قررت اغير عربيتي اللانوس وان ومش عارف اشتري ايه

**amr_007** · 08-01-2011 12:46 AM

اخواني الاعزاء
انا قررت اغير عربيتي اللانوس وان ومش عارف اشتري ايه
ناس صحابي نصحوني بالاوبل فيكترا الجديده وناس قالتلي الكروز وانا نفسي في الهوندا سيفيك بس خايف من الصيانه انا بصراحه محتار ومش عارف اجيب ايه نفسي اركب عربيه قويه زي الفيكترا وراسيه وتكون فيها كل التكنولوجيا الحديثه في التابلوه زي الكروز والسيراتوا وتكون في نفس الوقت اسعار الصيانه فيها رخيصه اكيد مش هاتكون زي اللانوس بس يعني تكون في متناول الايد انا بصراحه محتار مش عارف اركز اللي يقدر يفدني يتفضل يقولي بس ياريت توضحولي سبب الاختيار

**mgelgel** · 08-01-2011 01:29 AM

طبعا في الاول حط لنفسك ميزانية لتقليل مجال المقارنات لان طبعا الكروز و السيراتو حاجة و الفكترا الجديدة حاجة تانية خااااااااااالص
ثانيا خليك عملي في تفكيرك عشان لازم تفتكر ان العربية مهما الوقت طال هتحتاج صيانة و قطع غيار فشوف اللي يناسب امكانياتك
ثالثا ربنا يباركلك في اي عربية هتشتريها و يكفيك شرها

**mely** · 08-01-2011 01:32 AM

انت حاطت ارع عربيات حلوين بس افضل انك تقارن بين الاوبل الفيكترا والكروز مع مراعاة الفرق الشاسع بينم فى كل حاجه
واحب اشاورلك على تحفه ورائعة رينو الجديده الفلونس بأمانه عربيه لازم تروح المعرض بتاع رينو وتشوفها بعينك مش على النت

**hon** · 08-01-2011 03:27 AM

يافندم مبروك عليك العربية مقدما
وحضرتك عايز حاجة حلوة وراسية وصيانة وكويسة وقطع غيار هادية وشكل وامكانيات أقولك ماتيجى نمسح الفانوس السحرى والعفريت يقولنا ههههههه
بهزر ياباشا بس انا قصدى كل عربية وفيها ميزة وكدا دا غير راحتك الشخصية للعربية
وجه نظرى فى عندك كذا عربية محترميين وقطع غيار كويسة وصيانة حلوة
نيسان صنى او تيدا و كروز وتيوتا كرولا الجديدة وممكن أوكتافيا
شوف بقا ميزانيتك وربنا يوفقك للى فيه الخير
بس بكرة تقول ماكنش حد حنين عليا زيك يا لانوس
تحياتى لحضرتك وبالتوفيق

**mostafa mahmod** · 08-01-2011 11:18 AM

بص يا باشا انصحك تخش فى كل قسم من العربيات اللى انت عايزها هنا فى المنتدى و تسال و تستفسر و تقلب فى المواضيع لغايه ما ربنا يكرمك و تلاقى الكويس اللى ينفعك و خلى بالك مفيش عربيه كامله يعنى لازم هيكون فيها عيب و انت و مزاجك بقى تختار الانسب ليك و ربنا يوفقك و يكفيك شرها
و الف مبروك مقدما

**amr_007** · 08-01-2011 08:24 PM

بصراحه انا متشكر جدا ليكم انتم ناس زي العسل وانا فعلا بفكر دلوقتي في الرينو بس لسه يرضوا ماخدتش قرار

**amr_007** · 08-01-2011 09:41 PM

طب ايه رايكم في الهيونداي الينترا انا جربتها انهارده وسوقتها في جسر السويس وجربتها في الزحمه والدوشه كويسه بس مش عارف حاسس ان الفرامل هبله يدوزب المس الدواسه العربيه توقف فسالت صاحبه العربيه قالتلي انها كانت كده الاول بس بعد كده خدت عيها ايه رايكم

**bondjames** · 08-01-2011 11:56 PM

byd

**M.Elgergawy** · 09-01-2011 01:09 AM

Honda Civic
سيارة لا يعلى عليها

**ahmedteam** · 09-01-2011 11:25 AM

ياريت حضرتك تقولنا انت عايز عربيه فى رنج فلوس كام علشان تكون اجاباتنا واضحه و مفيده ليك

انا عن نفسى لو هاغير هيكون لانسر بومه 1600 اوتو

و الاختيار الثانى سيراتو هاى لاين (عربيه جميله و تكنولوجيا عاليه) بس اليابانى لا يعلى عليه

اما لو بتتكلم فى رنج اكبر من كده يبقى هوندا سيفيك او اكتافيا

من وجهه نظرى بلاش الرينو علشان مش محبوبه فى مصر و سعرها بيقع بسرعه و ليك فى الميجان عبره

و ربنا يوفقك للخير ان شاء الله