الموضوع: الحمد لله استلمت الاوبترا اتوماتيك موديل 2011 يوم 6/1/2011

المشاركة الأصلية كتبت بواسطة amribrahim

ألف مبروك يا باشا بس ممكن حضرتك تتصل على رقم منصور الخاص 16424 و تبعت شكر للراجل ده علشان شكره على نايل موتورز مش كفاية أنا لو مكانك اطلب منصور و أقولهم أنا مبسوط من الراجل ده ممكن مكالمتك ديه تديلو حوافز أو حاجة لما في ناس زيك يتصلوا و يشكرو

فعلا عندك حق والله ياباشا انا بكره الصبح هعمل كده وأقدم شكر على الرقم الخاص بيهم وشكرا لاهتمامك

المشاركة الأصلية كتبت بواسطة bebo_abdeldayem

الف مبروك يا باشا علي العربيه .. و الراجل فعلا عمل معاك كده احلي شغل بس تصحيح صغير .. الجنط الجديد 15 مش 16..و فعلا عامل شكل جميل للعربيه

فعلا الجنط الجديد اتعدل من 14 الى 15 انا اسف دية غلطه مطبعيه وشكرا لاهتمام حضرتك

الى كل الاعضاء اشكركم على دعاوتكم لى ويجزيكم الله خير الجزاء وفعلا ياجماعه الاوبترا عربيه فعلا محترمه جدا جدا جدا وربنا يكفينا شر الطريق ويكفينا شر أخطاءنا وأخطاء الاخرين جميعا أمين يارب العالمين

