الموضوع: تجربتى مع صيانه ال 20,000 فانتازيا فى كارتك العبور

السلام عليكم ورحمه الله وبركاته

طبعا كل واحد معاهاه أوكتافيا اكيد بيشتكى من الزحمه و سوء المعامله إلى بتحصل فى أرتوك المركز الرئيسى وأنا حصلت معايا مشكلتين معاهم فقررت متعاملش معاهم تانى المهم توكلت على الله وقولت اروح كارتك العبور بما انه جنب جامعتى اعظيمه MIU
طبعا احنا معروف ان علشان تخلص فى ارتوك بدرى يستحسن تكون من 8 هناك او بايت قبلها بيوم ادام الباب أنا بقى وصلت التوكيل الساعه 11 و ربع و اخدت امر شغل بعدها ب 5 دقايق ( سرعه ولا أحلى ) المهندس جالى قلتله صيانه 20,000 فقالى بتشتكى من حاجه فقولتله على الحاجات إلى بشتكى منها و كانت حاجات بسيطه

المهم اخد العربيه وانا طلعت على الاستراحه فوق وبالنسبه الاستراحه محترمه فيها كافيتريا و تلفيزيون و انترنت و الاهم من ده كله انك شايف عربيتك مش زى أرتوك

وانا مستنى جالى تليفون من الورشه تحت بيقولى ان تيل الفرامل عايز يتغير فقولتله يغيره
(الناس هتسألنى ليه غيرت تيل الفرامل بسرعه كده و هقوله انى بجرى بالعربيه بسرعات مبتقلش عن 180 و بضرب فرامل كتير فده كان سبب رئيسى فتغير التيل)

بعد نص ساعه العربيه طلعت تجربه فالمهندس قالى جرب و شوف وهو معايا طلعت جربت العفشه بعد التربيط و كانت ناعمه و كويسه جدااا .....الفرامل بقت افضل بعد تغير التيل بس كان فيه صوت كده كنت بشتكى منه بيجى من عند الشنطه كان لسه موجود فقولت للمهندس عليه

طبعا الصوت ده اجتمع عليه 2 مهندسين و 3 عمال بيتشقلبوا مش عارفين الصوت ده طالع منين واعدت ساعه إلا ربع زياده علشان الصوت ده و فضوا كل حاجه فى شنطه العربيه ...طلبوا منى انزل حاجتى الخاصه و نزلوا الاستبن و العده و كل حاجه ......و فيييين بقى و بعد طول عناء اكتشفوا ان الصوت ده طالع من المساعد اليمين بتاع الشنطه و محتاج يتغير بس مكنش عندهم فقولت ابقى اعمله بعدين

انا بقى كنت مديهم العربيه و كان لونها متحول من السماوى للبنى لآنى وديتها تانى يوم المطر فكانت سيئه جدا من ناحيه النظافه بس التوكيل اخدها و اداها الدش المتين و حطوا معطر فى التكييف و رجعت زى الفل و نظفوا الموتور بالفوم وبعدها اخدت العربيه وطلعت على اول بنزينه قولت أفولها ب95 بمناسبه الصيانه

التكلفه كانت كالاتى

تيل فرامل أمامى 337.5
فلتر زيت تمنه 50 جنيه لكن مكتوب فى القيمه فى الفاتوره صفر فمش عارف ده معناه ايه
زيت توتال 5 لتر ب 290 جنيه
صيانه 20,000 230 جنيه
فوم الموتور و تنظيف التكيف 30 جنيه
مع المصنعيات 250 جنيه

والاجمالى مع الضرايب ألف و سبعه و عشرين جنيه

و 120 جنيه بنزين 95 إلى طبعا عمل اختلاف اداء رائع

تقييمى للمركز كويس جداا
يعنى الصيانه انا راضى عن الشغل إلى فى العربيه
المعامله كويسه جدا جدا غير ارتوك خالص يعنى كفايه ان الصوت إلى مكنوش عارفين يطلعوا كان شغال عليه أكتر من مهندس و 3 عمال و مسابوش العربيه غير لما عرفوا السبب
الانتظار لا تعليق على الموضوع ده لان العربيه اخدت امر الشغل و دخلت الورشه بعد ما وصلت ب 5 دقايق و انا اصلا رايح متأخر جدا

و أى أستفسار انا موجود

المشاركة الأصلية كتبت بواسطة elkateab

يا جماعه انا عيز اعرف استهلاك البنزين كام بمعنى تفويل التنك يمشينى كام كيلوا علشان العربية الى عندى بتستهلك التنك كله فى 480 كيلوا بس عايز اعرف معدله كام

حضرتك تقدر تعرف كده من شاشه المعلومات إلى موجوده ادام حضرتك بين العدادات وبالنسبه للطريقه حضرتك هتلف البكره إلى موجوده فى الدريكسيون على اليمين و هتدور على حاجه اسمها consumption خد بالك فيه منها 2 واحده إلى بتقولك الاستهلاك الفعلى فى لحظتها حسب السرعه و التانيه بتقولك معدل الاستهلاك فى الرحله كلها و هتفرق بينهم ان بتاعه الاستهلاك الفعلى هتلاقى الارقام بتتغير حسب دوستك على دواسه البنزين و دى بقى هتقولك الاستهلاك اد ايه كل 100 كم و لو العربيه واقفه يعنى الموتور داير بس مش بتتحرك هتقولك الاستهلاك بالساعه و 480 كم ده معدل ممتاز جدا انا تقريبا بخلص نص التنك فى 100 كم علشان انا بحرق جامد و الاستهلاك بيكون على بتاع 24 لتر كل 100