الموضوع: حوار حول دواسة البنزين الكهرباء

في الحقيقة يا أخ توت انا شفت الروابط اللي أستاذنا الغالي حاططها
مع العلم اني كنت قريتها قبل كده من أول ما الموضوعات اتعملت ويمكن تابعت الردود اللي فيها صفحة ورا صفحة..

الفرق هنا اني مش باتكلم عن تكنولوجيا الدواسات الكهربا عموما كـPrototype
لكل عربية حالتها لخاصة ولكل شركة تحسيناتها أو تطويراتها على الـPrototype ده

أنا باتكلم على جزئية تانية خالص مدمجة في كنترول العربية لتنظيم إشارة الدواسة الكهربا دي وبناءاً عليها تنظيم خروج عزم الموتور على مراحل متتالية

السؤال بقا..
حضرتك قبل ما تحط الرد بتاعك جربت قيادة سيارة اسبيرانزا ؟؟
لو الجواب بـ (لأ) يبقا عمرك ما هاتقدر تفهم اللي انا باتكلم فيه

نفس الكلام أستاذ ممدوح بدليل انه مش عارف اذا كان فيها ABS ولا لأ !!
وفيه برضه أخ رد عليا سابقا رد مطول وفي الآخر بيسألني هي اسبيرانزا فيها دواسة كهربا أساسا ؟!


اللي معندوش إمكانية يجرب قيادة اسبيرانزا عشان يفهم قصدي (مفيش حد يعرفه معاه اسبيرانزا)
يحاول يشوف رينو فلوينس الجديدة أو بيجو 307 موديلات فوق 2006

الاتنين انا جربتهم والاتنين فيهم نفس التكنولوجيا اللي باتكلم عنها
عاوز بقا حد ييجي يقوللي الاتنين عزمهم قليل ومواتيرهم مكسحة

يا جماعة أقسم بالله أنا مش واحد من الفانز اللي بيهتفوا بحياة العربية وخلاص !!
لكني فعلا كنت مستغرب دواسة البنزين بتاعتها أول ما اشتريتها (نظراً لأني نازل من بروتون Gen2)
وفي مرة وانا باعمل صيانة فتحت الموضوع مع احمد مهران وقعدنا اتناقشنا فيه كتير أوي وقعد يشرحلي لحد ما فهمني..

بالمناسبة
التكنولوجيا دي ليست ذات صلة من قريب ولا من بعيد بالتراكشن كونترول
التراكشن كنترول قايمة أساسا على وجود 4 سنسورات على الاربع عجلات لقياس سرعة كل عجلة على حدة + التحكم في العجلة اللي سرعتها تزيد عن طريق الـABS

أما اللي انا باتكلم فيه حاجة شبيهة بتأخير استجابة الدواسة بقدر معين بطريقة تجعلك لا تستطيع استخراج قوة مفرطة بشكل مفاجيء وده اللي بيمنع الفرك..
انما لو واقف على تراب أو مية أو زيت هاتفرك عادي (وده مابيحصلش مع التراكشن كنترول)

الرسمة دي أعتقد توضح كتير من اللي عاوز اوصلهولكم


الخط المستقيم هو الاستجابة العادية لأي دواسة الكترونية
الخط الملتوي هو الاستجابة اللي باتكلم عنها

في زمن معين الاتنين بيصلوا لنفس القوة في نفس الزمن
مع اختلاف الـIncrement
الأولي بتزيد زيادة ثابتة في كل مرحلة
التانية في الأول بتزيد زيادات قليلة وبعدين تزيد زيادات كتيرة
قللت الفرك في الطلعة وبعدين بعد ما طلعت وخدت سرعة حركية تبتدي بقا تديك عزم قوي للسحب

في المثالين اللي في الرسمة انت في زمن ثابت قدرت توصل لنفس النقطة اللي بتطلع نفس العزم من الموتور
بس الخط المستقيم يديك Acceleration أقل من التاني

راجعوا كلامي بالمشاركات اللي فاتت وقارنوه بالرسم التوضيحي
افتكروا لما كنت باقول مهما تكارك بنزين العربية ترفض انها تنتش
شوفوا الفرق بنفسكم عالرسمة واختار نقطة افتراضية كأنها هي اللي هاتوصل عندها لما تكارك وشوف فرق العزم اللي طالع عندها في الحالتين
في الخط المستقيم يطلع عزم عالي وفي الخط التاني يطلع عزم قليل
مانقدرش نعلل ده بضعف عزم الموتور لأن الخطين على نفس الرسم
الاتنين نفس النتيجة في الآخر لكن الفرق في الـIncremention

وعلى فكرة العربيات الدايو والبروتون عاملين في الكنترول بتاعها حاجة شبيهة لكده لكن بشكل معكوس
وهو برضه بنفس المنطق بيتحكم بالدواسة الإلكترونية لكن الفرق انه بيتحكم فيها أثناء الـDeacceleration أو التباطؤ
والهدف منه منع الانحسار المفاجيء لعزم الموتور أثناء تبديل الغيارات
وتشوفه لحظة ما بتدوس عالدبرياج تلاقي الآر بي ام يفضل ثابت لحظة وبعدين لما يبتدي يقل يقل تدريجياً ببطء شديد رغم انك فاصل التعشيق

أعتقد أستاذ ممدوح معاه دايو وانت معاك جين تو
ممكن تاخدوا بالكم منها لو لاحظتوا عداد الآر بي ام أثناء نقل الغيارات مع مقارنة نفس العملية بعربية تانية