الموضوع: أدوات يــجــب ان تــكــون فـي كــل ســيـارة !!

المشاركة الأصلية كتبت بواسطة dr.hany

lموضوع رائع وخصوصا انها ممكن تنفع الغير برضه

شكرا ليك يا دكتور هاني

فعلا زي ما هتنفعنا هتنفع غيرنا لو مش معاه و بالتالي لو شافها هيجيبها هو كمان و الموضوع ينتشر

نورت يا ريس

المشاركة الأصلية كتبت بواسطة help4me

السلام عليكم ورحمة الله وبركاته
فعلا موضوع رائع , و علي فكرة انا لسة عضواية جديدة ودى أول مشاركة لية و يا ريت ما أتأقلشى عليكم و تفيدونى و عشمى فى ربنا كبير .......
أنا مش معايا مقياس ولا منفاخ العجل (و دى حاجة قلقانى لانى عندى مشكلة فى العجل و مقلقة منه و يا ريت لو حد يقر يفيدنى فى الموضوع دة يرد علية و ربنا يجازية خير )ويا ترى اسعار كل واحدة منهم ايه و اجيبها منين ؟ و كمان مش عندى كبل البطارية و لا شنطة العدد ( و يا ترى دى لازم تكون معايا خاصة انى ست و ماليش فيه؟ ) و يا ترى اسعار كل واحدة منهم ايه و اجيبها منين؟ و ربنا يكرمكم ......................
على فكرة علشان ما احبطكمشى و تقولى دى ست و حتقرفنا . انا معايا المثلث و شنطة الاسعافات و استبن ماشى شوية و كوريك عادى بتاع 127 (عربيتى و لا فخر ) و مفتاح ربط العجل ( ناحية واحدة ) يعنى مش وحشة اوى وانا اللى شايلة هم العربية فى كل حاجة رغم انها مطلعة عينى و الكل بيعمل علية شغل و الحمد لله و ربنا يعيني ..ههه
و على كل, حتى لو ما فيش رد انا اتشرفت بالمشاركة و العضوية و الله الموفق ..................

اولا : اهلا و سهلا بيكي معانا في المنتدي
لو العجل فيه مشاكل يبقي جيبي غيره غيريه بجديد و لو مش هتقدري تجيبي الــ 4 فرد مرة واحدة يبقي جيبي اتنين اتنين و حطي الجديد قدام و افضل عجلتين انقليهم ورا لحد ما تجيبي اتنين تانين و جيبي العجل طبعا تيوبلس يعني اللي هو من غير داخلي و التيوبلس مش ماركة دهنوع الكاوتش و ده لو العجلة دخل فيها مسمار و العربية ماشية العربية بتمشي عادي
بالنسبة لاسعار المنفاخ و المقياس المقياس من5-10 جنيه مش اكتر و بيبقي شبه الموديلتور و هتلاقيه في كارفور و سبينس
المنفاخ كذلك هتلاقيه هناك و تقريبا سعره دلوقتي من 30-50 جنيه
و لو العربية ع الارض هياخد كام دقيقة عشان ينفخ العجلة لو نايمة و لو استعملتي الكوريك و رفعتي العربية حاجة بسيطة عن الارض هتتنفخ اسرع
بالنسبة الكوريك الأفضل تجيبي التمساحة اسهل و اسرع و بيتحمل و ده بيعمل في حدود 80 جنيه و لونه احمر و علبته رمادي
كابل البطارية ده بينفع عشان لو البطارية نامت في اي وقت بتوصليها ببطارية عربية تانية و تشغلي
و في منها جاهز و منها بيتعمل عمولة
بالنسبة للعدة معتقدش انك هتحتاجي اكتر من مفتاح الربط بس الباقي بيبقي موجود عشان لو حبينا نخترع في حاجة في العربية مثلا :)
و لو عايزة ميكانيكي و كهربائي كويس و عنده ضمير انا اعرف ميكانيكي و كهربائي و بنتعامل معاهم طول عمرنا انا و كل اهلي و اصحابي و اهاليهم و العربية بتروح مرة مبتروحش تاني لأن في بعض الصنايعية بيحبوا العربية كل شوية تجيلهم
لو عايزة بلغيني و انا اقولك مكانهم
و اي سؤال تقدري تسألي في المنتدي و ان شاء الله نرد عليكي
و نورتي الموضوع بمرورك

موضوع اكثر من رائع شكرا ليك و اتمنى انه يتثبت في المنتدى العام للسيارات لأنه فعلا هايفيد ناس كتير

انا بحاول فعلا اجمع الحاجات دي في العربية فاكل فترة كدة بجيب حاجة منهم

شكرا ليك مرة تانية