اخويا المسيحي

**zoom2zoom** · 03-01-2011 10:10 PM

كلنا هنا نعرف العضو الفاضل tamer tamer وكتير منا مكانش يعرف انه مسيحي؟؟؟
انا اتعرفت علي تامر من فتره كبيره وجمعت بينا هوايه الموتوسيكلات وكنا بنتقابل بصفه مستمره وبنخرج واكلنا مع بعض عيش وملح وانا مكنتش اعرف انه مسيحي؟؟؟
بصراحه اول ما عرفت صدمت بس مش عشان هو مسيحي لا عشان محسيتش في لحظه انه مسيحي ...
انا عملت حادثه بالموتوسيكل من 3 اسابيع .. كنت علي معاد مع تامر عند بيته وللاسف عملت حادثه قبل ما اوصله .
الناس اللي شالتني قبل ما يحركوني اتصلوا باخر رقم كان عندي وكان هو تامر وقالولوا اللي حصل وجه فوراااا.
والله العظيم انا كنت فاقد الذاكره لمده ساعتين ولكن الحاجه الوحيده اللي فاكرها وانا واقع وغرقان في دمي لحظه جري تامر عليا وخضته عليا وحاله الزعر والهلع اللي كان فيها مكانتش تتوصف ... واتصل بالاسعاف فورا والاسعاف شالتني وتامر ركب الاسعاف ومن لهفته عليا نسي عربيته مفتوحه بالكامل في نص الطريق عند فندق سونستا...
دخل المستشفي وكان الخدمه فيها زي الزفت و كان بيزعق مع الدكاتره ويجري شمال ويمين وزعق وعايز مدير المستشفي وكان عايز يعمل مشاكل للتهاون في حالتي ..
وبعد الحمد لله ماخرجت من المستشفي تامر جري علي مكان الحادث وشال الموتوسيكل ووداه الجراج عنده واعد يلم في قطع الفيبر المكسوره من الموتوسيكل من الشارع .
كان كل يوم بيزورني وانا تعبان
وقف جمبي في مشكله ماديه وقت الحادثه
كان يجي من شغله تعبان قبل ما يروح بيته كان يجيلي يطمن علي حالتي يوميا
ولينا صديق تاني مسلم برضه ابنه كان تعبان ربنا يشفيه ويعفي عنه وتامر وقف جمبه واعدنا نلف علي المستشفيات بعربيه تامر اكتر من 5 ساعات ..

ادي ياجماعه نموذج المسيجي الشهم
عمري ماحسيت لحظه باني من دين وهو من دين لاني محسيتش الا بالاخوه والحب اللي جمع بينا
ياريت نقف كلنا ياجماعه ضد اللي عايز يدمرنا ويدمر احلامنا ومستقبلنا وامنياتنا واخوتنا

**slim_shika** · 03-01-2011 10:31 PM

أخيرًا موضوع ايجابي! الواحد عمال يقرا في مواضيع و مشاركات تغم بقاله 3 أيام.

حاجة تفرح.

**M.Mosaad** · 03-01-2011 11:10 PM

موقف مش غريب عن اي حد متدين و فاهم دينه كويس سواء كان مسلم او قبطي

احنا كلنا اخوة في البلد دي و اي حاجة بتحصل في البلد دي كلنا بنعاني منها فقر و غم و ذل كلنا بنعاني سوا
في حرب بنعاني سوا

اعتقد ان الاخوة الاقباط الايام اللي فاتت حسوا اد ايه ان نسبة كبيرة جدااااااااا من المسلمين مش بتكن ليهم غير كل مودة و انا عارف بحكم تعاملي في شغلي مع نسبة كبيرة من اخواني الاقباط ان برضة نسبة كبيرة منهم بتكن لينا كل مودة

نفسي علي الرغم من الحادث الشنيع ده ان دم الناس اللي اتوفت سواء مسلمين او اقباط ميروحشي هدر و يكون بدايه لاتحاد حقيقي بينا و بين بعض و منسيبشي شويه الناس التافهه اللي بترمي بنزين علي النار تستمتع و مصر بتاكلها نار الفتنه

ياريت كل واحد يحط لبنان قدامه كمثال و هو بيفكر في البلد دي و مصلحتها و يشوف ان بلد كانت من اجمل بلاد الارض اتكوت بنار الفتنه لسنين طويله و النار دي مفرقتشي بين مسلم و قبطي لا دي اكلت الكل

نفسي نعرف نوجه غضبنا للفاعل الحقيقي لان كل ماتحصل حادثه بننفث غضبنا في الفاعل الغلط و الفاعل دة بيستريح لما بيشوف نار الفتنه بتولع

**zoom2zoom** · 03-01-2011 11:11 PM

المشاركة الأصلية كتبت بواسطة slim_shika

أخيرًا موضوع ايجابي! الواحد عمال يقرا في مواضيع و مشاركات تغم بقاله 3 أيام.

حاجة تفرح.

