المشاركة الأصلية كتبت بواسطة wesam_salom
هحكى لكم عن موقف كوميدى جدا مع الشحاتين ولاد الناس حصل مع والد صديق ليا
والده على المعاش ومرتبه بيتحول على البنك
راح يسحب فلوس بالفيزا لقى واحده واقفه قدام البنك
ست كبيره ومحترمه وشيك جدا
طلعت له بطاقتها والفيزا بتاعتها و10 جنيه وقالت له وهى مكسوفه جدا
انها كانت منتظره تحويل من ابنها فى السعوديه والتحويل مجاش وهى دلوقتى مضطره ترجع اسكندريه
بس المشكله ان كل اللى معاها 10 جنيه وهى محتاجه 10 جنيه كمان علشان الديزل
طبعا اى انسان ممكن يقع فى ظرف زى ده
اداها 10 جنيه ودعت له وطلبت رقمه او اى طريقه علشان تعرف ترجع الفلوس تانى مرضيش
معدى بعدها بفتره لقاها واقفه بتعمل نفس الحركه مع زبون تانى
صمم ياخد حقه
رجع بعد فتره ووقف يسحب فلوس وفضل ماسك الفلوس وبيعدها لحد ما عملت معاه نفس الحركه
قالها بس انا معييش 10 جنيه فكه معايا عشرينات بس
هاتى العشره وخدى العشرين
اول ما مسك الفلوس قالها يا تيييييييييييت يا بنت التييييييييت
دى فلوسى اللى انتى نصبتى عليا فيها المره اللى فاتت
راحت مصرخه وماسكه فيه وفى الفلوس اللى فى ايده والناس اتلمت
قالت انه سرق منها الفلوس اللى لسه ساحباها من البنك وكان عاوز يسرق شنطتها وبيتحرش بيها من بدرى وماشى وراها بعربيته:_Alshmokh23[1]:
طبعا لولا انه شكله محترم كانت الناس قطعته فى الشارع
وولاد الحلال قدروا يخلصوه من ايديها وايدين الناس اللى عاوزه تضربه بعد ما خدت ال300 جنيه اللى سحبهم وكان ماسكهم فى ايده
وفص ملح ودابت
وطبعا كان معاها تنين ستات شهدوا عليه:36_1_61[1]:
وطبعا الناس صدقتها اول ما طلعت الفيزا والبطاقه وانها موظفه فى شركه ولبسها يدل على كده
ولحد النهارده الموضوع ده مجننه:POINTIy2[2]: ومحسسه انه اتنصب عليه مرتين والناس بتحكم غلط وكل ما يشوف شحات يبقى نفسه يقتله