اقدملكم نفسى النتراوى جديد بالبلاستيك

بسم الله الرحمن الرحيم اصدقائى وجيرانى الجداد احب اقدملكم نفسى.. النتراوى جديد بشوكه وبلاستكه واستيكراته،
احب احكيلكوا على حكايتى اللى يمكن افيد بيها حد واكيد هاستفيد من تعليقاتكو ونصايحكو.. انا كنت راكب جولف 2 موديل 1990 من حوالى سبعة سنوات او اكتر وبدون اطاله حصلتلى حادثه مؤسفه جدا جدا وللأسف الشديد كانت مع النترا وطبعا كانت النتيجه المتوقعه ان الالنترا الله يرحمها ( كان هو اللى غلطان بدليل ان وش العربيه عنده انتهى وانا نص الجولف الخلفى اتغير بالكامل)

المهم الكلام ده كان قبل رمضان اللى فات بيومين ومن ساعتها دخلت فى دوامة التصليح اللى اخد اكثر من شهرين.. المهم قررت من بعد الحادثه اركب عربيه جديده.. ولأنى اعتبر موظف ذو دخل ثابت فطبعا علشان اركب زيرو لازم مقدم واقسط مع بنك.. طب اركب ايييييه؟؟؟ ك

كان ساعتها الانفجار الرهيب اللى السيراتو عملته فى البلد وكنت حاسس انى بدأت اشوفها فى السوبر ماركت مع اكياس الشيبسى وناس كتير من اصحابى اشتروها وسوقتها وطبعا كنت مبهور بيها لكن واحده واحده بدأت اعقل ولاقيت ان سعر قسطها هايقطم وسطى.. طيب الأوبترا.. لاقيتها فقيره وتقليديه اكثر من اللازم {طبعا انتو عارفين اصدقاء السوء اللى بيوزو ويوسوسو فى ودانك ويقنعك انك طالما هاتت(روّق) طب ماتت(روّق) فى العالى واللى يستاهل}

صرفت نظر عنها ولقيت قدامى الحل الأمثل.. نيسان صنى سوبر صالون... تحفه عفشه رياضى جنوط ايه بى اس، اى بى دى، اى دى، ميزانين، ثبات ملوش مثيل، اثنين ايرباجز، وشوية حاجات كده لذيذه مع عفشه وموتور وشاسيه يابانى.. تقفيل مصرى يسمح بالتزييق والخامات التعبانه والعزل والزجاج الكهرباء والحاجات اللى بتتعمل فى مصر انا وحظى والمشكله اللى كله بيتكلم عليها استهلاك البنزين ده غير شكلها غير العاطفى والقديم اللى انتهى من العالم كله الا مصر.. عرفت وقتها الموقع ده ودخلت على قسم الصنى والشهاده لله الناس هناك زى الفل والمعلومات والنصايح زى الرز وأصلى أصلى يعنى..

لكن اللى حصل من عند ربنا ان المعرض الموزع اللى كنت حاجز معاه كان فى مماطله غير طبيعيه بالمره فى التسليم وكنت خلاص استلمت الجولف وبقيت مش طايقها وفكرة انى عايز اركب الجديد فى دماغى ومش عايز اصلح فيها اكتر من كده وبرضه مينفعش ابيعها قبل ما استلم لأنى بقاللى 15 سنه ماركبتش غير عربيتى..

طبعا السؤال اللى بيطرح نفسه فين الالنترا من كل ده؟؟ (اوعو تكونو نسيتو موضوع الحادثه كانت مع ايه) لكن والله انا انسان مؤمن بقضاء الله وما كنتش اتشائمت منها ولا حاجه والحقيقه ان كان عندى خمسه من اصدقائى معاهم الالنترا من 2008: 2010 وكلهم هاجمونى لما فكرت فى الصنى ونصحونى بالألنترا.. ولأنى مؤمن ان ربنا هو اللى بيسبب الأسباب لاقيت واحد زميلى فى الشغل بيقوللى لو حابب تغير الاتجاه وتختار الألنترا انا ممكن اخدمك وانا لغاية اللحظه دى ماكنتش فكرت فى الالنترا خالص ولقيتنى باقوله ياريت بس استلم بسرعه، وعلى عكس الصنى لقيت الموضوع دخل فى الجد وفى تيسير ويسر بدرجه كبيره وفى خلال اسبوعين استلمت الالنترا اول فئه فى الاوتوماتيك بـ 104500 من فرع العبور!!!! مش عايز اقولكوا ان كل اصحابى فرحوا جدا بالاختيار ده وأكدوللى انه اختيار افضل الف مره من الصنى وكنت قبل ما استلم دخلت قسم الالنترا واتعرفت على العربيه والمناقشات اللى كانت بتحصل فيها وبالذات من الساده المحترمين جدا tarekabosdera، Ghost2، Ahmed Sharaf وغيرهم كتير وان شاء الله اقدر اكون صديق ليكم كلكم...

