الموضوع: تعديلات واضافات لكهرباء وتقوية اضواء الريجاتا

السلام عليكم ورحمة الله
انهاردة هنتكلم عن افكار جديدة خاصة بالانوار والكهرباء نبعد شوية بقا عن اي حاجة لها علاقة بالميكانيكا ودوشتها ومصاريفها
هنبدء جزء جزء من مقدمة السيارة الى نهايتها بمشيئة الله .

اولا : فوانيس السيارة الامامية

سألت ف احد المرات عن فانوس الريجاتا لقيتة اغلي 45ج من بتاع الشاهين واستغربت لدة جدا غير انة مش عند اي حد .. اللى عملتة انى غيرت الفوانيس الامامية بفوانيس شاهين"دوجن" .. ايوة شاهين .. مميزاتة اية بقى ؟
1 - فانوس اكبر من الامام وطبعا اضاءة اعلى واحسن
2 - غير شكل العربية من الامام بقت شاهين دوجان
3 - الزجاجة الامامية لما اتكسرت مرة من حبايبنا الحلوين اللى بيركنو جبتها بتسعة جنية من عند اي حد اي بقال
4- لو لقدر الله احتاجت لوش زجاج فانوس امامى .. علشان متتعبش زيي تقولة عايز وش فانوس شاهين دوجان بدون شفة لانى تعبت ف القصة دى كنت بروح اقول "عايز وش فانوس شاهين " وطلع غلط ورجعت قطع اكتر من مرة لحد مواحد كتر خيرة فك لى الفانوس وجاب زية من عندة وورانى الفرق وقالى دة اسمة شاهين دوجن بدون شفة مش شاهين دوجان بشفة ومتوفر كتير جدا عند اي محل قطع غيار ومرمى عند يوسف فى الدقي والكيلانى طبعا

الفانوس رغم انة اكبر لكنة هيركب عادى خالص بدون اي تعديلات بالنسبة للى معة S85
النوفا مش عارف هبقى ابص فى عربية صديق واقولكم كدة مبروك عليك الفوانيس الجديدة واللى اصبح سهل انك تشتري حاجتها من اي بقال والاضاءة بقت اعلى كمان وش الاشارة جبتة بـ 3 ج .. الزجاجة الامامية : 9ج الفانوس 120ج تركي معرفش سعرة حالياَ كام بصراحة

الاضاءة داخل الفوانيس الامامية :
حضرتك هتجيب لمبتين فيليبس اعلى وات اسمهم فيليبس رالي . ولو ملقتش رالى هات اي فيليبس
الوات مش فاكر والله بس هخرج افكها من العربية واقولكم فى المشاركة الجاية . كدة الاضاءة عندك عليت
بصراحة انا ماشى على طول بالنور الصغير العالى دة مش بحتاجة الا لما برعش لحد بس والسبب
ان الاضاءة عالية جداَ والرؤية واضحة جداَ .. " امبارح كنت ماشى على 140 والنور الصغير شغال بس بالليل"
حتى لما دخلت لجنة والنور الصغير كان شغال اتفكرو انى مشغل العالى واضايقو قوي .. فخلي بـالك الاضاءة
هتعلي وهتفرق جامد لما حد يعدى من جمبك قريب منك اطفية لحد ما يعدى .. خلصنا النور العالى والواطى

النور الصغير اللى مع التابلوة فى الفوانيس الامامية :


حضرتك هتجيب كارت تمنة 5 ج هو اسمة كدة كارت لكنة مش كارت كمبيوتر لاء .. هى ورقة فيها لمبتين
حضرتك اختار اي لون يعجبك .. فية ثلجى .. فى ازرق .. فية بنفسجى .. ودى شكلها بالليل
هقول لحضرتك فوائدها اية زى متعودنا :
1 - شكل حلو
2- لما بتطفى كل الانوار عالى وواطى علشان لجنة او حد معدى دول بيكونو منورين بيعرفو للقادم حـدود سيارتك فين
3 - بلاش تجيب اللى فيها خمس الوان دى ولا ست الوان بيقعدو ينورو بالتتابع .. بيحطوها بتوع التاكس الشاهين كتير

كدة مبروك عليك الفوانيس الجديدة والنور العالى والواطى اللى هيعمى الناس والنور الصغير . التكلفة الاجمالية لحد دلوقت :
120 ج فانوس تركى
5 ج كارت اضاءة
80ج لمبتين فيليبس "صيني طبعا مش اصلي "
25ج كــتاوت تركي ضروري جدا عشان تحس بشدة الاضاءة
---------------
230ج للفانوس الواحد بحاجتة
لو مش عايز تجيب التاني عادى براحتك امشى كوكتيل حتى الناس تحس انك مختلف باردو :)واستايل