والله وما خفي كان اعظم وفي حاجات مرضيتش احكيها عشان مطولش علي الاعضاء
انا طفولتي كانت وسط مسيحيين واتربيت وسطهم عمري ماحسيت بفرق في حاجه ابدااااااااااا

المشاركة الأصلية كتبت بواسطة m.mosaad

موقف مش غريب عن اي حد متدين و فاهم دينه كويس سواء كان مسلم او قبطي

احنا كلنا اخوة في البلد دي و اي حاجة بتحصل في البلد دي كلنا بنعاني منها فقر و غم و ذل كلنا بنعاني سوا
في حرب بنعاني سوا

اعتقد ان الاخوة الاقباط الايام اللي فاتت حسوا اد ايه ان نسبة كبيرة جدااااااااا من المسلمين مش بتكن ليهم غير كل مودة و انا عارف بحكم تعاملي في شغلي مع نسبة كبيرة من اخواني الاقباط ان برضة نسبة كبيرة منهم بتكن لينا كل مودة

نفسي علي الرغم من الحادث الشنيع ده ان دم الناس اللي اتوفت سواء مسلمين او اقباط ميروحشي هدر و يكون بدايه لاتحاد حقيقي بينا و بين بعض و منسيبشي شويه الناس التافهه اللي بترمي بنزين علي النار تستمتع و مصر بتاكلها نار الفتنه

ياريت كل واحد يحط لبنان قدامه كمثال و هو بيفكر في البلد دي و مصلحتها و يشوف ان بلد كانت من اجمل بلاد الارض اتكوت بنار الفتنه لسنين طويله و النار دي مفرقتشي بين مسلم و قبطي لا دي اكلت الكل

نفسي نعرف نوجه غضبنا للفاعل الحقيقي لان كل ماتحصل حادثه بننفث غضبنا في الفاعل الغلط و الفاعل دة بيستريح لما بيشوف نار الفتنه بتولع

والله عندك حق
انا في شغلي 60 % من العماله مسيحيين ومفيش فرق بينا وبين بعض في اااااااي حاجه وموضوع مسلم ومسيحي وعنصريه والكلام ده انا اول مره اسمعه بصراحه في حياااااتي

**evram** · 03-01-2011 11:21 PM

يا جماعه اقسم بالله كل اصحابي الي اعرفهم اسمهم محمد و بخرج في رمضان معاهم و نتسحر سواء و يعزموني علي الفطار و عادي جدا جدا جدا و ساعات كمان بروح ليله العيد اوصلهم للجوامع و هما جم معيا الكنيسه في شبرا مارمرقس شبرا يوم ليله راس السنه و مفيش اي فرق ما بينا و عمرنا ما جيه في دماغنا حوار الديانه ده عمرة يا جماعه احنا دمنا سال في الحروب سوة دي مش عشرة واحد يوم ولا اتنين دي عشرت 14 قرن مش يوم ولا اتنين الي يمس المسلم يمسني و الي يمسني يمسه رولا خرسه كان بتقول ان تنظيم القاعده وصل ان في يوم سته و سبعه يناير هيفجرو 50 كنيسه في المانيا و مصر و في بلاد تانيه مابين كل بلد 10 كنايس في القاهره و اسكندريه و غيرة فينكم يا حكومه تشوفي دمنا الي بيسيل علي الارض

**gebreel** · 03-01-2011 11:24 PM

بجد ربنا يباركلك و يباركلو لأن

يا جماعة زي ما فيه النموذح السئ في المسلم فيه في المسيحي و زي ما فيه شهامة و رجولة و اصل و تربية و و و و بس الناس اللي عاوزة الحرق بتستغل الجزء السئ في كل واحد و بيقعدوا يلعبوا عليه علشان هدفهم انهم يولعوا الدنيا علشان يستفيدو هما

اقسم بالله العي العظيم انا عمري ما حسيت بفرق ما بين مسلم او مسيحي و عندي اصدقاء مسيحين اكبر مني و اصغر مني و في اعيادهم بكلمهم و في اعيادنا بيكلموني

انا لما القصة دي حصلت افتكرت فيلم الرهينة على طول فعلا اللي بيحصل ده بالظبط زي اللي في الفيلم و واحدة بتلعب على دول و على دول و في الاخر هي المستفيدة

**Khaled_Nowaihy** · 03-01-2011 11:25 PM

طول ما احنا بنحط فى دماغنا السؤال الغريب ده ... يبقى ما فيش فايدة !!!
تامر انسان محترم وأخلاقه أخلاق مصرى صميم شهم و جدع بلغة أولاد البلد .... ودى كفاية
بلاش نسأل نفسنا السؤال ده تانى ...
ولى مفارقة غريبة تدل على غباء هذا السؤال اسمحوا لى أقولها
فى جريدة الأخبار فى الصفحة الأخيرة - يوميات الأخبار فيه 2 كتاب أ. سمير عبد القادر و أ. جميل جورج
كنت أقرأ الموضوع بدون معرفة اسم الكاتب - وكنت أعتقد ان جميل جورج هو المسلم وسمير عبد القادر هو المسيحى
لما انتبهت لاسم الكاتب فى الموضوعات حسيت بسخافة هذا السؤال
يا ريت تجربوا الحكاية دى

**yoko** · 03-01-2011 11:40 PM

للأسف في كل ديانة فيه الكويس والوحش وللأسف برده الوحش هو الي بيبان يعني أعرف في المنتدى مسيحين وأولهم مارتين وبره المنتدى في النادي وفي الكليه بجد مفيش فرق وحبايب وفيه برده العكس وبرده في المسلمين فيه وفيه
أضحكم النهارده والدتي كانت قاعده مع صحبتها (مسيحيه) ونزلوا يشتروا حاجات صاحبتها هي الي إختارت لالوالده العباية!!!