المهم استلمتها 1 يناير 2011 ورخصت ((( تكاليف الترخيص بالمناسبه 50 شهادة افراج وبيانات دفعتها فى المعرض+ 30 نماذج+ 120 تأمين+ 365 ضريبه ولوحات+ الرش على الرجاله 20 للى غسلوا العربيه فى المعرض+ 10 المهندس+ 10 موظف الشباك+ 5 عامل الفحص+ 5 تركيب لوحات+ 60 لمندوب المعرض لأنه تعب فعلا+ فيه تقريبا 120 طفايه بس انا مادفعتهاش كان معايا واحده جديده))) وحطيت بنزين 92 (حوالى 50 لتر) و.. وبس خلاص آآآآآآسف على الاطاله لكن حبيت احكيلكو الحكايه من طقطق وان شاء الله احكيلكو قريب عن انطباعاتى عنها (( انا عملت لغاية دلوقتى 270 كم وفرحان بيها جدا وماشى جنب الحيط بسبب التجربه السابقه+ كنت راكب قبلها وابور زلط بالمقارنه بنعومة الالنترا فمش عايز اتهور+ قالولى فى التسليم ماتزودش عن 80 وال ار بى ام مايعديش ال 3 لغاية الألف


أخيرا منتظر انكو تباركولى وتدعولى ان ربنا يرزقنى خيرها ويجنبنى شرها ويحفظهاللى ولو حد عايز ينصحنى بحاجه انا كلى اذان صاغيه


معلش حاجه كمان.. زى ماهو واضح من اسمى انا مسلم.. وبجد الحاجه الوحيده اللى نكدت عليا بعد ما استلمت اللى حصل فى اسكندريه.. الله يلعن من يحاول جعل هذه البلد عراق وسودان جديد.. لازم نفوق بقى وننسى التعصب الاعمى والتدين الظاهرى وبجد نحب ونقبل بعض كمصريين بدون ما نهين بعض ونحارب بعض.. كل التعازى للمصريين مسيحيين ومسلمين على اللى حصل فى ((بلدنا)) واللى حصل فى ((المصريييييين)) فى اسكندريه،.... انا مسلم ورايح الكنيسه اللى جنب بيتى واللى جيرانى واصدقائى المسيحيين رايحينها يوم الخميس 6 يناير بالليل وهاقف مع المصرييييييين اللى بره لغاية ما المصرييييييين اللى جوه الكنيسه يخلصوا صلاتهم واقولهم عيد سعيد.. ولو حصل حاجه فى الكنيسه تحصللنا كلنا
آآآآآآآآآآآآآآآآآآآآسسسسس سسسسسسسسسسسسسسسف على الاطاله وتحياتى

مبروك وربنا يباركلك فيها ويحفظهالك ان شاء الله

فعلا بدون تحيز انت اخترت الاختيار السليم من بين كل اللي ذكرته لان الالنترا السيارة الأفضل كقيمة مقابل السعر ..............

أحب أنبهك لكام حاجة تخلي بالك منها في الالنترا عشان العربية تبقى ماشية معاك كويس وتعيش أطول فترة ممكنة ان شاء الله ::::

1- لما تيجي تغير زيت حط زيت تخليقي وبلاش المعدني . التخليقي بيحافظ على عمر الماتور صيفا وشتاءا وفي ظروف القيادة القاسية وكمان ماتور الالنترا أداءه أفضل مع التخليقي وعن تجربة ...

