طيب يا كنج
هوا الموضوع كان شرحهولي قبل كده بشمهندس سمير عياد...
قدامك اختيارين
لو البوجيهات جديده,,, يبقى انتا عايز تحافظ عليها
وبالتالي في طريقه ممكن تعملها بس انا مجربتهاش
الاول انك تفك العمه وتفك البوجيهات
وترش زي مقال عادل وتدي مارش تلات مرات بدون بوجيهات
هتلاقي من مكان البوجيهات بيطلع زي دخان اسود ده الطبيعي وده الهباب اللي كان هيلزق عالبوجيهات
او الاختيار التاني لو البوجيهات قديمه وهتتغير فالاسهل انك تنظف وهما جوه او تركب طقم قديم من عندك وتنظف
بالنسبه للعمليه نفسها الموضوع بسيط جدا
انا عن نفسي بحب طريقة انك تكون هتغير البوجيهات....
انتا فكيت العمه
قدامك الكربيراتير له فتحتين وفيه اجزاء متحركه زي بكرة البنزين
هتجيب فوطه نظيفه وحطها جوا الفتحتين
وتجيب الWD40 ترش بيه على بكرة البنزين (يعني الدبليو دي لتنظيف الاجزاء الخارجية فقط)
ده اول خطوة
بعدين شيل الفوطه لفها حوالين الكربيراتير لمنع اي رذاذ انه يوصل للبويه لانه بيسيح اللون...
هتجيب منظف الكربيراتير (ايا كان نوعه وانا عن نفسي بفضل نوع Stop وهوا امريكي ولقيته عند واحد ب 20 (لو عايز اجيبهولك..)
العربية حاليا مبطله
هترش جوا الفتحتين دول بعد رج العبوة لحد اما تشوف ان فعلا اللون رجع للون المعدني الاصلي
هتدور العربية (هتغلبك شويه في التدوير لكن استحملها شويه)
اول اما تدور زي ما قال عادل هتديها دوس بنزين من البكره اللي الكربيراتير
(انا بفضل ان العربية تكون سخنه عشان تقرص عالمكنه براحتك خالص بدون خوف)
اقرص عليها شويه لمده دقيقتين وهتلاحظ فعلا الدخان الاسود من الشكمان
والعربية دايره
شد الشفاط شويه للمستوى التاني مثلا
ايدك اليمين فيها المنظف والشمال حطها على بكرة البنزين
هترش شويه والعربية دايره وتزود بنزين من البكره (لان هتلاقي اول مبترش ان العربية هتطفي فعشان كده الشفاط وتزود بنزين)
طبعا العمليه دي هتعملها وتقرص عالماتور وهكذا
لحد امتى؟؟
المفروض حسب ما قرأت انك تخلص ربع او ثلث العبوة (دي نحسبها ازاي معرفش)
لكن الافضل انه لحد اما الدخان الاسود الخارج من الشكمان يختفي....
طيب
كده انتا خلصت تلات ارباع المهمه
فاضلك ربع مقسوم على جزئين
اقفل العمة ومتنساش تنظف فلتر الهوا او تغيره بالمره
ركب العمة عالكربيراتير والعربية كل ده دايره بالشفاط
اركب العربية
رجع الشفاط
خدلك لفتين كده واقرص شويه وحاول تفتح في الماتور سنه
لان القرص هوا اللي بينظف ...
هترجع البيت
يا تركب بوجيهات جديده
ياتطلع اللي جوه تنظفهم وبكده انتا اتممت العمليه
في ملاحظه كمان
البوجيهات ممكن تسيبهم بس اللفتين تلف كويس وتقرص كويس هيتنضفوا لوحدهم وهتطلعهم المفروض متلاقيش عليهم هباب اسود اطلاقا....
ملاحظه كمان
نفترض ان العربية طفت منك وانتا بترش وهيا دايره
ده عادي جدا
اصبر شويه وجرب تدور من غير متديها بنزين واصبر عليها يعني ممكن متدورش من اول مره كل ده طبيعي لان البوجيهات ساعتها بتكون في حاله يرثى لها فعلا,,,,
بس ياباشا كده العمليه واضحه وان شاء الله لو عملتها قريب ابقى اصورهالكم بالفيديو....
تحياتي للجميع
المفضلات