الموضوع: مشكلة بعد سرعة 100

مشكور على الردود
انا روحت كشفت على العربية ولقيت حاجتين
اولا الطنابير اللي في الشمال فيها خدشة او زي مبيقولو عايزة تتمسح
ثانيا علبة الدركسيون من تحت فيها تزيقة وده برضه قالوهولي في الكشف تحس ان في حاجة سايبة
وطبع استهلاك البنزين العالي جدا ااااااا
المهم اتصلت بمركز عصام وصفا قالولي ان هما معندهمش طنابير ولا علبة دركسيون واول ميوصل عندهم هيتصلو بية ربنا يسترها بقة
بجد انا قربت ازهق لما اكون عامل 7500 كيلو وبتعمل كدة امال بعد 10000 هتعمل ايه الناس بتقولي اهوه انت لسة في الضمان والعربية فتحت بوقها قولتلهم بس العربية ماشاء الله زي الفل وصاج زي الفل والحاجات دي ان شاء الله التوكيل هيظبطها
ربنا يسترها بقة والتوكيل يرفع راسي

المشاركة الأصلية كتبت بواسطة medo_tourkey

مشكور على الردود
انا روحت كشفت على العربية ولقيت حاجتين
اولا الطنابير اللي في الشمال فيها خدشة او زي مبيقولو عايزة تتمسح
ثانيا علبة الدركسيون من تحت فيها تزيقة وده برضه قالوهولي في الكشف تحس ان في حاجة سايبة
وطبع استهلاك البنزين العالي جدا ااااااا
المهم اتصلت بمركز عصام وصفا قالولي ان هما معندهمش طنابير ولا علبة دركسيون واول ميوصل عندهم هيتصلو بية ربنا يسترها بقة
بجد انا قربت ازهق لما اكون عامل 7500 كيلو وبتعمل كدة امال بعد 10000 هتعمل ايه الناس بتقولي اهوه انت لسة في الضمان والعربية فتحت بوقها قولتلهم بس العربية ماشاء الله زي الفل وصاج زي الفل والحاجات دي ان شاء الله التوكيل هيظبطها
ربنا يسترها بقة والتوكيل يرفع راسي

السلام عليكم
الطنابير ( معرفش انت عملت فيها اية) انا بدخل بالعربية الصحراء والطانبير لسه الحمد لله جديدة
علبه الدركسيون ( انا اعرف انه نقص زيت الباور بس ) وده اتعالج وغير كده مظهرش عيوب تانى
الاستهلاك العالى ( معاك حق ) بس اقل كتيييير جدا من الافيو والسجا موتور وسحب اقوى من الافيو
جرب بوجيه ثلاث شمعات احتراق
عربيتك زى الفل طبعا واحسن اختيار انت خطفتة من السوق انت راكب احسن حاجه (ماشاء الله )
الصاج فى الساجا ملوش لازمه اصلا الناس عاملة شاسيه 75% من الفولاذ وقضيب حمايه محترم جدا جدا تحت التابلوة ( عشان تشوفه افتح علبة الفاز واتفرج ) وقضبان حمايه محترمه جدا حول الكابينه كلها الاربع ابواب وحرف x فى الشنطه ( يعنى بسم الله ماشاء الله )
انت وكلنا فعلا فعلا اخترنا افضل حاجه فى السوق الحمد لله
وان شاء الله كل الى قولت عليه سهل وبسيط جدا ونحن معك

المشاركة الأصلية كتبت بواسطة megarekab

حمادة ..... بلدياتى البنهاوى ..

متهيألى إن أنا أكثر واحد ممكن يرد عليك من ثقه 100% لسبب بسيط جدا جدا

ألا وهو إنى شفتك وكنت قاعد جنبك إنت سايق وشفت سواقتك شكلها إيه ...

بالله عليك تخف شويه على العربية وبلاش اللى إنت بتعمله فيها ده ...

يعنى أنا أقول ساجتى حبيبتى وإنت تعمل فيها كده ؟؟!!

أستحلفك بالله يا ميدو والعيش الحاف اللى أكلناه سوا إنك تخف شويه على العربية
وتبطل القرص والكيك داون والجرى على 180 كم / الساعة ..