ربنا يحفظهالك و يكفيك شرها

لو سمحت ممكن تضيف صور لاختلافات اوبترا 2010 عن اوبترا 2011
او تضيف صور للموضوع

المشاركة الأصلية كتبت بواسطة mshehata500

السلام عليكم اخوانى الاعزاء احب اعرفكم بنفسى اخوكم محمد شحاته من الاسكندريه
كنت عضوا صامت من اول اشتراكى بالمنتدى ويمكن اكون شاركت مره واحده فقط عندما حبيت اخذ برايكم مابين الاوبترا والالنترا فى شهر اغسطس 2010 واشكر كل من شارك معى فى الاختيار وساعدنى فى المقارنه مابينهم واخص بالشكر الاستاذ حسام ابتراوى لانه على قدر كبير من المعلومات وبصراحه اتعلمت منه اشياء كثيره اثناء متابعة موضوعاته انا من شهر اغسطس حجزت الاوبترا اتوماتيك 2010 عن طريق ابو غالى وبنك اسكندريه وصليت صلاة استخاره وانتظرت كتير حوالى لشهر ديسمبر فى انتظار موافقة البنك ولاكن ارادة الله فوق كل شىء لم يكن لى نصيب المهم ان اصلا كان موديل 2010 خلص ونزل موديل 2011 ودوة طبعا خير من عند الله واشكر ربنا ان محصلش نصيب فى موديل 2010 المهم رحت بنك تانى وهو الشركه المصرفيه العربيه الدوليه وجبت عرض من ابو غالى فى اول ديسمبر وفى خلال يومين اصدر البنك الموافقه بالشراء ولاكن سبحان الله انا مرحتش مع العلم كل يوم اتصال منهم وانا اقولهم هعدى عليكم بكره وعدى شهر على الموافقه وبرده مرحتش يمكن بعد الموافقه ماطلعت قلقت من موضوع القسط وهمه وفى اول شهر يناير قررت انى اصرف واشترى كاش وفعلا ربنا وفقنى فى الفلوس وجهزت والحمد لله وروحت لابو غالى فرع الداون تاون وطبعا دول عشره من شهر اغسطس وقابلت الاستاذ اسماعيل مدير المعرض واكلمنا فى سعر الكاش وقاللى انى هعملك خصم من الاخر 1250 جنيه ومع ذلك مكنتش مرتاح للشراء من ابو غالى بس تقدروا تقولوا كده انى كنت بشوف اخر سعر كام فى السوق وطلعت من عند ابو غالى دخلت عند البلال اكبر موزع لمنصور عندنا فى اسكندريه من الاخر وبعد طلوع الروح نزللى 500 جنيه بحجت ان العربيه هتغلى الاسبوع الجاى 3000 جنيه وقعدتها عنده احسن من بيعها المهم طلعت من عنده مكتئب لانى كان نفسى اشترى من عنده وفكرت انى اروح للاحسن منه وهو الوكيل نفسه وفعلا روحت يوم 4/1 فرع منصور شيفروليه فى سان استفانو وقبلت مسؤل المبيعات الاستاذ احمد نبيل شخصيه محترمه جدا جدا وربنا يباركلوا يارب المهم قلتله انى عايز اشترى اوبترا اتوماتيك 2011 كاش قالى تحت امرك قلتله هتعملى خصم كام قلى لماتيجى تيجيب الفلوس نكلم قلتله البنك امام المعرض هطلع اجبلك الفلوس حالا بس قلى كام عشان اسحب المبلغ قلى هعملك 1000 جنيه قلته بس دا انا سامع من ابوغالى اكتر من كده قالى كام قلتله لا نتفق الاول على الخصم بتاعك قلى طيب روح هات الفلوس قلتله اجيب كام قالى هى سعرها الرسمى 98500 هعملك خصم 1500 قلتله بس قالى دا اخر حاجه ممكن اعملها معاك قلتله ماش هجيب الفلوس ونيجى نكمل كلمنا
المهم روحت سحبت المبلغ ورجعتله عملى اجراءت الحجز سالنى على اللون قلتله اسود ان شاء الله ودفعت 97000 جنيه واخدت الوصل واتفقت معاه انه يجبلى طقم دوسات حوض هديه وقالى حاضر عنيه عشانك المهم قلتله هستلم امتى قالى النهارده بالليل مكنتش مصدق طبعا المهم دردشنا شويه وروحت لاقيته الساعه 8 مساء بيتصل بيه يبلغنى ان العربيه وصلت عنده بس فاضل الافراج الجمركى هيجى بكره اخر النهار من القاهره قلتله اوكى هجيلك بكره المهم ثانى يوم وكان يوم 5/1 مساء رحت لاقيته مجرش العربيه فى جراش سان استيفانوا جراج خمس نجوم المهم اقلبت العربيه حته حته ورجعت على كل حاجه فيها ودورت وجربت الفتيس وكله الحمد لله تمام المهم انه قالى معلش الافراج الجركى هيجى بكره الصبح الساعه 9 صباحا تحب تاخد العربيه دلوقتى خدها قلتله لا خليها بيته هنا فى الفندق ياباشا والصبح الساعه 9 هكون عندك ان شاء الله قالى اوكى وقالى هطلع معاك واحد سواق من عندنا يرخصلك العربيه وانت قاعد فيها باشا قلتله ياريت المهم روحت وثانى يوم الساعه 9.15 صباحا قالى يلا احنا جاهزين قلتله وانا فى السكه امامى 5 دقائق واكون عندك روحت لاقيت الراجل محضر كل حاجه العربيه وورقها بالكامل والكتالوج والضمان مختوم وطقم الدواسات زى ماطلبته حاولت طبعا اخد غطاء للعربيه قالى لا بقى كده جبرت معاك هههههههههه المهم شكرته على كل اللى عمله معايا وركبت العربيه انا والمندوب بتعهم ودورة طبعا لمبة البنزين منوره دخلت على البنزينه وفولت التنك بنزين 92 بمبلغ 106 جنيه بالضبط ونقلت العداد عل تريب a وصفرته قبل ماتحرك وتوكلت على الله ورحت المرور طبعا يوم الخميس 6/1 وانتم عرفين باه ان المرور يوم الخميس نصف يوم المهم زى ماقلى قعدت باشا فى العربيه والراجل بتعهم بعلاقاته خلص كل حاجه وجابلى الرخصه والنمر لحد عندى وجاب الراجل بالشنيور خرم وركب النمر واليكم مصاريف الترخيص :
