الموضوع: كان نفسى اكون معاكم

فعلا كان نفسى اكون معاكم من ملاك الصنى واما كنت كتبت كتير فى رمضان اللى فات واشهد لكم يارواد قسم الصنى بالكفاءه والجدعنه واسداء النصائح الغاليه اللى كانت زى الرز.. لكنها ارادة الله.. كنت حاجز سوبر صالون 2011 من معرض (بلاش اقول اسمه ومنهم لله) وقعدونى شهرين من غير تسليم بحجة ان المصنع ما بيطلعش عربيات برغم انى كنت بشوف سوبر صالون جديد فى الشارع.. وكان المعرض ده عامل خصم عندى فى الشغل على سعرها من 10000 الى 96750 وطبعا كانت فرصه ذهبيه تماما وكل اللى فى القسم اكدولى انها اختيار موفق لامكانياتها وطمنونى من العيوب الشائعه (البنزين والتقفيل المصرى وخلافه) لكن ما اقدرتش اصبر وكنت عايز عربيه بأسرع وقت منهم لله تانى.. ويوم السبت اللى فات استلمت الاختيار التانى وهو الالنترا 2011 اول فئه فى الاوتوماتيك.. وحبيت اجى اشكر كل اللى كتبولى كومنتات ومابخلوش عليا.. الف شكر يا محترمين وعلى وعد بزيارتكم من وقت للتانى
كلمه اخيره.....

زى ماهو واضح من اسمى انا مسلم.. وبجد الحاجه الوحيده اللى نكدت عليا بعد ما استلمت اللى حصل فى اسكندريه.. الله يلعن من يحاول جعل هذه البلد عراق وسودان جديد.. لازم نفوق بقى وننسى التعصب الاعمى والتدين الظاهرى وبجد نحب ونقبل بعض كمصريين بدون ما نهين بعض ونحارب بعض.. كل التعازى للمصريين مسيحيين ومسلمين على اللى حصل فى ((بلدنا)) واللى حصل فى ((المصريييييين)) فى اسكندريه،.... انا مسلم ورايح الكنيسه اللى جنب بيتى واللى جيرانى واصدقائى المسيحيين رايحينها يوم الخميس 6 يناير بالليل وهاقف مع المصرييييييين اللى بره لغاية ما المصرييييييين اللى جوه الكنيسه يخلصوا صلاتهم واقولهم عيد سعيد.. ولو حصل حاجه فى الكنيسه تحصللنا كلنا