قانون المرور الجديد هيسود عيشتنا

**peranha** · 30-03-2008 07:58 AM

قانون المرور الجديد اللي هيناقشوه خلي كل حاجه نعملها عليها حبس حتي لو ركنت امام محل دقائق تشتري حاجه حبس. لو مشيت عكس الاتجاه حبس . لو نسيت رخصتك في البنطلون وانت بتغير هدومك حبس . لو نسيت تجدد الرخصه حبس . لو استعجلت وسقت العربيه بدون رخصه حوالين البيت تشتري حاجه علي السريع كده حبس . ده غير الغرامات اللي تضاعفت وعقوبة الغاء الرخصه تماما في بعض الحالات .. ده بأه غير الراداروبلاويه ..يعني ابشركم العيشه هتبقي هباب في هباب .

**r0xer** · 30-03-2008 08:23 AM

بالعكس ياريت الكلام دا يتطبق.. النظام حلو و ساعتها هيبقى اللي بيسوقو هما النخبة في السواقة فقط و دا المطلوب طبعاً.

المهم إنه يتنفذ على الكل فعلاً.. مش معلش أصل البيه إبن رشا هانم ولا البيه إبن سعد الدالي باشا :d

**tutankhamoun** · 30-03-2008 08:27 AM

طبعا الصرامة هي المطلوبة مع أغلبية السائقين المصريين
و لكن بما أن الشعب لا يثق في الشرطة
و الشرطة بتعامل الشعب معاملتين ( واحد ابن البطة السودة و الثاني ابن البطة البيضا )
فطبعا الشعب خايف
بس أيه الحل
مش الصرامة أحسن من آلاف الناس اللي بيموتوا يوميا على الطريق ؟؟

**peranha** · 30-03-2008 08:39 AM

المشاركة الأصلية كتبت بواسطة r0xer

بالعكس ياريت الكلام دا يتطبق.. النظام حلو و ساعتها هيبقى اللي بيسوقو هما النخبة في السواقة فقط و دا المطلوب طبعاً.

المهم إنه يتنفذ على الكل فعلاً.. مش معلش أصل البيه إبن رشا هانم ولا البيه إبن سعد الدالي باشا :d

لأ يا حبيبي ابن رشا هانم وابن سعد الدالي هيفضلوا فوق القانون واللي كان بيمشي بمكالمة تليفون برضه هيستمر. واللي هيتقرف احنا
السير عكس الاتجاه هي دي اخطر حاجه ولازم يكون عليها حبس لكن نسيت الرخصه اتحبس !!! ليه ؟ طالما امتحنت واترخص ليه بالقياده وكل الحكايه نسيتها ..يسحب رخصة العربيه مثلا واستلمها لما اجيبله السواقه .
وبعدين القانون مليان عبارات مطاطه هتخلي الظباط يسترزقوا تمام

**Chicco** · 30-03-2008 08:39 AM

المحروسة مش ناقصة قوانين
المحروسة ناقصة حاجات كتير منها تطبيق القوانين و القضاء على الكوسة
حال المرور و الشارع المصري مش حيتصلح إلا لما البلد كلها تتصلح ....أيون البلد كلها
و سلم لي على سلومة و جميع الاخوة :D

**OlaOsman** · 30-03-2008 08:42 AM

عشان كده علقت على موضوع مشابه بجملة واحدة.. أفلح ان صدق

يعني أفلح لو اتطبق على الكل بدون تمييز، انما تطبيقه على فئة دون الأخرى هايزيد الطين بلة و الأوضاع تسوء أكتر.

**elayat** · 30-03-2008 08:48 AM

يلا بقا خلينا نبقى زى الناس الحلوة إللى فى دول أوروبا
وبجد الشعب المصرى لازم معاه الصرامة والعقوبات الصارمة (بجد إحنا إتعودنا على الكرباج) وأنا مصرى أبويا مصرى:D:D:D:D
ولازم نعمل موضوع فى المنتدى موضوعه (الإلتزام بقواعد المورور)
وبجد هانبنى مصر جديدة خالية من اى مخالفات
بس ياريت القانون الجديد يمشي على الكل
مع العلم إن إللى بيقوللى (خصتك)بيبقى يومه طيييييييييييييين
وأدينى بحلف والله العظيم أنا بنفذ كل قواعد المورور لدرجة إن صحابى بيترقوا عليا ويخدوا عليا السلخة:D:D:D:D
ربنا معاكم ومعانا ويارب تكون مصر أحلى من كده فى شوارعها ومرورها وكماينها

**hazem_khidr** · 30-03-2008 08:52 AM

كل غربال جديد و ليه شده.
يعني يتطبق الاول لفتره بصرامه و بعدين زيه زي لباقي.
فاكرين قانون حزام الامان ؟؟؟؟؟؟!!!!!!!!

**Chicco** · 30-03-2008 08:52 AM

"أفلح إن صدق" كان نفس تعليقي برضه لما نقلت الخبر أول مرة
http://www.nilemotors.net/Nile/showthread.php?t=18720

اللي إتلسع من الشوربة.......مابقاش يصدق الحكومة ;)

**peranha** · 30-03-2008 09:37 AM

عايزين الصراحه انا في منتهي الزوق مع المشاه لدرجة اني امتنع عن استخدام الكالاكس حتي لا استعجلهم لدرجه تثير من يجلس بجواري واصبر عليهم واستناهم لما يعدوا الشارع براحتهم بلا اي ملل مني وكثيرا ما اسير ورائهم بسرعتهم اذا كان الشارع ضيق شويه ولكن برضه فيه رصيف. واقول لنفسي دوسة بنزين صغيره تعوض .
والعكس تماما مع سائقي التاكسي والميكروباس ..فأنا لا اطيق ايا منهما ولا اطيق ان يترك صفه بمجرد ان السياره التي امامي سيقتني بمترين والاقيه زنق بمقدمة سيارته ليحجز المكان امامي وساعتها باطين عيشته وازنق عليه في اول مناسبه وارجعه خلفي والحقيقه بيبقي نفسي اطلعه علي الرصيف. اكره حاجه عندي اللي يستحدق ويعتبر نفسه افضل من الاخرين ومش عايز يمشي في الصف .