زلزال؟ طيب كنت فين في الأولاني؟

**OlaOsman** · 28-03-2008 12:01 PM

بيقولوا في زلزال حصل امبارح الساعة 2 و نص الصبح و كان عنيف.. حد حس بيه؟

طيب بالمناسبة بأه.. انتوا كنتوا فين يوم زلزال 1992؟ اليوم ده صعب يتنسي بأي حال من الأحوال.

انا يومها كنت في البيت، كنت لسه في ثانوية عامة و رجعت من المدرسة و باحضر الأكل مع ماما فوجئنا الأرض بتتزلزل من تحتنا.. طبعا افتكرنا ان البيت بيقع.. و ماما على لسانها الشهادة و عمالة تقول لنا قولوا الشهادة ياولاد.. كله طبعا ساب اللي في إيده و جري على برة.. ماما لمانا تحت دراعها و بتخرج بينا من الشقة و انا داخلة جوه تاني.. رايحة فين يا علا؟ داخلة أجيب الإيشارب.. مش خارجة من غير حاجة على راسي.. ثواني و كنت حاطة الإيشارب على راسي و خارجة.. على ما كل ده حصل كان الزلزال بطل :o

لما لقينا الناس كلها هي كمان في الشارع عرفنا انه زلزال.. يااااااااااه.. ده كان يوم.

**OlaOsman** · 28-03-2008 12:09 PM

معلش يا جماعة.. العنوان شكله عامل زي خناقة.. مش عارفة طلع مني كده ازاي.. لما جيت اقراه بعد كده لقيتني كإني بابكت فيكوا :o

**theking2690** · 28-03-2008 12:15 PM

انا الصراحة ساعة الزلزال كنت بيبى كان لسه عندى سنتين و كل البيت نزل و نسيونى فوق و بعد كده ماما طلعت جرى جابتنى

**OlaOsman** · 28-03-2008 01:24 PM

المشاركة الأصلية كتبت بواسطة theking2690

انا الصراحة ساعة الزلزال كنت بيبى كان لسه عندى سنتين و كل البيت نزل و نسيونى فوق و بعد كده ماما طلعت جرى جابتنى

اكيد اتخضيت اوي.. و لا ما لحقتش؟

**alaa_dash** · 28-03-2008 01:39 PM

ههههههههههه احنا كنا برة مصر و انا فاكر انه كان عند قريب لينا بيت قديم اللي هوه الشقة متأجرة فيه بخمسة جنية و الحاجات ديه ...و لما قريبنا ده سمع عن الزلزال اول حاجة عملها سأل على البيت وقع ولا لاءة عشان السكان ما كانوش عايزين يسيبوه ....و للأسف (بالنسبالوا طبعا)البيت واقف وتد و لا كأنه حصل حاجة !!!

**aif** · 28-03-2008 02:02 PM

انا كنت يوميها في جدة .... وكنت باكلم خطيبتي اللي هي زوجتي دلوقتي في التليفون ... عارفين كنت باكلمها لييه ؟
كنت بأخطبها ...... كنت باعرف رأيها ( مع اني كنت عارفه ومتأكد منه )لكن شكليات بقي :D
ولقيتها بتنهج وصوتها غريب قلتلها .. هو فيه ايه
قالتلي اصلنا لسة طالعين من تحت ... اصل كان فيه زلزال وسيبنا البيت كلنا ونزلنا
وطبعا بعدها كلمت بيتنا اطمنت .. رد عليا والدي وقال لأ مافيش حاجة احنا ما حسيناش باي حاجة وده طبعا لأن والدي كان سايق العربية وما شعرش باي حاجة ... وبالليل شوفت المناظر في التلفزيون وجالي حالة هلع وذهول
وبعدها قعدت 20 يوم 00 كل يوم اعمل اكتر من 100 محاولة عشان اكلم مصر في التليفون ولا يمكن .. حتي الساعة 3 الفجر وما فيش فايدة .. الخطوط كلها عطلانة وعليها ضغط رهيب .... لدرجة اني بقيت ابعت لهم برقيات عشان يطمنوني

بس المهم اني كنت اخدت الرد الرسمي في موضوع الخطوبة ... وده كان زلزال حبنا ;):p:D