صونها تصونك .... هينها تهينك ...
انا قولتلك انا بقرص عليها عشان اوريك سحب العربية
مش اكتر من كدة
مش معنة كدة اني على طول كدة انا بمشي براحتي انا كنت بوريك قدرات العربية وتعر ان لما تيجي تشد مع حد تشد وانت مطمن
.

وعلى قد ماتعتنى بيها على قد مالعربية تعمر معاك وماتفتحش بقها أبدا أبدا

وساعتها هتفتكر كلامى ده وتقول الست ساجا الأصيلة ..

أنا زعلت جدا من موضوع الدوكو اللى لاقيته على الإكصدام الخلفى ....

أنا لا إعتقد إن فى منطقة سكنك حد بتاع دوكو أو فرن دوكو كنا هنقول عيل صنايعى هو اللى عمل كده ....

مالهاش أى تفسير تانى .... ومانقدرش نقول حد عملها فيك عن قصد ..

لأن من معاملتى ومقابلتى ليك .... عرفت إنك خدوم وطيب ومحترم ومش ممكن حد يزعلك بالطريقه دى ...

............................

على فكره أنا مانسيتكش فى موضوع إضافة البنزين اللى عندى ..

أنا فعلا إشتريت كرتونة من الشغل عندى ...

الكرتونة 48 عبوة ...

أنا هاخد ربعها وإنت ربعها والربعين التانيين ليهم ناسهم لأنى مش بحبذ إنك تشيل معاك وتخزن أكتر من 12 زجاجة ...

على فكره أنا زى ماقولتلك قبل كده ..

الإضافة دى أنا بستخدمها عن ثقه 100 % لأسباب مهمة جدا جدا جدا بإختصار :-

1- أنا اللى بستورد المادة الخام بتاعتها من فرنسا لشركتى بصفتى مدير المشتريات الخارجيه والاستيراد.

2- المادة دى بتتخلط وتتخفف عندنا فى مصانعنا يعنى تحت عينى وعارف بتتعمل إزاى ....

3- أنا بستخدمها من 9 سنين بالظبط وعمرى طول الفترة دى كلها ما فولت تنك عربيتى سواء السيات أو الــ 127 وم}خرا الساجا .... إلا لازم أحط زجاجة إضافة مع كل تفويله ....

فوائـــــــــــدهــــا :-

1- تقليل معدل إستهلاك البنزين بنسبه لا تقل عن 10% والمستخدم نفسه يستطيع إثبات ذلك من خلال معرفته لمعدل إستهلاك عربيته قبل الإضافه وبعد الإضافة ..

2- تنظيف دائرة الوقود من التنك حتى الرشاشات ( صدأ داخلى - إنسداد جزئى لأنابيب الوقود - هباب متراكم على الصبابات او الرشاشات - الخ ) .... وعن تجربه فعليه ... كذا مره أخلى الميكانيكى يفتح الموتور ويشوف الصبابات أخبارها إيه والميكانيكى مش بيصدق المنظر من كتر النظافه واللمعان.

3- تنظيف وش البستم وعدم ترك أى أثار سوداء أو كربونية على وش البستم.....

4- زيادة معدل الإحتراق للوقود .. يعنى بتخلى الوقود يتحرق بالكامل وتستفيد بكل نقطة بنزين بدون إهدار والدليل إنك هتلاقى شكمان عربيتك بيعرق وينقط مياه وده طبعا معروف معناه إيه ...وتقدر تتأكد من ده من خلال قياس العادم فى محطة بنزين بدون الاضافه مره وره تانيه بعد إستخدام الاضافه مرتين ثلاثه ....

مكوناتهــــــــــــــــا :-

المادة دى بتحتوى على 3 مواد مخلوطة على بعض ..... اتنين منهم بيجوا مخلوطين جاهزين والمادة الثالثه إحنا اللى بنضيفها فى مصانعنا ....

