الموضوع: متشيلش فى نفسك

الموبايل على ودنها وتتكلم بعصبية شديدة وفى يدها الاخرى ايس كريم وسايقة بسرعة جنونية ب2 صباع بس بتوجه بيهم الدركسيون"انا تلطعنى ساعتين ومتجيش خلاص انتهى ولا فارق معايا"

طبعا بعدت عنها قدر المستطاع بصيت فى المراية لقيتها ورايا بسرعة مهولة ربنا يستر افتح لها الطريق احسن رحت يمين وشاورت لها بيدى عدى

لكنها انحرفت فى نفس اللحظة يمين ودخلت فى العربية من ورا بكامل قوتها وتتحول بقدرة قادر الى سيارة سبور هاتش باك لأن سيارتها دخلت فى الشنطة الخلفية والكنبة معادلهاش اثر

نزلت وهى نزلت فى ايدها الموبايل والأيس كريم "يلا باى احسن عملت حادثة-لأمفيش حاجة انا كويسة

واحدة واقفة بتقول:شوفى ياختى البت فشفشت عربية الراجل وواقفة ولا هاممها هو احنا كنا بنات ياختى

وواحد قال:يعنى هى خبطته ازاى تلاقيه كان بيعاكسها ماهو كل واحد راكب عربية فاكر نفسه فالانتينو

اما هى فاتصلت عالموبايل:بابى عملت حادثة فى صلاح سالم معرفش هو اللى كان ماشى قدامى

بعد فترة وصل بابى اول ما شافته رمت نفسها فى حضنه "اعصابى يا بابى انا منهارة

"خلاص ياماما اهدى محصلش حاجة

وبص للعربية "مالكو مكبرين الموضوع كده ليه شوية سمكرة ودوكو وتبقى احسن من الأول

قلت :يا فندم دى سايقة والموبايل فى ايد والأيس كريم فى ايد

هنا ثار البيه"انت هتربى بنتى الخبطة كنت ناوى اعملها لك بس مادام طلعت كده اضرب دماغك فى الحيط يللا يا انوس"

واحد واقف قطمنى"يا اخى كانوا حيعملوا لك العربية لازم تتسحب من لسانك

تركت نصف السيارة وحلفت مانا سايبهم
كلمت طلبة بيه حلف يرجع لى حقى تالت ومتلت

مر اسبوع وكلمته قال اصبر اصل ابوها كلم منصور بيه بس وحياتك ما هسكت هكلم وهبى بيه الموضوع ده بقى تحدى بالنسبة لى
رحت لوهبى
بيه قال طلبة بيه طلباته اوامر بس ابو البنت كلم ناصف بيه عشان يلموا الموضوع انا بقى مسكتش صعدته لمرتضى باشا

نزلت من عنده وانا مقرر اكلم الأسطى بلبل بيه السمكرى يعمل العربية واللى اتوسط لى عنده الحاج ضيف بتاع وكالة البلح!

اعلانات