المشاركة الأصلية كتبت بواسطة adham
كلام حضرتك سليم تماماً يا استاذ توت عنخ امون
و كتير بيسيبوا عربياتهم و ينزلوا بالمواصلات و انا منهم بسبب حرق الدم في الزحمه و البحث عن ركنة , و اي مشوار وسط البلد او في مكان صعب و زحام او بيوفر لة مواصلة سهلة و محترمة نسبيا الواحد بيسيب عربيتة, و تقريبا استعمالها بقى للخروجات العائلية و السفر فعلاً
و افتكر زمان اول مشورع الميني باص الحكومي (الابيض بتاع زمان) كان فعلا وسيلة مواصلات ادمية و محترمة و سعرها معقول (كان تقريبا 35 او 40 قرش سنة 90 مثلاً ) و فاضي و اول ما يتملي مايركبش حد و لا يقف في محطات محدش نازل فيهأ, و يركب فقط مكان اللي ينزل يعني ماتلاقيش واحد واقف فية, مش دلوقتي الواقفين اكتر من اللي قاعدين, ناقص يلغوا الكنب و يخلوة وقوف و بس
دلوقتي فية مئات خطوط خاصة بشركات خاصة (الميني باص الاخضر ابو جنية و نص) و زحام بشع و ماتلاقيش مكان تقعد
طيب دة انا من اسبوع نزلت الخليفة المأمون بالاتوبيس المكيف السي تي اية ابو 2 جنية تصدق راكب من اول الخط في مدينة نصر وواقف و زحام لغاية ما وصل
زمان كان بيبقى فاضي و تركب و تقعد و تكييف لغاية ماتوصل ماتلاقيش بني ادم واقف
الحكومة حلت مشكلة التقاطعات الصغيرة والمتوسطة بالحل الحكومي الجذري ...... و هو الالغاء من اساسة
زي تقاطعات مصطفى النحاس مع عباس العقاد و مكرم عبيد و حسن مأمون
لغوا التقاطعات كلها و عملوا يو تيرن قبلها و يو تيرن تانية بعدها .... كأنها بتقول للناس انتوا قاريفننا طيب اهوة شلنا التقاطع و لغينا الاشارة و العسكري و اتصرفوا انتوا سوا بقى مع بعض
و النتيجه انك بتمش مسافة اطول و بتتعطل وقت اكتر و الناس كلها بتتكالب عاليوتيرنات و بتزنق على بعض و الشارع بيقف و العربيات بتتحك و تتصادم اكتر