المادة الأولى :-

عامل مساعد للأكسدة وهو ده اللى بيسبب زيادى القدرة على الاحتراق الكامل للوقود وعدم تكون هباب او كربون على البستم عند الحرق او على الصباب .... وهو ده اللى يخلى العربية ( على سبيل المثال ) .... لتر البنزين فيها بدل ماكان بيعمل 12 كم / 1 لتر .... المادة دى تخليه يعمل 14 : 16 كم / 1لتر ... هتقول ايه يعنى 2 ولا 4 كم زيادة ؟!! هقولك 2 كم على التنك كله هيعمل معاك 80 كم زيادة وده على أقل تقدير فعلى وعن تجارب فعليا فى كل عربياتى اللى فاتت زى ماقلت ....بالإضافة الى إن المادة الاولى دى بترفع رقم الاوكتان للبنزين .. يعنى لو حطيت بنزين 80 وحطيت الماده مش هتحس انه بنزين 80 خالص وكذلك لو حطيت بنزين 90 ومعاه الماده هتحس غنه 92 وهكذا ...

المـــادة الثانيه :-

مادة منظفه ومشتته للرواسب والكربون والهباب والصدأ .... وهى دى اللى بتخليك تشوف وشك فى وش البستم لما ( لاقدر الله ) تطلع البستم بره بالإضافة الى لمعان الصباب ونظافته وعدم إنسداده بالكربون والهباب وبالتالى عدم تسييل وإهدار البنزين من الرشاشات بدون إحتراق .....

المادة الثالثـــــة :-

مادة محلية الصنع عبارة عن مذيب بنخفف بيه تركيز المادتيت المركزتين وده بتوصيه من المصنع الاصلى .. اللى بستورد منه ...

ملاحظات مهمة جدا جدا جدا :-

عند أول إستخدام للإضافه ( بكررها عند أول إستخدام فقط ) هتلاقى الشكمان بيطلع هباب أسود وشويه حبيبات كربونة وده نتيجه تنظيف البساتم والرشاشات ودايرة الوقود من الشوائب زى ماقلت والحاجات دى بتطلع مع العادم ....

عند ثانى إستخدام هتلاقى العربية إتظبطت معاك بطريقه ماكنتش تتخيلها وهتلاحظ إرتفاع معدل سحب العربية وإنخفاض معدل إستهلاك للبنزين .....

الشركة اللى بشتغل فيها هى شركه تابعه لقطاع البترول المصرى الإستثمارى.... يعنى فيه رقابه وجودة وتبعية لوزارة البترول يعنى لانستطيع إنتاج أى منتج بدون موافقه وإعتماد الهيئة العامة للبترول ووزارة البترول ..

إدمــــــــــــان :-

إذا توقفت فجأة عن إضافة هذه المادة للبنزين ( مثلا بعد 4 او 5 مرات ) هتلاقى عربيتك زعلت منك جدا جدا وهتلاقى سحبها قل ومعهدل استهلاكها للبنزين إرتفع وهتحس ان عربيتك ملخبطه .... ليه ؟؟؟

هو ده كان حال عربيتك الاصلى قبل ماتحط الإضافه لكن إنت عشان إتعودت على معدل السحب الجديد هتسى القديم وهو ده اللى بيخليك تحس إن العربية ملخبطة معاك بدون الإضافه .. يعنى السيارة بتدمنها .....

كيفيــــة الإستخـــــــــــدام :-

العبوة الواحدة سعتها 100 مل وثمنها 2 جم ...

العبوة الواحدة تكفى لوضعها على 30 : 50 لتر بنزين ولازم تتحط قبل عامل البنزينه مايحط المسدس ... عشان تضمن إنها إتخلطت كويس جوا تنك النزين مع مراعاه عدم ترك عامل البنزينه بفول العربية بمفرده لأنهم دايما بيخلوا البنزبن يطفح بره التنك وده بيخلى جذء من المادة تترمى فى الارض وانت كمان بترمى فلوسك على الارض لانه بيحاسبك على كل نقطة بنزين ......

يفضلأ وضع عبوة كاملة عند كل تفويله ( وبكرر تفويله لحد زور التنك ) عشان تقدر تحسب الفرق فى معدل الاستهلاك كويس بالاضافة الى الاستخدام الامثل والكامل للإضافة ..

