ليه الناس عمالة تهبط فيك كده ؟؟؟؟

**speed demon666** · 01-01-2011 10:31 AM

السلام عليكم ورحمة الله وبركاته

نفسي أعرف ليه الناس بتهبط في عزيمة الواحد لما يلاقوه ناوي يعمل حاجة هو نفسه يعملها ... يعني انا مثلا نفسي أجيب عربية نيفا و بدور على واحدة كويسه ... كل ما أسأل واحد يقولي دي عربية فيها و فيها ... لحد ما يقفل نفسك منها ... لييييه ؟؟؟

مش دي عربية زي أي عربية اشمعنا بره شغالة زي الفل و الناس مبسوطة منها ... نيجي و انا بقول لواحد انا نفسي اني أجيب العربية دي شاسيه و انا أظبطها على مزاجي , لقيتو بيبصلي كأني كائن فضائي و بيقولي و انت عايز الموضوع ده تعملو في النيفا انت مجنون .... بقوله ليه يعني قالي انت هتخسر فيها كتير .... انا مش فاهم هو انا تاجر علشان أفكر هخسر أد ايه و انا بظبط علشان أركب ؟؟؟ .... بقول للوالد عندي على الفكرة دي قالي بردو هتخسر كتيير العربية ما بتتبعش أكتر من 10000 جنيه قولتيلو ليه يعني هو علشان واحد ولا اتنين باعو بالسعر ده يبقى السعر بقى كده على كله ؟ طب ما فيه منها اتباع قدامي ب 22000 ده كدة اتنصب عليه نصب السنين ... ولا الأراء التانية اللي تقولك المنظر و الناس بيحسسني ان الناس لما العربية بتبوظ او تتخبط هما اللي بيدفعو

انا حاسس بيأس من اراء الناس الغريبة ... شايفين طرق زي الزفت و ناس مبتعرفش تسوق و يقولولك هات عربية زيرو و ادفع أقساط و صيانة و عيط جنبها لما تتخبط أويحصلها حاجة

نفسي أعرف هو انا ماشي في سكة غلط ولا انا صح ولا ايه النظام

**bassam92** · 01-01-2011 12:31 PM

يا عم روق ومتعملش فى نفسك كده مفيش حاجة مستهلة انك تتضايق ده كله اراء الناس دايما يمين وشمال مفيش ابدا راى واحد واختلاف الراى لا يفسد للود قضية .
توكل على الله وهات النيفا وظبطها واثبت للناس انها عربية حلوة وانهم كانو غلطانين ولازم تعرف ان كل العربيات ليها عيوب.

بسام.........

**Adham** · 01-01-2011 12:48 PM

لأ انت صح

**nimo.mimo** · 01-01-2011 02:07 PM

المشاركة الأصلية كتبت بواسطة speed demon666

السلام عليكم ورحمة الله وبركاته

نفسي أعرف ليه الناس بتهبط في عزيمة الواحد

و الله يا إبنى إنت صح بس الناس هما اللى خلف خلاف , فعلا الناس كلها غلط و انت اللى صح , زيهم زى الناس اللى بنشوفهم فى السى ان ان فى زنزبار اللى خاربين الدنيا و متهيألهم إنهم أحسن ناس فى الدنيا.
بيشوفو إيه يريحك و يتعبوك فيه
و اللى أقنعك بسين من الأشياء يعيبلك فيه تانى يوم و لا كأنه عمره شكر فيه أبدا
و لو لقوك ابن حلال كده و طيب يفحتوك و لو كشرتلهم يقولولك إنت إيه اللى مزعلك ما قلتش ليه بالهداوة من الأول و يطلعوك مجنون.

عشان كدة يا سبيد يا ابنى كل اللى أقدر أقولهولك هو الحمد لله على نعمة الإسلام و كفى بها نعمة على الأقل البهدلة ها تبقى دنيا بس مش دنيا و آخرة إن شاء الله.

و الحمد لله رب العالمين.

أخوك فى الهبوط

**speed demon666** · 01-01-2011 02:31 PM

والله يا جدعان فيكو الخير .... انتو عارفين الناس دي بتفكرني ايام م كان معايا السيتروين تيلاقي الواحد يقوللي دي عربية زباله و فيها و فيها ... تيجي تسألو انت عرفت منين يقولك سمعت كده !!!!! يا نهار اسود ساعتها بيلاقي ماسوره تهزيق طلعت في وشه ... طب انت مجربتش بتتكلم ليه انا واحد من الناس العربية فضلت معايا بقالها 7 سنين و بقولك انها كويسة انت بقدرة قادر ياللي مركبتهاش بتكلمني كأنك انت اللي مصنعها و بتقوللي ان كلها عيوب .... تييييييييييييت ...... نفس الحكاية بتحصل معايا في النيفا اليومين دول ... و النيفا عيوبها معروفة لأن هي عربية مش بتاعت تكنولوجيا هي عربية سهلة و لا هتقولك الكمبيوتر باظ و الهجص اللي بسمعه في باقي العربيات و في نفس الوقت قطع غيار في المعقول في الظل الانتعاش الاقتصادي اللي البلد بتمر بيها ..... و في نفس الوقت تستحمل الطرق الناعمة بتاعت المحروسة و كمان بتحميك من المجانين اللي على الطريق لأنهم هيفكرو الف مرة قبل ما يرمي عليك او يلعب معاك .... بس امام كده هتضحي ببعض الرفاهيات زي نعومة المكنة و السرعات و كلام ده ... الباور و التكييف امرهم سهل ... ايه تاني الواحد عايزه من العربية