التركيب:
اسهل ما يكون .. ومش محتاج تخريم او اي تعديل فى سيارتك هتبقى فبريكة زى مهية .. فية 3
مسامير ولهم صواميل وورد .. ركب الفانوس فى مكانة ومن الناحية التانية جوة الكبوت ركب الورد والصواميل
وبس كتر خيرك تعبناك معانا حبة انهاردة .. علماَ انى فكيتة بنفسى اكتر من مرة الموضوع سهل بمفتاح عشرة بلدي

خلصنا الفوانيس الحمد لله ندخل على فوانيس شبورة :


الفوانيس دى جبتها بـ 50ج وفائدتها هى بتخليك تشوف كويس ف الشبورة .. انا مركبها تحت ف الاكصدام
مخبيها .. وانصحك تعمل زيي تخبيها علشان المرور واللجان .. وفية سبب افضل انها تنور لك الطريق من تحت
تكشف لك المطبات بكل سهولة ويسر .. وانا مركبها اساسا للسبب دة لكشف المطبات والنقر القريبة منك وتعمل لها مفتاح جوة التكاليف :
1 - فوانيس شبورة " ليزر " 50ج
2 - 30 مفتاح داخلى وسلك وكتاوت ومصنعية
الاجمالى 80ج معرفة بقى وكدة ;)
اهم حاجة تركب لها كـتاوت .. وتكون تركي حصل موقف سيئ للاسف " من ضمن مواقف كتيييير صدفتها عيزة لها موضوع لوحدة للاخطاء الصنيعية " اول يوم تركيب حضراتهم اعترضو وقالو مش محتاجة كتاوت انت غاوي مصاريف ؟ احنا بنركبها على عربيات كتيرة بدون كتاوت . طبعا اي حد خبير فى الكهرباء هيبقى عارف ان الكتاوت عبارة عن دائرة بتفتح وتقفل لا هي بتعلي ولا بتوطى .. لكنها هامة جداَ لانها بتستحمل مرور امبير عالى للمبات وعلشان كدة لما حد بيغير كتاوت بيحس بشدة اضاءة ويفتكر ان الكتاوت بتعلي اضاءة لاء .. كل ما فى الامر انها سمحت بمرور كمية امبير اعلى
وبالتالى بقت الاضاءة اعلى واحسن .. دة شكل شائع للكتاوت

اخدت العربية منهم ومشيت بعد مركبت فوانيس الشبورة بدون كتاوت واللى حصل زي متوقعت والله وكان قلبي حاسس رغم ان مش مجال شغلي ف الكهرباء الا انى حافظ الكهرباء ظهراَ عن قلب فى حاجات كتير .. المهم اللى حصل بعد اضاءة لعشر دقائق السلك سخن واتحرق ولقيت دخان من الكبوت كثيف جدا , بطلت العربية وركنت على طول بفتح الكبوت لقيت دخان اسود كثيف مش عارف احدد مكانة طلع السلك وصلو دايركت بدون كتاوت والسلك عمل القصة دى وكان ملفوف حوالين الكتاوت بتاعة النور .. وطبعا الكتاوت من برة بلاستك وسيحتة.. فصلت كل اسلاك الفوانيس الجديدة
حطيت المفتاح ف الكونتاكت لقيت النور ضعيف جدا ومفيش مارش ولا اي استجابة خرجت" لان كدة فية قفلة "
قطعت الاسلاك بتاعة النور كلة وفصلت كتاوت النور اللى ساحت ورميتها ف الشارع .. دخلت دورت وتوكلت على الله
رجعت البيت وانا علي اخري وماشى بالليل من غير اي نور ولا حتى اشارة تانى يوم الصبح جم لقونى قاعد على باب المحل عملت لهم فيلم وكانو مش مصدقين اللى حصل وشافو السلك اللى ساح .. طلبت منهم على مسؤليتى الشخصية تغيير
كل الاسلاك اللى لها علاقة بالنور وفوانيس الشبورة بأتخن خلى بالك من دى .. بلاش السلك بتاعهم الضعيف دة
بعدها قلت لهم ركبو كتاوت قالو لا يمكن السلك اللى عمل كدة قلت لاء كتاوت .. ومن ساعتها كل شيئ تمام الحمد لله