2- ياريت تمشي على جداول الصيانة والصيانات الدورية ومش لازم الوكيل لانه مفتري .
بس اطمن مفيش حاجة بتتغير في العربية لحد 20 الف كم غير الزيت وفلتر الزيت ..

3- ظبط ضغط الكاوتشات على 32 لان العربيات اول ما بتطلع من المعرض غالبا الضغط بيبقى فيها عالي زيادة عن اللازم .

4- اتبع تعليمات القيادة في فترة التليين وبلاش قيادة بعنف او سرعات عالية لحد ما تعدي 1000 كم ( على الاقل ).

والف مبرووك ...

من صميم قلبى يا باشا :: مبروك وتتهنى بيها بأذن الله..

الف مبروك
اختيارك سليم :)

ألف مبروووك وربنا يباركلك فيها ويكفيك شرها
بس انا عايز أقولك على حاجة مهمة في الفترة الأخيرة بنسمع عن سرقة الانترا كتير وخصوصا الزيرو ( بعد الشر عنك طبعا )
لازم تركب انذار كويس وتظبط حساسه بحيث لو عدى من جنبها شوية هوا صوتها يبقى عالي وكمان موضوع كلبش الدريكسيون والفرامل وتسوجر الدريكسيون
واتهنى بيها وربنا يوفقك ويكرمك يا رب

السلام عليكم

الف الف مبروك على حضرتك واختيار موفق اول فئه في الاوتوماتيك فيها كل الي انت محتاجه من العربيه. وربنا يديك خيرها ويكفيك شرها.
طبعا مش هزود عن النصائح الي الاخوه الكرام قالوها بس هأكد على حضرتك ماتروحش غبور ابو رواش نهائي.
حضرتك هتروح هيستقبلوك كويس اه وكلام حلو اه بس شغل في العربيه لأ.
وكمان بشوفهم مهملين جدا في العربيات ودي عن تجربه والله.
في صيانة ال20 الف غيروا فلتر بنزين وكان لازم يفكوا الكنبه الي ورا وايدهم كلها شحم والفرش الأصلي اتبهدل.
طبعا بالاضافه للمعامله السيئه للعربيات لما بيجي يوصلها من مكان التسليم لمكان الورشه وشغل اطفال. وقدامي حصل ان واحد من العاملين كان بيرجع بسوناتا قام خبط في فيرنا وكمل عادي ولا كأن حاجه حصلت.
وعربيتي خدشوهالي في الاكصدام الي قدام.

مش عاوز اوجع دماغ حضرتك بس حبيت انبهك :)


نصيحه اخويه بقى, الالنترا عربيه جرااااايه ما شاء الله خلي بالك عشان انا قبل ما اكمل اول1000 كيلو جبت بيها 190 (غلط طبعا) بس ماقدرتش اقاوم :)))

الف مبروك ربنا يحميها لك و احسنت الإختيار

كنت عاوز اعرف منك يا استاذ badreldinahmad يعني ايه اول فئة أوتوماتيك
هيا فيها ايه كماليات زي مثلا :-
تكييف - فتح الشنطة وتنك البنزين من الداخل - سنتر - انذار - ABS & EBD وهكذا يعني
لاني ناوي باذن الله ابيع الشاهين واشتري حديث وبفكر بجدية في الالنترا الاوتوماتيك لانها بشعر ان احسن فئة بالنسبة لسعرها .
وياريت تقولنا على العيوب والمميزات كمان واكون شاكر لحضرتك جدا وربنا يجعلك سبب
ويكفيك شهرها ويديلك خيرها يارب

