من حوالي 3 اسابيع وانا عاوز اشتري فيرنا كاش ... واثناء عملية البحث وجدت التالي :
- الشراء من غبور : سعر مرتفع وبيشترط دفع المبلغ بالكامل قبل الإستلام بإسبوع .. وتأخر في التسليم (اسبوع او عشرة ايام) وطبعا بتشتري حاجة مش شايفها فممكن عند الإستلام تلاقي خدوش او اللون مش المطلوب
- الشراء من المعارض .. ممكن تجد سعر اقل من غبور بألف جنية وممكن تلاقي اللون اللي انت عاوزه وبالتالي افحص العربية وادفع واستلم ..
فطبعا فضلت اشتري من المعارض ..
يوم الثلاثاء 18-03-2008 نزلت الف علي المعارض .. واثناء البحث مريت علي معرض غبور فوجدت عندهم عروض وهدايا كالتالي :
1- تركيب طقم زينون بقيمة 1200 جنية (بس انا قلقت من المرور فقلت اشوف عرض غيرة)
2- كارت ايليت للصيانة المنزلية وخدمة الونش (ملوش لازمة لأن السيارة جديدة وبياخدوا مصاريف كبيرة للصيانة المنزلية)
3- كارت خصم 10 % علي قطع الغيار ( ملوش لازمة لأن السيارة في الضمان ولسة ثلاث سنوات لحد متخرج برة الضمان)
4-كارت مشتريات من معرض بي تك بقيمة 1000 جنية
انا قلت هو الإختيار الرابع اجيب غسالة ايديال زانوسي ولا ثلاجة جولدي او توشيبا او بوتجاز كريازي او ..... ده معرض اجهزه كهربائية وفيه انواع واشكال ياما
والبائع وعدني اني استلم يوم الخميس واشار الي سيارة نيو اكسنت وقالي ان فيه سحب عليها ....
قلت اشتري من غبور ثقة برضه و بالهدايا السعر زي المعارض ..والتسليم بعد يومين .. ومين عارف جايز اكسب في السحب واخد نيواكسنت هديه كمان .. فتعاقدت ودفعت المبلغ بالكامل
لكن يبدو ان مفيش حد ثقة اليومين دول لا المعارض ولا غبور
اولا : موضوع السحب علي نيواكسنت : كذب لا يوجد سحب ولا غيره
ثانيا : البائع لم يوفي بوعده وإستلمت بعدها بحوالي اسبوع
ثالثا :استلمت السيارة وانا مروح بيها سمعت صوت تزييق (زي ما يكون بلاستك او فبر) صادر من خلفي بيظهر لما يكون الطريق فيه خشونه او في المطبات
اتصلت بالبائع وقلتلة .. قال لي روح الصيانة في ابو رواش .. وعجبي .. استلم العربية الجديده وتاني يوم مفروض اخدها الصيانة ؟؟؟؟ حاجه تقرف
المهم .. قلت ارخصها وبعد كده اشوف الصوت ده جي منين..
رابعا: بعد الترخيص واثناء تركيب اللوحات الأمامية .. وجدت "صدأ" في الأجزاء المعدنية اللي الأكسدام الإكسدام الأمامي مثبت بها .. وعجبي عربية جديده وبها صدأ..
خامسا : اتصلت بالبائع وسألت عن كرت المشتريات .. قالي هاتستلمة يوم 29 - 3- 2008
ذهبت امس مساء لإستلام الكارت وكانت المفاجأة ....
- الكارت صالح للشراء حتي يوم 31-3-2008 ... يعني يا تلحق يا متلحقش .. واللي هايتأخر يومين بس خلاص كل سنة وانت طيب
- الكارت للشراء من انواع محددة فقط معظمهم ملوش لازمه (9 انواع sony,philips,indesit,haier,craft,babyliss,daewoo,a riston,playstation)
يعني مينفعش ايديال زانوسي ولا توشيبا ولا جولدي ولا كريازي ولا .....
شوفتوا المقلب !!!!!!!!!!!!!!!!!
حتى انت يا غبور
المفضلات