هتلاقى فى محطات البنزين إضافات كتير من هذا النوع وثمنها لا يقل عن عشرين جم ...وهتلاقى فى محطات كتير كمان الاضافة بتاعتنا اللى بتكلم عنها وثمنها فى محطات البنزين 2.5 : 3.5 جم .......

حسبــــــه بسيطـــه :-

فرضا وده على أقل تقدير ان نسبه التوفير فى الاستهلاك 10 % ....

التنك سعته 40 لتر.......

متوسط إستهلاك الساجا للبنزين جوا البلد 10 كم لكل واحد لتر بنزين .....

يعنى هنضيف 2 كم على المعدل المتوسط والطبيعى لكل واحد لتر بنزين ....

الاجمالى هيكون 2 فى 40 = 80 كم زيادة توفير ......

طب والتكاليف ؟!!

80 كم معناهم 10 لتر بنزين يعنى ثمنهم 80 فى 1.85 قرش = 18.5 جم

نطرح ثمن الاضافة : 18.5 - 2 = 16.5 جم

يعنى هتوفر فى كل تفويله 16.5 جم بالإضافه للمميزات اللى فاتت دى كلها وشرحتها بالتفصيل.....

................................*
عاوز أعرف رأيك يا محمد إنت وصديقى العزيز / صلاح حكيم و أخى الفاضل / أبو نورا .....بالنسبه للموضوع ده من ناحيه عمل موضوع جديد فى المنتدى ..... المشكله إنى خايف إن المشرفين على المنتدى يلغوا الموضوع ويتعملى إيقاف بإعتبار إن ده إعلان ودعايه لمادة من خلال المنتدى ...

عاوز أعرف رأيكم إنتوا الثلاثه بالذات .....

رأيكم فى نشر الموضوع مش رأيكم فى الإضافه .... لأنى واثق منها مليون فى الميه ....

:f_eyeb1[1]:

المهم يا ميدو يابنهاوى يا بلدياتى ....

ربعك معايا (12 عبوة لــ 12 تفويله ) وهديه منى ليك يا صاحبى وفى أول زيارة لبنها هتصل بيك نتقابل أسلمهالك وهتدعيلى وهتشوف......

مع خالص تحياتى

محمد عبد المجيد

السادة المشرفين :

مراعاة وحفاظا على قوانين المنتدى ، لم يتم ذكر إسم المادة أو إرفاق صورتها.

الف شكر ليك على كل اللي بتعملو مع اني زعلان منك عشان بتصل بيك وانت مبتردش مش عارف ليه
زمستني اشوف الاختراع العجيب اللي انت بتقول عليه عشان اقولك رايي فيه
وياترى عملت صيانة ال 1000 ولا لسة
وجربت الاختراع بتاعك ده في الساجا ولا لسة برضه
انا مستني ارائك الجديدة
ومتخفش انا بطلت اجري زي الاول
واخر مرة جريت بالعربية يوم مكنا مع بعض ودي بتحصل كل فين وفين
وبعدين لو زي منت بتقول اني كدة بهين العربيية مكنوش عملو العداد بتاعها 200 كيلو
انا عايز اقولك انت راكب ساجا مش 128
يعني انت راكب موديل 2010 ولازم تعرف امكانيات عربيتك
صح ولا انا بكلم غلط

صحيح مش انا الحمد لله اللي حصل معايا موضوع الدوكو ده
تقريبا والله اعلم حد جاب ساجا حمرة تاني في بنها
هتاكدة من الموضوع ده ولو كدة فعلا يبقة تمام قوي اهلا بيه معايا وينور نايل موتوروز وينور بنها كمان

السلام عليكم
انا عاوز كرتونه هديه الاول او خليهم كونتينر كامل وانا اول لما اخلص الكونتينر اقول الماده كويسه ولا لاء
بالنسبه لموضوع النشر على المنتدى هنا مش عارف الله اعلم

شكلك طماع اوي يا استاذ صلاح براحة على الراجل ده عنده 3 بنات ولسة معملش صيانة ال 1000