يا ولاد الحلال

**farawl** · 30-12-2010 08:52 AM

السلام عليكم
موضوع شراء عربية مستعملة جابلي الضغط ، اولا انا مابفهمش حاجة في العربيات وخد عندك بقي لما قلت انا هجيب عربية .
الناس:- معاك كام
انا:- 40000 بس يهمني اول قطع الغيار والصيانة لان مرتبي ضعيف شوييييييية
الناس :- كويس اول خليك في الاكسنت ولازم تجيبها كوري لان تقفيل المصري زفت 1500 cc تبقي كويسة وقع الغيار والصيانة عند البقال ورخيصة
ناس تانية :- يا عم حرام عليك هاتلك حاجة نوبيرا عربية واسعة وحلوة وصيانتها وقطع غيارها برضة علي قد الايد
ناس تالتة :- يا عم النوبيرا عفشتها زبالة خليك في الكريستالة عربية يباني برضة وحكاية قطع الغيار والصيانة هتبقي اغلي شوية بس اللي هتحطة هتنساه
ناس رابعة :- حرام عليك تجيب مستعمل مهما كان مستعمل وزي البطيخة الله اعلم الية اللي جواها والشعب المصري ما بيسيبش حاجة كدة لله ( لو كان فيها خير ما كان رماها الطير ) وهتاخد معاك ميكانيكي او سمكري ممكن يلبسك في الحيط وسوق الجمعة كلة نصابين ......... بص احسن حل انك تجيب جديد
انا :- بس انا ممعاييش اللا 40 الف
الناس الرابعة :- مش مهم ممكن تروح بنك ناصر وتدفع المبلغ دة ودة فايدتهم 6 % بس يعني هيبقي احسن من المستعمل - هاتلك عربية تكون مش غالية اول زي الشيفرولية اللانوس او الرينو اللوجان
انا :- بس دة هيزنقني مش اقل من خمس سنين في قسط مش اقل من 650 جنية في الشهر والدنيا بقت صعبة اول اليومين دول
كل الناس :- انتا حر اعمل اللي يعجبك احنا نصحناك وضميرنا ارتاح
وسابوني مش عارف افكر في اي حاجة دماغي اتجمدت انا موضوع العربية مهم بالنسبة ليا علشان البيت والاولاد وكسرت الفلوس دي بالعافية بطلوع الروح اخبروني بالله عليكم ماذا تفعلوا لو كنتم مكاني .

**mohamed9999** · 30-12-2010 09:59 AM

النوبيرا حل كويس جدا لو حالتها نضيفه

**most_wanted** · 30-12-2010 11:23 AM

انا شايف ان ال3 عربيات دوول حلوين فعلابس الافضل تجيب الكريستاله حتي لما تيجي تبعها هتلااقي ليها سوق اكتر من الاكسنت والنوبيرا

**nadergoom** · 30-12-2010 12:03 PM

ممكن فيرنا اوتو ماتيك بس تكون حاله نظيفه او نوبيرا بس اهم حاجة حالة العربيه

**farawl** · 30-12-2010 12:28 PM

المشاركة الأصلية كتبت بواسطة most_wanted

انا شايف ان ال3 عربيات دوول حلوين فعلابس الافضل تجيب الكريستاله حتي لما تيجي تبعها هتلااقي ليها سوق اكتر من الاكسنت والنوبيرا

المشاركة الأصلية كتبت بواسطة mohamed9999

النوبيرا حل كويس جدا لو حالتها نضيفه

طيب اخبار قطع الغيار للكرستالة اية والنوبيرا رايك فيها ايةويا ريت مقارنة بسية يبقي كتر خيرك

**ibrahimsaad** · 30-12-2010 01:30 PM

مافيش احلى من الزيرو طبعا لو معاك فلوس لكن بما انك زى حالتنا ولعن الله الدين هم بالليل ومزله بالنهار

فجيب حاجه نضيفه وكويسه وابعد عن الفيرنا موتور قوى على جسم خفيف وفرامل غير متناسبه مع قوه الموتور وحوادثها بشعه

النوبيرا هى نفسها اللانوس بس 2000 سى سى استهلاك بنزين عالى جدا وحجم اكبر على نفس عفشه اللانوس فده بيعتبر حمل زائد على العفشه فابعد عنها

ارشح لك الدايو لانوس او اكسنت بحاله جيده وموديل فوق ال 2000 وربنا يوفقك

**AlGazar2** · 30-12-2010 01:40 PM

النوبيرا مش 2000 سى سى و مش على نفس عفشة اللانوس النوبيرا 1600 سى سى و اكبر من اللانوس و صالون اوسع و ثبات اكتر

**farawl** · 30-12-2010 01:54 PM

يعني استهلاك البنزين في النوبيرا اكتر من الانوس ؟
واية افضل موديل في الاتنين ؟
واسعارهم في الحالة الجيدة تبقي اد اية؟

**srm** · 30-12-2010 02:05 PM

دور على لانوس او اكسنت نضيفه واكيد ان شاء الله هتلاقى

وريح دماغك من القسط .......

والعربيتين ان شاء الله هتلاقى فيهم اللى انت عايزه

قطع غيار متوفره ورخيصه وعليها طلب لو حبيت تبعها

**beshoylove1** · 30-12-2010 05:44 PM

انا رأيي تجيب نوبيرا بس حاول تدور على عربية حالتها حلوة و متسمعش كلام الناس اللي بتقول انها بتستهلك بنزين كتير و ان العفشة وحشة هي عربية عائلية من الدرجة الاولى و تعتبر اوسع عربية في العربيات اللي انت بتقارن بينهم و ماتورها جامد جدا لأنة على اتنين كامة وبيدي عزم كبير يعوض حجمها ... اما للعفشة فا انا لية واحد صحبس معاة نوبيرا مو 2000 اول مرة العربية يتعماها عفشة كان من شهرين تقريبا كل حاجة فيها فابرقة و غسر شويت جلب و بيض مكملوش 200 جنية مع العلم ان العربية عملة 180000كم .......وفي الاخر الاختيار ليك انت متسمعش كلام الناس شوف الانسب ليك واتكل على اللة و بالتوفيق انشاءاللة