الحمد لله انه وفقنى لاختيار الالنترا والحقيقه يا جماعه انتم بجد ناس فى منتهى الاحترام اللى فى الدنيا وماكنتش متخيل كل الاهتمام ده وفعلا مكسب لى معرفتكم وان شاء الله نكون على اتصال دائم كل الشكر لــ M.Osman - mahmoud_afifi - Puyol - Hacker5 - 3ateef - tarekabosdera على كل اللى قولتوه... والنصايح دى مش هانساها ان شاء الله و بالنسبه لـmuslim_nsb اول فئه فى الاوتوماتيك دى حضرتك فيها التكيييف بكر (مش باللمس) وبالمناسبه اسمع ان اعطاله اقل من التاتش (اللمس) وطبعا فيها زجاج كهرباء 4، سنتر وانذار، فتح التنك والشنطه من الداخل ومش من الريموت.. ومافيهاش ABS ولا EBD ولا فتحة سقف ولا ايرباجز، المميزات اللى شايفها لحد دلوقتى انها ناعمه ويسهل التحم فى حركتها ومتوازنه واستهلاك البنزين معقول جدا لكن مش هاقدر احكم اكثر من كده طبعا لأنى لسه فى اول 1000 كم يعنى ما بجريش ولا بشغل التكييف فاستنانى شويه وهافيدك بكل التفاصيل.. لكن العيب البارز جدا وده فى معظم العربيات الجديده ان صاجها فعلا ضعيف جدا ويؤسفنى اكثر ان الرفارف والعتب ورق فويل ليس اكثر.. للأسف الشديييييييييييد تاكسى ابن ... الله يسامحه كسر عليه وحكللى الرفرف من الشمال ونزلت وفجعت من المنظر.. الحمد لله كانت اقل الخسائر وحصل ان حته من البويه عندى اتشالت لكن بجد الصاج بتاع الرفرف خضنى... اسف للإطاله بس حبيت اشكركم واخى العزيز mahmoud_afifi اطمن الحمد لله انا مسيطر بفضل الله على نفسى لغاية دلوقتى، ومش ناوى اروح لابو رواش دى نهائى وفيه مركز قاللى عليه واحد صاحبى فى الحلميه هاجربوا ان شاء الله، Puyol ياريت تنصحنى بانذار نوعه كويس وبرضه رجاء تفهمنى يعنى ايه اكلبش الدركسيون والفرامل (لو سؤال غبى سامحنى) ... tarekabosdera الف شكر على النصائح دى بس ياريت توضيح ازاى اعرف الزيت ده من ده وايه النوع اللى بتنصح بيه موبل؟ الزيت الاماراتى؟ ويعنى ايه تخليقى مش معدنى؟ وبإذن الله هاظبط الكاوتش نيتروجين على 32 لأن الكل اجمع على افضلية النيتروجين

احنا تحت امر حضرتك :)
معلش قدر الله وما شاء فعل , اوقات تحس ان صاج الالنترا ضعيف و اوقات تحسه قوي. على حسب ستر ربنا :)
وماتزعلش نفسك, اي عربيه لازم تتخبط وهي جديده (ختم الشوارع المصريه)

والاستاذ Puyol كان يقصد الكلابشات الي بتستخدم عشان الحمايه من السرقه
كان في موضوع في المنتدى عن الحكايه دي http://www.nilemotors.net/Nile/192432-a.html
واي استفسار احنا تحت امر حضرتك

اقتباس:

---

المشاركة الأصلية كتبت بواسطة mahmoud_afifi

احنا تحت امر حضرتك :)
معلش قدر الله وما شاء فعل , اوقات تحس ان صاج الالنترا ضعيف و اوقات تحسه قوي. على حسب ستر ربنا :)
وماتزعلش نفسك, اي عربيه لازم تتخبط وهي جديده (ختم الشوارع المصريه)

والاستاذ puyol كان يقصد الكلابشات الي بتستخدم عشان الحمايه من السرقه
كان في موضوع في المنتدى عن الحكايه دي http://www.nilemotors.net/nile/192432-a.html
واي استفسار احنا تحت امر حضرتك

---

الف شكر.. وانا دخلت على موضوع الكلابش ده وذهلت لما قريت اللى فيه والحكايات الغريبه بتاعت السرقه.. انا هاشترى الكلابش ان شاء الله واستخدمه وبفكر بجد انى اعمل تأمين شامل على العربيه هوه صحيح هايقطم وسطى لكن احسن من انى الاقيها اتسرقت.. دى قسط يعنى هامشى فى الشوارع زى المجنون لو لاقدر الله اتسرقت واقعد 7 سنين بادفع اقساطها

