الموضوع: تجربة الشد مع السيراتو

أخيراً المقدر حصل... وزوزو جاتلها فرصة تجري مع اختها السيراتو على الصحراوي

بما انه الاسكندرانية قرروا يهاجموا القاهرة اليومين دول... قررت استعمل عنصر المفاجأة واعمل هجوم مضاد على اسكندرية وقد كان... الهجوم كان يوم الجمعة الصبح ولسه راجع... وحابب اقول لاسكندرية متشكرين على تبويظ الغسلة... العربية معفنة من الطين على الطريق لدرحة بفكر اصورها للذكرى... الفوجات خلاص منورين زي مطفيين من كتر الطين اللي عليهم.

التجربة الجميلة بقى... وانا طالع من اسكندرية كنت ماشي زي الناس المؤدبة 110... وبعدين زوووووو سيراتو بتنجاني ركباها واحدة شكلها مولودة وف ايدها طارة... معرفتش انها بنت غير لما وقفنا عند أول تحويلة.

عدينا التحويلة ولقيت البنت رجلها تقيلة اوي... قلت اجرب... 110... 120.......... 160......... تحويلة.. انتظار وهوووووب لبسنا المطبات مع بعض.... بعد المطب قلت مش هجري تاني (عشان اشوف هتجري ولا هتستناني) المهم البنت استنتني فعلاً بعد التحويلة

الطلعة من 60 كده مثبتين مع بعض (على الاوتو مش الستب)... على ال100 كده السيراتو طلعت بقت بوزها قدام لحد الرفرف كده وانا مثيت جنبها... على ال 150 كده.... تحويلة ودشششش المطبات (منها لله)

بعد التحويلة دي انا طلعت الاول وهي ورايا بس راكبة على ضهري... انا طلعت لحد ال120 كده... بعدها هي طلعت تاني نفس الفرق اللي فات وجات جنبي... وقرص السنين بقى... بس انا عندت ومش مهم صوت العربية.... خدت الخامس لحد 185 في الرد زون والعربية خدت السادس ونطت نطة كده وبوزي طلع.... من 185 ل 200.... 205 واحنا مثبتين... بعدين دخلنا على تحويلة تانية... هى فرملت بعدي عشان الabs ف طلعت قدامي ودخلت التحويلة قدامي...

انا كان قلبي خلاص هيقف بس قلت اجرب كمان مرة... سبتها تطلع جامد عشان كان في واحد معاه فيكترا سي بيجري معانا من التحويلة... على ال 180 كده جبتهم هما الاتنين وعديتهم على خوانة على ال205 برضه وبعدين تحويلة كمان انا كنت خلاص حرقت ربع تانك ف 100 كيلو جري

بعد التحويلة جريت لحد 160 ملقتش حد معايا ف فضلت ثابت... بعدين فجأة زينون وزووووووو الفيكترا عداني والسيراتو جنبي... سقطت غيار والمرة دي عديت السيراتو مريح بس الفيكترا طلع كان بيلعب معانا.... لحد 185... 200... 205 وهو قدامي.. عربيتي مش بتجيب وهو لسه بيبعد...بصراحة تعبت وهديت وعديت المزة

الغرييييب في الموضوع... ازاي الفيكترا كده... يا جماعة بجد انا كنت برفص على الدواسة وهو طالع برضه... السيراتو حكمي عليها انه الجري معاها ملوش عازة.. العربيتين ادائهم تقريبا متساوي.... والغريب اني سبتها طارت من جنبي وانا كملت الطريق 160 كده... وانا داخل بوابات القاهرة... كانت داخلة قدامي!!!!! مفهمتش انا اللقطة دي... شكلها وقفت في الطريق... مش عارف... جوه القاهرة حاولت اسخنها تاني مرضيتش ف سبتها وجريت لحد البيت.

تحياتي للعربيتين وبجد الفيكترا جريتها قبر.... السيراتو جميلة ماشاء الله عليها اسد على الطريق وماسكة نفسها وتحسها بتزحف كده على الاسفلت بتاكله تحتها

زوزو حبيبتي... انا كنت وعدتها اني مش هجيب ال200 دي تاني... بس كان لازم اجربها مع سيراتو.... الحمد لله الحمد لله العربيتين اسود

اغسلها فين بقى عشان فيه بقعة من تورتة على الكنبة ومراتي اديتها شوكولاتة على الكرسي اللي جنبي... عايز غسيل صالون نضيف