تجربة قاسية + دروس مستفادة
السلام عليكم
ده تانى موضوع لى فى التجربة دى .
لكن الموضوع الأول كان للمصلحة الشخصىيه فقط ولما حسيت أننى كده أنانى قرررت أكتب للإفادة العامة.
الموضوع الأول كان بعنوان (أنا أتخبط والحمد لله) لمن يربد أن يتطلع عليه.
المهم وباختصار أنا معايا حبيبتى سيراتو 2011 خليجى هاى لين (ومش مأمن) واتخبط على طريق المنصورة السريع (فى بلد أسمها بشله) من نقل ثقيل وطبعا وقف الطريق السريع حوالى 10 دقائق ولا حد فاهم حاجة ولا أنا للأسف معرفش أيه الإجراء الى المفروض أنا أعملة فى الظرف ده .
تشاء الصدفة إن رئيس مباحث ميت غمر معدى من الجهة الأخرى من الطريق السريع و شاف الوضع طبعا النقل غلطان لأنه خابطنى من الخلف و أصلا كنا على مطب والطريق ماشى بسرعو 5-10 ك فى الساعة .
المهم رئيس المباحث طلب رخصتى ورخصة سواق النقل وقال روحو النقطة وأعملو محضر . أنا قلت بس هاخد حقى بالمحضر ده .
رحنا النقطة الساعة 12 صباحا وللأسف أمين الشرطة الى المفروض يعمل المحضر كان فى مأمورية إزالة ووصل سعادته الساعة 3 وطبعا ده كله وأنا ومراتى قاعدين فى النقطة والناس عماله تبصلك على أنك ......تيييييت .
المهم جبت واسطة وكلمت الأمين وطبعا الأمين علشان يخدم نصحنى بأنى أروح ولا محضر و لا حاجة وقالى أن الأجراء المتبع فى الحالات دى أن العربيتين هايتحجزو فى النقطة لمدة لا تقل عن 3-4 أيام وهانروح النيابة وممكن نبات ليله هناك غصب واقتدار وفى الأخر هاتبأه قضية هبله ملهاش تلاتين لازمة والراجل هاياخد عربيتة فى الأخر ويروح .
وطبعا خوفا على نفسى ومراتى من البهدلة تنازلت عن المحضر ورجعت بخفى حنين .
الدروس المستفادة :
1 - أمن على عربيتك من أول يوم تشتريها .
لماذا -- لأنك لو مأمن وعربيتك أتخبطت أو عاملنت حادثة بتعمل محضر فى أى قسم وتاخدة وتبلغ شركة التأمين وبتصلح العربية وتاخد فلوسك.
2 - أبعد عن النقل التقيل على قد ما تقدر.
لماذا-- لأنهم ولاد تتتتتتتتت و90 % منهم مابكنش فى وعيه وهو سايق .
3 - لو أتخبطت وللأسف ماكنتش مأمن على عربيتك ...... روح وقول الحمد لله أنك سليم وماتعملش أى حاجة .
لماذا --- لأننا فى زمن متعرفش تاخد حقك إلا بطرق حقيرة.
4 - تجنب دخول أى حاجة لها علاقة بالشرطة حتى ولو كنت باشا ولك أكبر واسطة.
لماذا --- أن لم تسلم من القيل والقال لن تسلم من نظرات الناس وتفكيرهم فيك (هو عمل أيه ومين الى معاه دى)
تظبيط قبل التأمين ولا أيه ؟؟؟
أنا للأسف مخبوط من الرفرف الشمال وعاوز أأمن على العربية مع مصر للتأمين .
سوألى هل هايفرق لو أمنت وهى مخبوطة ولا هايغلو عليا البوليسة .
وتنصحونى بأيه أظبط الأول وبعدين أروح أأمن على نظافة ولا مش فارقة؟؟
ماذا تفعل في وقت الحادثة ؟!؟ الإجابة : ولا حاجة
بكل جوارحي أنا متفق معاك ... أنا عملت أربع حوادث كبار و كلهم مش ذنبي :
-بقعة زيت على المحور
-تصادم من الخلف على كوبري أكتوبر
-تصادم من الأمام من واحدة ست راجعة مارشاديير بسرعة ٦٠ كم !!
-خبطة في جنب العربية و هي مركونة
و لله الحمد ... أنا سليم بس ماخاتيش حقي في ولا مرة ... لا المحضر ولا أمين الشرطة ولا أي حد يهمه مشكلتك ولا أصلا في قانون واضح ينظم الموضوع ده.
زمان أول ماجبت العربية كنت باجري اسامكار و اظبط ... دلوقتي ولا بيهمني و جيتيتي نحسيت !!
و شركات التأمين عاوزة واسطة عشان تاخد حقك .. ياما قرف و كلام كتير و أنت مخالف و و و و .....
الواحد نفسه يجيب عربية و يستمتع بيها و ويكفيه شرها ... لكن في البلد ده لازم قرف الوكيل و قرف التأمين و قرف الضمان و قرف الترخيص و فل أخر طبعا قرف الزحمة !!!!!!!!
لنا الله