الف مبروك ياريس مع إنها متأخرة أوى
لكن أنا النهاردة لسه جاى فى ايدك أنا كمان جبت إلنترا 2008 بجد رفاهية منتهى الرفاهية فى القيادة لكن مباحولش أجرى بيها رغم انى مدمن جرى لكن ربنا يسترها على الكل
بس قولى عملت إيه فى موضوع الكلابشات
ياريت تقولى عشان اجيب خوفتونى

الف مبروك وشكرا على سرد التجربة

اولا مبروك وربنا يباركلك فيها يارب ويديك خيرها ويحميك من شرها
اعتقد ان موتور الالنترا هو نفسه موتور الفيرنا ولكن البودي في الالنترا اتقل من الفيرنا وبالتالي اداء الالنترا على الطريق هيكون أفضل من الفيرنا من حيث الثبات
العربية جميلة جدا
موتورها رائع
ما تزودش عن 90 في اول 1000 كم زي ما المعرض قلك وان كنت افضل انك ما تزودش عن 90 لمدة 2000 كم
لما توصل بالعداد ل 1800 كم مثلا افتح بالعربية وفوق الموتور بتاعها شوية وهات 160 و 170 ودوس خلي الموتور ينطق عشان مينساش نفسه انه هيونداي ويفضل فاكر انه يقدر يجري في اي لحظة ودي مرحلة تفتيح الموتور فدوش وما تخافش على الموتور لأنه هيكون لين خلاص
بالنسبة للخبطة اللي انت اتخبطها دي معلش قول الحمد لله
من الصيدلية هات ازازة ايثانول 70% مع قطنة ورش المكان بتاع الخبطة دا وهتلاقي اللون نوعا ما بقا اقرب للون عربيتك الاصلي -دا لو مفيش خدوش واصلة للصاج نفسه
وبالتوفيق ان شاء الله

- / د.محمود صلاح / capo_em/ Ranger
شكرا لكم جميعا على التهنئه وشكرا Ranger على النصيحه والحمد لله فى نفس اليوم واحد صاحبى شالها بتنر بس قاللى لازم تغسلها بصابون علشان لو الشمس ركزت عليها تبقع، وان شاء الله احاول اطبق النصيحه لكن 170 دى ماوعدكش اعملها على الاقل السنادى علشان انا لسه ما تخلصتش من اثار الصدمه اللى فاتت
capo_em اوعدك اول ما انفذ فى حاجه كويسه اقولك عملت ايه ومنين وبكام
اكرر شكرى للجميع

10000000000000000000000000000000000000000000000000 0مبروك ياباشا و قولنا عن انطباعك

الف مبروك عليكم و ربنا يستر طريقكم
بس ياليت تنزلوا المواصفات بالصور عشان ندعيلكوا
انا اخدت قرار الشراء و ان شاء الله الاسبوع الجاي هخلص الموضوع
هبقى النتراوي.. طبع اذا سمحتم لي !!

الف مليون مبروك على العربية وربنا يرزقك خيرها ويكفيك شرها باذن الله

الف الف الف مبروووووووووك

ربنا يباركلك فيها ويكفيك شرها

مبرووووووك من الاعماق والى الامام وبالتوفيق يارب

الف مبروك ربنا يحميها لك و احسنت الإختيار

وإن كانت متأخرة قليلاً ... ألف مليون مبروك على العربية وربنا يرزقك خيرها ويكفيك شرها باذن الله

ولكنى لم أدخل للمنتدى من فترة بسبب الأحداث الجارية .. وثورة شباب الأمة .. سلمت سواعدهم.

وأحسنت الإختيار .. أقولها لك بعد تجربة قيادة إلنترا لمسافة 160 ألف كيلومتر (60 ألف مانيوال + 100 ألف أتوماتيك).

ويمكنك فتح الشنطة من الريموت بالضغط على ذر الفتح بالريموت (رمز القفل المفتوح) لمدة ثلاث ثوانى سيفتح العربية أولاً ثم الشنطة.

وإنذار كويس .. ممكن SPY 500 two way لإن مسافته حوالى 500 متر فى الجو المفتوح .. وهو نوع كويس.
وكمان ممكن تأمن العربية بدايرة ريلاى Relay علشان يفصل كهربة العربية مع الإنذار فلا تدور إلا إذا فصلت الإنذار.

تحياتى
محمد