انا في قرارة نفسي بعتبر اللي بعمله ده صح الى ان يثبت العكس علشان حتى على الأقل لما واحد يسألني أرد عليه من منطلق ان انا واحد معاه العربيه اوجربها يعني من غير فتي زي ما كل الناس بتعمل ... و أهو زبي ما المثل بيقول الواحد ما بيتعلمش ببلاش

انا متشكر ليكو يا جماعة على الردود المشجعة دي ... ربنا يديم المعروف .... و محتاج رأيكو معايا في ان انا أجيب العربية و أعملها انا بيدي ... لأن معظم اللي في السوق مش حلو أوي ... ايه رأيكم ؟

**engaass** · 01-01-2011 02:35 PM

فكر فى اي اللى يناسبك ويريحك واعمله ومتشغلش بالك بحد لان كل واحد بيتكلم من وجهة نظره هو من ومش على درايه بظروفك

**kar!m** · 01-01-2011 02:38 PM

كل بلد و ليها ظروفها .. واللى بيقول لك كده بيتكلم من ظروف بلدنا اللى بتغلى العربية الاستوك حتى لو معفنة و دهانها مجير و مجرب .. و ترخص العربية المرشوشة حتى لو بتلمع و بتخسف سعر أى تعديلات فى العربية.

وده طبعا سببه عدم المصداقية .. عشان محدش بقه بيصدق حد .. و لما تقول لحد أنا رشيت العربية عشان دهانها مجرب .. هيقول لك و انا ايه ضمنى انها مش حادثه.

**otefa** · 01-01-2011 02:43 PM

كل واحد وقناعاته وظروفه
الأستروين حلوة
أنما النيفا لو هاتدفعلي فلوس مش هاخدها عربية مملة جدا وناشفة ومش شايفلها أي ميزة غير نشوفية صاج
الأختلاف في الرأي لايفسد للود قضية

**speed demon666** · 01-01-2011 02:50 PM

المشاركة الأصلية كتبت بواسطة kareemz

كل بلد و ليها ظروفها .. واللى بيقول لك كده بيتكلم من ظروف بلدنا اللى بتغلى العربية الاستوك حتى لو معفنة و دهانها مجير و مجرب .. و ترخص العربية المرشوشة حتى لو بتلمع و بتخسف سعر أى تعديلات فى العربية.

وده طبعا سببه عدم المصداقية .. عشان محدش بقه بيصدق حد .. و لما تقول لحد أنا رشيت العربية عشان دهانها مجرب .. هيقول لك و انا ايه ضمنى انها مش حادثه.

انت والله جيت على الجرح ... حضرتك عارف ان في اي دولة أجنبية مابيفرقش معاه العربية رشه جو ولا برة ... لأن انت بتقوله هي عملت حادثة و حصل كذا وكذا فيها فهو لما يشتري يبقى رضي باللي انت قولتو ... انما عندنا ياسلام بتشتري العربية على انها فبريكه تطلع مقلوبة علشان احنا شعب فهلوي فالح بس في النصب ... انا تعبت في الموضوع ده كتير و رغم كده الحمد لله لما بعت العربية بتاعتي قولت للي بعتهالو ان كان في خبطة و ورتلو مكانها رغم ان الناس كلها كانت معارضة الموضوع ده بس قولت لأ لازم يعرف علشان ميجيش في يوم يدعي عليا و علشان ربنا يباركلي في فلوسها و متضيعش في عربية منصوب عليا فيها

**Adham** · 01-01-2011 10:13 PM

المشاركة الأصلية كتبت بواسطة speed demon666

.. بس امام كده هتضحي ببعض الرفاهيات زي نعومة المكنة و السرعات و كلام ده ... الباور و التكييف امرهم سهل ... ايه تاني الواحد عايزه من العربية

مين قال كدة ...... لو يهمك الجري و السرعات سقط فيها موتور131 ريسنج 2000 سي سي و ركب فيها كاوتش اوطي من كاوتش الجرار اللي راكب فيها

يعني مثلا ركب فيها كاوتش 205/70 r15 و اتفرج

كدة حليت مشكلة التسارع و السرعات و كمان العربية و طيت و حليت مشكلة الثبات نسبياَ

الموضوع: ليه الناس عمالة تهبط فيك كده ؟؟؟؟

LinkBack

أدوات الموضوع

عرض

ليه الناس عمالة تهبط فيك كده ؟؟؟؟ - انشر الموضوع فى :

-

-

-

-

-

المواضيع المتشابهه

شوفو الناس المحترمة الى بتحترم انسانية الناس عندهم سحب جيتا 977

استفسار بخصوص تهبط civic 94

أسعار السيارات بأوروبا تهبط 3.1%

بعد غلو البنزين اية رد فعلك وانت بتشوف عداد البنزين بتاع المحطةوالجنيهات عمالة بتجرى

الكلمات الدلالية لهذا الموضوع

المفضلات

المفضلات

ضوابط المشاركة