استفسار عن رائحة عجيبة من ناحية الكاوتش

السلام عليكم، من يومين كده بدأت أشم رائحة عجيبة تشبه ريحة مطاط أو حديد سخن مش قادر أقدر بالضبط بتيجى كل فترة ساعات أنا أشمها وساعات اللى قاعد جنبى، هى ما بتبقاش مستمرة ولمدة ثوانى كده وتروح، ممكن مثلا فى مشوار ساعة أشمها مرتين تلاتة وبحس بيها أكتر ساعات لما آجى أهدى أو أوقف العربية أو لما أرجع لورا، المهم فى الأول شكيت أنها تكون جاية من ناحية الموتور بس أتأكدت انها مش من حوض الماتور خالص وبعدها اكتشفت انها من ناحية الكاوتش، ساعات بتبقى من الاتنين اللى ورا بس أو واحد فيهم وساعات من الاتنين اللى قدام أو واحد فيهم ومش فاهم دى ممكن تبقى إيه

على ما اعتقد انها ريحة تيل الفرامل

أنت بتكبس وأنت بتفرمل؟؟
وغيرت تيل قبل كدا ولا لأ؟

و ممكن يكون التيل قافش

العربية عاملة 6500 كيلو بس لغاية دلوقى وما أعتقدش انى بكبس فرامل وإلا أشمعنى اليومين دول بس !

ماهو يا اما تيل فرامل وممكن يكون قافش
يا اما اسطوانة دبرياج واعتقد دية صعبه فى عربيه لسه جديده

على العموم أنت محتاج تشييك على نظام الفرامل كله
تيل بطنابير بكله

اقتباس:

---

المشاركة الأصلية كتبت بواسطة moustafa_saad

ماهو يا اما تيل فرامل وممكن يكون قافش
يا اما اسطوانة دبرياج واعتقد دية صعبه فى عربيه لسه جديده

---

اسطوانة دبرياج !!!! ربنا يطمنك :))
بس عاوز أقول حاجة حاجة زى دى تحصل فى عربية أتوماتيك؟! ... ده أول حاجة
تانى حاجة: لو اسطوانة دبرياج المفروض الرائحة تظهر جوه حوض الماتور وده مش حاصل خالص ,انا اتأكدت من ده كذا مرة وكمان الرائحة فى أوقات ظهورها بتبقى أكتر مع العجل اللى ورا فى الوقت اللى بتبقى فيه مش ظاهرة قدام خالص وساعات طبعا العكس بس أقل

ya 3m shaiek 3la el hand brake w 2t2kd 2nk mnazelha ll2a5er

اقتباس:

---

المشاركة الأصلية كتبت بواسطة aaet1

اسطوانة دبرياج !!!! ربنا يطمنك :))
بس عاوز أقول حاجة حاجة زى دى تحصل فى عربية أتوماتيك؟! ... ده أول حاجة
تانى حاجة: لو اسطوانة دبرياج المفروض الرائحة تظهر جوه حوض الماتور وده مش حاصل خالص ,انا اتأكدت من ده كذا مرة وكمان الرائحة فى أوقات ظهورها بتبقى أكتر مع العجل اللى ورا فى الوقت اللى بتبقى فيه مش ظاهرة قدام خالص وساعات طبعا العكس بس أقل

---

ياباشا متقلشى ما اؤلتلك دية صعبه علشان العربيه جديده
وعموما لو عربياك فى الضمان وديها الضمان احسن
وطالما الريحه من ورا احتمال العجل الورانى بيقفش ساعات وساعات لا وده عادى يعنى ممكن القفشه تروح وتيجى وان شاء الله بسيطه

النهاردة حجزت مع الوكيل فى روكسى وقلت أكشف على الرائحة دى وحصل وطبعا كل اللى حصل انهم قالولى بعد ما اشتغلوا فى العربية ان الموضوع جاى من ان تيل الفرامل فيه رايش وده عادى من الاستعمال ونظفوه، وانى ماقلقش من ارائحة لأنها عادى

النتيجة: الفرامل حاسس ان قفشتها بقت أحسن شوية ولو ان الرائحة ما اختفتش تماما والملاحظة الجديدة انى بحس بيها لو مثلا معدى على حاجة زى قضبان مترو - بالعرض طبعا :))-

المهم قررت أكبر مخى وأشوف

طب الواحد يعمل إيه مع الوكيل ده، الريحة رجعت تانى، وانا ملاحظ انها بتحصل بعد مشى مسافة طويلة وبعدين أعدى مثلا على أرض خشنة أو عين قطه أو قضبان مترو، يعنى المختصر المفيد ان بتوع روكسى ما عملوش حاجة، وأنا بصراحة مش قادر أقتنع انها حاجة طبيعية وخصوصا خلال ال 7 شهور اللى فاتت عمرى ما شمتها ... اشمعنى يعنى اليومين دول، الواحد مش عارف يعمل إيه

طيب جرب تروح أبو رواش أفضل كدا وفهمهم أنها حاجه جديده ومش أعتياديه معاك
وبصراحه لو كان من التيل كان المفروض الريحه تطلع معاك فى أى كبسه فرامل وملهاش علاقه بشكل الطريق!

لا والله ده مش اللى بيحصل، طب شوف الغريب كمان، بعد مشوار طويل حبتين وممكن يكون فيه استعمال فرامل، مافيش أى ريحة، بعديه دخلت على كذا مطب صناعى ورا بعض بمسافات قصيرة، أشم الريحة مع المطب الأول بس !!!!!!! وخلاص .... لدرجة انى فكرت تكون سخونة العجلة مع المشى الطويل وبتطلع مع أول حكة فى الأرض او مع اول تهدئة للسرعة تسمحلها تطلع عندى فى الصالون .... الواحد قرب يتجنن، الماتور من جوه مافهوش ريحة أبدا

سؤال تانى، هو صحيح الاتوماتيك مافهموش فكرة اسطوانة الدبرياج !!!!

مدام الريحه في المطبات يبقي في حاجه مفكوكه بتحك في الجنط او الطنبوره بدليل لما العربيه تتهز الريحه بتطلع

اه الاوتوماتيك مفهوش اسطوانه بس في موديلات حديثه فيها ديسك ومحدش يقولي ازاب لاني شوفتاها في باسات2009 بعيني والفتيس مفكوك

اقتباس:

---

المشاركة الأصلية كتبت بواسطة loshabih

مدام الريحه في المطبات يبقي في حاجه مفكوكه بتحك في الجنط او الطنبوره بدليل لما العربيه تتهز الريحه بتطلع

اه الاوتوماتيك مفهوش اسطوانه بس في موديلات حديثه فيها ديسك ومحدش يقولي ازاب لاني شوفتاها في باسات2009 بعيني والفتيس مفكوك

---

بس الحاجة المفكوكة دى على الأربع عجلات ... الريحة مرة من العجلة دى ومرة من العجلة التانية، النهاردة واحد صاحبى شامها وقالى انها تشبة ريحة الزيت السخن فى الطاسة الألومنيوم !!!!

لا كده تبقي فعلا حاجه غريبه شوف كده زيت الفرامل بينقص ولا لا؟؟