16.25 ورق فحص ثلاث سنوات
38.5 دوسيه الترخيص ثلاث سنوات
121 طفايه واحد كيلو
320 تامين ثلاث سنوات
780 ضريبة ثلاث سنوات
يبقى اجمالى الترخيص 1275.75 ثلاث سنوات
55 جنيه اكراميات مرور
100 للمندوب اللى كان معايا بصراحه يستاهل اكتر من كده كمان كفايه ان الواحد موقفش فى شباك من الشبابيك ولا فى الزحمه ولا حسيت انى فى المرور .
الفرق بقى من 2010 الى 2011
طبعا كاسيت شرايط وسى دى تحفه وصوته رائع جدا
تقريبا الدرج اللى جامب السواق فى التبلوه كبر شويه تقريبا
صوت التلكص بقى نفس صوت الكروز رائع جدا طبعا
والجنط اتعدل من 14 الى 15 وكمان طبعا الكوتش اعرض طبعا دوة يدى ثبات اكتر للعربيه مع تغير شكل طاسات الكاوتش
والضمان اتعدل من 60000 ألف كيلوا الى 100000 ألف كيلو او ثلاث سنوات
شنطة العده شالوا منها المفك والمفتاح البلدى يعنى مفهاش غير مفتاح العجل ومفتاح الكوريك
بس كده
انا طبعا لسه بحسب اول تفويلة بنزين هبقى اقلكم اخبرها مع العلم انها متبنش كويس دلوقتى الا بعد 1000 كيلو او 5000 كيلو ودا الاكيد
نسيت اقلكم انى استلمت العربيه كانت عمله 90 كيلو يعنى مشوار المخزن اللى عند قرية الاسد طريق مصر اسكندريه الصحراوى طبعا ذهاب وعوده
وانا اسف على الاطاله ولاكن حبيت احكى كل حاجه بالتفصيل من بداية المشوار لحد اجراءت الترخيص
وبشكر جميع اعضاء القسم
وبشكر استاذ حسام ابتراوى صميم فعلا
وبشكر الاستاذ احمد نبيل من مبيعات منصور شيفروليه فرع سان استيفانوا
وعلى فكره ياجماعه هما غسلوا العربيه بالماده بتاعت الشمع اللى بتيجى معها ولاكن مش مغسوله كويس فقلت للاستاذ احمد نبيل قالى هجبلك جركن وتبقى عدى عليا ان شاء الله يوم السبت خده منى ولما تبقى تروح فى صيانة 5000 كيلوا ان شاء الله هيغسلولك بيه العربيه غسله كويسه
فعلا الناس هناك من كبيرهم لصغيرهم منتهى الزوق والادب والاخلاق .
وشكرا ليكم جميعا
اخوكم محمد شحاته
فعلا يارجاله البلال كان كلامه صح وعن ثقه ان الاوبترا سعرها هيزيد وفعلا منوال بقت 94500 جنيه واتوماتيك بقت 101500 جنيه الحمد لله انى خلصت مع منصور واشتريت قبل ماتغلى واشكر جميع الاعضاء اللى باركولى على شراء العربيه ودعولى بالخير وربنا يحفظ الجميع يارب ويكفيهم شر الطريق اللهم امين
بالنسبه لموضوع البنزين
اول تفويله 58 لتر عملت 445 كيلو
ثانى تفويله 64 لتر عملت 550 كيلو
طبعا دا على ما افتكر بس ان شاء الله المره الجايه هحسبها بالورقه والقلم مع انى شايف ان ثانى مره احسن من اول مره مع العلم ان الكل بيتفق ان الاداء واستهلاك البنزين بيبتدى يتحسن بعد اول 1000 كيلوا وانشاء الله هحسبه وارد عليكم
طيب المهم ايه رايكم فى موضوع زيادة الاسعار دوة هل هيأثر على مبيعات الاوبترا مع العلم ان العربيه دية غلت 6500 جنيه من بداية موديل 2011 لحد دلوقتى لان الاوتوماتيك 2010 كانت 95000 الف جنيه وبعدين نزلت 2011 بسعر 98500 ودلوقتى 101500
طيب ايه السبب ؟

شكرا يااخوانى الاعزاء على مشاركتكم لى بالمباركه وبالدعاء ويارب يكفينا جميعا شر الطريق وشر العين وشر أخطأنا وأخطاء الاخرين اللهم امين .
وطبعا البلال كان عنده حق فى كلامه ان العربيه هتغلى الاسبوع الجاى وفعلا العربيه غلت منوال 94500 واوتوماتيك 101500 موديل 2011 وطبعا هو معندوش موديل 2010 خالص واحب اطمن الناس ان ورق العربيه والافراج الجمركى مكتوب فيه ان العربيه موديل 2011 يعنى مينفعش ان منصور يبيع موديل 2010 على انه موديل 2011 زى مافى ناس متخيله صعب طبعا الكلام دوة واحب اعرف رايكم فى الاسعار الجديده دية هل هتأثر على مبيعات الاوبترا ولا لا ؟