نعمل بقا تعديل على فوانيس الشبورة " غير مهم "
وهو شراء اي سي من اي حد بيصلح تلفزيونات او من باب اللوق رقمة :
Z-05
وتشتري نفس اللمبتين اللى فى الفوانيس بس بلون ابيض والسبب انها هتنور اصفر ولما تسخن هتفصل وتنور ابيض
وبالتالى اصفر هتبقى شايف فى الشبورة صح ؟ النور الابيض هتبقى شايف بالليل بشكل افضل بكتير وهتحافظ على اللمبات لاطول مدة ممكنة وبدون اي تدخل منك ابداَ دى وظيفة الاي سى دة .. ودى خطوة غير هامة ولازم تفتح الفوانيس

الصـالون :
بالنسبة للصالون اول حاجة هتعملها انك تغير اضاءة التابلوة بشريط ليدات تمنة 20ج باللون اللى يعجبك
ودى خلي اي كهربائى يعملها لك .. انا عندى معمولة جاهزة كدة اشتريت العربية بيها كدة ومش بتاخد وقت مع الصنيعي

بعد كدة نـور الصالون :
جبت ليدات تمنها
35ج بس لونها ابيض ودى صورتها ولونها وهى شغالة ومطفية



ركبت اتنين فى الامام واتنين فى الخلف .. اللى فى الامام شغلتهم بمفتاح نور الصالون
وفصلت نور الصالون الاصفر .. للاضاءتة الضعيفة .. النور الخلفي شغلتهم مع النور الصغير بينورو معة
شكلهم تحفة بالليل وبيخلو اي حد ماشى وراك ياخد بالة منك .. وغير مكلفين ..


لو حضرتك مش عجبك شكلهم رغم ان شكلهم كويس ممكن تحطهم جوة نور صالون الفبريكة .. افتح غطا نور الصالون
وألزقهم جوة واقفل الغطا .. هينورو ابيض باردو وهما جوة وكدة انت معدلتش اي حاجة فى الفبريكة . بس المشكلة
ان الاضاءة هتبقى اقل لان الغطا دة اصفر من الشغل لدرجة انة بيعيق عملية الاضاءة ودة السبب اللى خلانى فضلت
اركبهم برة . بعد كدة ركب فانوس استوب على الزجاج الخلفي .. وياسلام لو تركب سنتر لوك وانذار وازاز كهربا لو مفهاش انا ركبت كل حاجة الا الزجاج الكهربا .. سنتر وانتذار .. الزجاج بعد مشدها دوكو بأذن الله
احنا خلصنا الجزء الاول .. ناخد استراحة لحد منجهز صور الجزء التانى اترككم فى رعاية الله .. وارحب دائما بأي استفسار

لالالا لو هتغير الاصفر بالابيض فقط يبقى مش محتاج الاي سي خالص
انما لو هتشغل الاتنين مع بعض يبقى محتاج الاي سي .. وظيفتة للمرة التانية .. هحاول اشرحها بشكل مفصل المرة دى

احنا لو وصلنا دويتين " 2 دواية لمبة " ووصلناهم على نفس السلك .. لما حضرتك تنور الفانوس اية اللى هيحصل ؟ اللمبتين هينورو سوا صح ؟
وطبعا كدة عالى جداَ ومستهلك كبير لطاقة البطارية وحمل على الدينمو .. غير ان الفانوس مش هيستحمل سخونية الاتنين سوا صح ؟
الاي سى وظيفتة انة بيفصل واحدة وبيشغل التانية بعد فترة ... طيب هستفيد انا بأية من القصة دى ؟
اولا : لما اللمبة بتسخن بعد نص ساعة تقريبا بتفصل وتشغل اللمبة التانية .. وبكدة بنحافظ على عمر اللمبتين .
ثانيا : علشان ترجع للوضع الاول وهو الاصفر .. اطفي زر الفانوس .. وشغلة تانى . هيشتغل على الوضع الاول تانى لنفس المدة .
هتستفيد انك معاك فانوسين فى فانوس واحد ... فانوس شبورة اصفر .. فانوس بأضاءة بيضا ليلاَ .. فى فانوس واحد بدون اي بهرجة
ولا هتحول اكصدام العربية لتوك توك . غير شكلة الجمالي كويس والفانوس دة بالذات فية مساحة جوة تقدر تحط لمبة معة
الفانوس اللى عند حضرتك ياريت لو تصورة وترفعة نشوفة لان ممكن ميكونش فية مساحة كافية جوة .. ملحوظة جانبية : توقيع حضرتك
ممتاز ولة معنى .. فعلا حصالة مخرومة الحمد لله ... انا شفت لحضرتك ردود مواضيع كتيرة منها موضوع الديفل اللى صدعك.. عرفتها من توقيع حضرتك :) .. نورت وتحت امرك ف اي استفسار اخر