عايز ترتيب التجديد الشامل

السلام عليكم يا باشاوات وبرنسات المنتدى
ان شاء الله هجدد العربية(هشدها) وعايز اعرف ترتيب الخطوات مع الصنايعية هقول اللى عندى وانت رتبوا الصح

السروجى:فرش الصالون بالكامل جلد
(ابواب-كراسى--سقف-نصف التابلوه السفلى-الكونسول+عزل السقف والارضية والصدر من جوه ناحية الموتور)
فرش الشنطة+ بطانة الشنطة(بتتعمل ولا بتتباع استيراد؟؟) وبرضه بطانة الكبوت؟؟ بس عايز اعزله حرارة الاول

الكاوتش الاسود اللى حوالين الابواب والشنطة والزجاج الامامى (الشنطة عندى هاتش باك -زجاج يعنى ماركة ستروين ax) + الكاوتش اللى حوالين الشباك الزجاج بالكامل لانه عندى مش مظبوط وفيه بعض منه متوصل يعنى مش خامة واحده

ظبط الابواب (مجرد ضبط عشان تقفل بهدوءومفصلات تفتح على 3 مستويات) ضبط مكن الزجاج الكهرباء عندى اثنين امامى فقط وهركب 2 خلفى ووحدات رفع امامى

العربية فيها سنتر(بتاع الفابريقة) بس من غير ريموت وعايز اركب السنتر بالريموت والانذار(ايه افضل نوع وسعره كام) ومكنه تفتح الشنطة بالكهرباء من جوه وتشتغل على نفس الريموت وعايز مفتاح واحد يفتح الابواب ويدور العربية

(هعمل اجناب فايبر من اول الرفرف الامامى الى الرفرف الخلفى + العتب والكساحات وتركيب فوانيش الشبورة)
الاكصدامات الاصلية الحالية فيبر يعنى هزود عليها شنبات ورا وقدام

فى خبطة صغيرة فى الرفرف الامامى والخلفى مكان الركن ومعجون مفرقع فى الكبوت وأحد الابواب اكيد ده شغل سمكره مش كده؟؟؟

لون العربية زيتى ميتاليك حاليا بس تعباااااااااان جدا ومش عارف اتعامل معاه -مابينضفش- وان شاء الله هخليه زيتى مط والفيبر هيبقى اسود مط زى لون الفابريقة (فى الحاله دى الصاج اللى اتسمكر يتمعجن فقط ويترش عليه اللون الجديد على اللون القديم ولا اللون القديم ينزل كله ع الصاج ونبتدى من الاول -معظم دهان العربية مش وحش كخامة يعنى مش بايظ فقط خرابيش وتجاريح عادية - ماعدا بعض الاماكن اللى المعجون مطرقع فيها وخصوصا الكبوت لانه كمان بيلب ومش متماسك المهم بعد الدهان المط عايز حاجه تتحط تحافظلى على الدهان ده اطول فنره ممكنه سواء للصاج او الفيبر

الكهرباء الاساسية الحمد لله تمام بس هزود شوية كماليات واغير لمبات الفانوس الامامى بلمبات اقوى زى رالى او اوسرام وهغير وش الفونيس الخلفى وهجيب الفلاشر ابو مكنه اللى عامل زى بتاع الطيارة ده (مش التوك التوك) وازود نور خلفى للصالون والشنطة والكبوت والدواسات تحت الطابلوه ...... اه والزراير اللى بتنور مع فتح الابواب والشنطة مكانها مكسور وعايز تتغير والصوت اللى بيطلع بيقولو عليه زنان از بلبل لما الباب بيكون مفتوح

والكونسول هفصله بالمخدع اللى بين الكراسى حته واحده لانى محتاج ازود زراير واصلا انا ماعنديش كونسول حاليا ( هى موديلها كده)
يعنى الحاجات دى تبتدى بإيه وتنتهى بإيه؟؟؟

ياريت حد يوضحلى بالتفصيل عشان نفسى اجدد ومش عارف ابتدى ازاى
ومش هوصيكم بقى على النصايح والاسعار (الفرش البويه الكماليات ...الخ)
واخد بالى من ايه ؟؟؟ ويُفضل ايه؟؟؟ وبلاش ايه؟؟ و النصايح دى يعنى

[OVERLINE][/OVERLINE][OVERLINE][/OVERLINE][OVERLINE] مش عايز اتقرطس الله يكرمكم[/OVERLINE]

كل ما أحاول أكتبلك حاجه أتلغبط بس هقولك تبتدى ازاى
الأول شوف الأساسيات وأعملها عفشه أو ميكانيكا أو كهرباء
تانى حاجه جمع قطع الغيار اللى هتحتاجها ان كان أكصدام أو فانوس أو رفرف أو .....
سيبك من شغل الصالون دلوقتى
تالت حاجه لو عندك سمكرى روح أتفق معاه على الشغل وظبط نفسك على مواعيدك اللى مش هتحتاج العربية فيها
رابع حاجه شوف السمكرى هيحتاج ايه علشان ميطلعش بمشاوير وأنت مش معاك العربية
يعنى مثلا" حاجه مكنتش مشتريها زى حامل أكصدام مثلا"
بعد ما تخلص سمكره أطلع على بتاع الفايبر أختار شكل العتب اللى عاوز تركبه
بعد ما يخلص أطلع على بوهيجى ورش العربية ويستحسن يبقى البوهيجى جنب السمكرى علشلن ده بيكمل شغل ده
بعد كده أظبط الصالون براحتك أخر حاجه .

الله يفتح عليك وينور طريقك
بالنسبة لنقطة الكهرباء على وجه الخصوص ان شاء الله هعمل زراير اضافية وبالتالى هعمل كونسول واجهز فيه لمكان الزراير دى وبرضه هعمل نص التابلوه التحتانى جلد (هكسية جلد) طبعا التابلوه هيتفك مش كده؟؟ وده شغل الكهربائى وبعد ما يخلص سروجى اركنه بقى عند السروجى لغاية ما يخلص كله وارجع للكهربائى يركب الزراير ويوصل ويركب التابلوه ولا ايه؟؟؟
يار يت تكون فهمت قصدى عشان انا اساسا متخلبط

والف شكر على الترتيب والنصايح

اي حاجه في العربيه من جوا خليها ف الاخر
المهم تخلص الاساسيات سواء ميكانيكا او سمكره و بعدين تبتدي ف التظبيط
و ماتسيبش حاجه عند صنايعي و الحاجه الي تعملها لازم تقف تتابع الشغل

لو هتعمل شغل فى منطقه زى الحرفيين مثلا"
ممكن تخلى الكربائى يشتغل مع السمكرى
بحيث انه يحل الفرش (فرش الباب ) اللى هيحله السمكرى لو فى شغل سمكره فالأبواب
أو بعد ما السمكرى يحل الفرش أركنه عندك علشان ميتبهدلش وميركبوش تانى لغايه ما تخلص خاااااالص وبعد كده العب فالفرش والكهرباء براحتك

الف شكر يا جماعة فعلا انا بستفيد من كل حرف بتشاركوا بيه
واكيد غير بيستفيد برضه
ومعلش لسه هستفسر عن حاجات تانية ان شاء الله