عايز اطلع تصريح سفر من الجيش

**ahmedabdelhamid** · 08-01-2011 01:51 PM

عايز اطلع تصريح سفر من الجيش انا معيا تاجيل ثلاث سنوات عايز اعرف الورق المطلوب عشان مرحش العامرية على الفاضى السفر عشان زيارة

**MohssenRashed** · 08-01-2011 01:54 PM

تصدق انا كنت داخل اعمل الموضوع دة هههههههه. بس انا خلصت جيش من 3 سنين و مسافر اول شهر فبراير و برضو خايف اخد اجازة من الشغل و اروح على الفاضي.

**mmtronic** · 08-01-2011 02:19 PM

المشاركة الأصلية كتبت بواسطة ahmedabdelhamid

عايز اطلع تصريح سفر من الجيش انا معيا تاجيل ثلاث سنوات عايز اعرف الورق المطلوب عشان مرحش العامرية على الفاضى السفر عشان زيارة

بص يا سيدى كويس ان انت من الاسكندرية علشان الشرح يكون متطابق

1- يكون معاك صورة شهادة الجيش \ الاصل كمان - نموزج 14 للى خلصو جيش و دة بيكون نموزج الاستدعاء الى فية الرقم الكودى للوحدة

2- تروح مديرية الامن الى فى سموحة ( مكتب التجنيد ) و تتطلب نموزج ( مش متذكر رقمة ) لاستخراج تصريح سفر و تملاة و تختمة ( فى حالتى الختم كان فى القسم الى انا تابع لية علشان انا كنت مخلص جيش و لازم اكشف فى القسم اذا كان عليا استدعاءات او لا بس معاك معتقدش ) شوف العسكرى بتاع مديرية الامن حيقولك اية - و متنساش تظبطة علشان يساعدك و يخدمك( 20 جنية )

3- بعد ما تختم النموزج تطلع على العامرية ( بس خد بالك لازم الـ passport يكون فية الفيزا للبلد الى انت رايحها ما عدا طبعا البلاد الى مبتحتجش فيزا زى سوريا ) لانة مش حيديك تصريح من غير فيزا او تذكرة سفر

4- هناك طبعا فى العامرية تبدا المعاناةبانك تاخد تاشيرة على النموزج بتاعك من واحد لابس ملكى قاعد فى شباك و التاشيرة دى معناها انك تستمر فى الاجراءات

بتبدا الاجراءات بتصوير للورق و متحاولش تيجى بية متصور - دا الزامى انك تصورة جوة و تقف فى الطابور - هوة كده غتاتة

5- بعد ما تصور الورق تروح تدفع الرسوم هية بتكون حسب تاريخ الميلاد اعتقد كنت بدفع حوالى 16 جنية

6- بعد ما تدفع الرسوم بتروح لشباك الخدمة بتقدم ورقك و بيراجعة ( عسكرى متخلف الى بيراجعة ) و تستنى التصريح ينطبع

و بالتوفيق

**MohssenRashed** · 08-01-2011 02:25 PM

شكرا اوي ياباشا دلوقتي انا مخلص جيش اجيب نموذج نموزج 14 ده منين؟؟؟

سؤال كمان الحاجات دي بتاخد اد اية يوم . اتنين , تلاتة .......... ؟

**mmtronic** · 08-01-2011 03:07 PM

المشاركة الأصلية كتبت بواسطة mohssenrashed

شكرا اوي ياباشا دلوقتي انا مخلص جيش اجيب نموذج نموزج 14 ده منين؟؟؟

سؤال كمان الحاجات دي بتاخد اد اية يوم . اتنين , تلاتة .......... ؟

نموزج 14 دة انت بتاخدة و انت بتنهى خدمتك - هية حتة ورقةبيضاء معفنة بحجم كف اليد - طبعا بتاخدها و انت خارج من الجيش و مفيش حد من اخوانا البعدا بيقولك اهميتها فتقوم ضايعة منك و انت مش حاسس لغاية ما تحتاج تطلع تصريح سفر تقوم تصحى على الكابوس - زى ما حصل معايا

