كان هوا اخد نمر عربيتي

وفنفس الوقت مش عارف اعمل ايه

طبعا انا بقول قدر الله وماشاء فعل والحمد لله انها جت على قد كده

لكن ياترى ايه كان ممكن يتعمل في موقف زي ده؟؟؟؟
انا قلت الكلام ده مبيحصلش والاعلام بيهول واللي بنسمعه تهويل لكن بعد النهارده اكتشفت انه حقيقه
وان الواحد لولا الله وان ربنا بيسترها معاه كان زمانه بيروح في شربة ميه



اخيرا
نصيحه لكل واحد ربنا اداله سلطه عاليه او منصب او ربنا باركله في صحته
نصيحه ارحم عباد الله ومتستغلش نعم الله عليك
اليوم تقدر وغدا يقدر عليك
وكفاية دعوة واحد مظلوم بسببك تكلفك قد ايه؟؟؟



تحياتي