في البدء أحب أحمد وأشكر ربنا الكريم إنه نجاني والموضوع جيه على قد كدة

الحكاية إني يوم الخميس بالليل كنت ماشي على طريق مصر إسكندرية الزراعي وعند الحتة اللي تحت الطريق الدائري فوجئت بواحد بيحدف حجر كبير من فوق الكوبري على العربيات اللي ماشية تحت (تخيلوا الإستهتار وصل لدرجة إيه)

المهم الحمد لله الحجر بفرق توقيت كسر من الثانية ماجاش على جسم العربية جيه قدام فردة الكاوتش اليمين قدام - طبعا الخبطة كانت جامدة وحسيت إن الكاوتش ضرب - ركنت ونزلت لقيت فعلا الفردة نايمة والجنت معووج - طبعاً حمدت ربنا إنها جت على قد كدة وركبت الإستبن ومشيت - المهم بعدها عرفت إن دي مش أول مرة تحصل في المكان دة وإن في عيال بتعمل كدة وممكن كمان بتنزل تثبت صاحب العربية بعد مايتعطل وتقلبه بس أنا الحمد لله ربنا بعتلي شوية ناس كانت ماشية على الطريق وشافوه اللي حصلي وجم وقفوا معايا.

مش عارف والله أعلق وأقول إيه غير "حسبي الله ونعم الوكيل"

دلوقتي يا إخواني أنا محتاج منكم النصيحة - الشفة بتاعت الجنت إتعوجت - في ناس قالتلي لو إستعدلتها ممكن الفردة يبقى فيها رفة بعد كدة - طيب أنا لو إستعدلتها أعمل دة فين عند حد كويس وهتتكلف كام - ولو حبيت أشتري جنت وفردة كاوتش زي اللي جاية مع العربية تمنها هيكون كام وأجيبها منين.

الحمد لله