بص الى عملتة انى عملت مذكرة بضياع نموزج 14 فى القسم بناء على طلب مكتب التجنيد فى القسم و ختمتة من المامور و طلعت على مدرية الامن بسموحة فالعسكرى الى هناك قالى مينفعش ( شوف يا اخى البلد الى شغالة بمليون قانون كل واحد لة قانونة ) المهم قمت غامز العسكرى ب 20 جنية قام عاملى واحد جديد خصوصا ان كود الوحدة و دة هوة المهم كانو بتوع القسم طلعهولى من السجلات عندهم بعد تدوير و طبعا الباشا العسكرى عندة الكود جاهز و العشرين جنية جاهزة فقام عاملى نموزج 14 جديد علشان استخدمة كل مرة

اليلة السودا دى لو ورقك الى قلنا علية جاهز مبتاخدش غير يوم لو معاك عربيتك

بس اعمل حسابك فى يومين

يوم لنموزج 14 و رحلة مكوكية من القسم للمديرية
يوم كامل للعامرية

**MohssenRashed** · 08-01-2011 03:13 PM

شكرا جدا ي كبير و انا اكيد نموزج 14 ضاع مني ربنا يسهل و اعرف اطلع الحوار دة .

**mmtronic** · 08-01-2011 03:16 PM

المشاركة الأصلية كتبت بواسطة mohssenrashed

شكرا جدا ي كبير و انا اكيد نموزج 14 ضاع مني ربنا يسهل و اعرف اطلع الحوار دة .

بالتوفيق و ربنا معاك

**Everlasting** · 08-01-2011 03:54 PM

تصــريح السفــر لا يحتاج لجـــواز السفــــر ولا التأشيرة ولاتذكرة الطيــــران.
المطلوب هو أنك تذهب إلى منطقة التجنيد حاملاً معك أصل شهادة التجنيد وبطاقة الرقم القومي .. ويكون معاك صورة لكل منهما، ولو مش معاك صور فيه مكتب هناك للتصوير. ثم تذهب للشباك المختص وتعبأ نموذج تكتب فيه بياناتك وجهة السفر وتنتظر من ساعة لساعتين ثم تستلم التصريح، وتخليه معاك لحد ما توصل المطار وتسلمه هناك لضابط الجوازات.

..

**korkor** · 08-01-2011 03:55 PM

هى الدنيا بقت معقده ليه كده انا كنت بروح اطلع تصريح السفر ده فى نص يوم بس كنت بلف على كذا مكان واخر مره فى 2008 هو حلميه الزيتون بس وزى الباشا خلال ساعتين كنت مطلعه

**mmtronic** · 08-01-2011 07:45 PM

المشاركة الأصلية كتبت بواسطة everlasting

تصــريح السفــر لا يحتاج لجـــواز السفــــر ولا التأشيرة ولاتذكرة الطيــــران.
المطلوب هو أنك تذهب إلى منطقة التجنيد حاملاً معك أصل شهادة التجنيد وبطاقة الرقم القومي .. ويكون معاك صورة لكل منهما، ولو مش معاك صور فيه مكتب هناك للتصوير. ثم تذهب للشباك المختص وتعبأ نموذج تكتب فيه بياناتك وجهة السفر وتنتظر من ساعة لساعتين ثم تستلم التصريح، وتخليه معاك لحد ما توصل المطار وتسلمه هناك لضابط الجوازات.

..

سيدى الفاضل

كل الى انا قلتة لاخوانى مش من واقع الفتى انما من واقع التجربة

جايز فى القاهرة مثل الهايكستيب الوضع بيتغير و اكيد حضرتك قريت ان انا قلت ان كل واحد لة قانونة فى البلد دى

و انا نقلت تجربة استخراج تصريح سفر من منطقة تجنيد العامرية بالاسكندرية - على فكرة انا استخرجت حوالى 9 تصاريح سفر من العامرية لانى بسافر كتير و الحمد لله انا خلصت فترة الاحتياط و بقيت غير مطلوب

فى منطقة تجنيد الاسكندرية بالعامرية لالالالالالالازم يا اما تاشيرة للبلد الى انت عايز تسافرلها او تذكرة طيران

و على العموم الاخوة لما يستخرجو التصريح من العامرية ممكن يقولولك اذا كان كلامى صح و لا لا

و شكرا