الموضوع: انا مسافر العين السخنه وعايز شوية معلومات

المشاركة الأصلية كتبت بواسطة ahmedhossam86

اتفضل يا باشا.. اوصل حضرتك شارع عباس العقاد في مدينة نصر و اتبع الوصفة في الصور التالية و ماتنساش تدعيلي و تطمنا عليك..

1- شارع عباس العقاد - عدي تقاطع مصطفي النحاس - الحديقة الدولية علي يمينك - اوصل لحد الميدان اللي عنده شركة انبي - خليها علي يمينك و امشي لحد جامع السلام ما يبقي علي يمينك و خش من عنده يمين

[img2]http://img337.imageshack.us/img337/6662/35652543.jpg[/img2]

2- خليت الجامع علي يمينك - كمل علي طول لحد الميدان - خليك زي ما انت و كمل علي طول بحيث المقابر تبقي علي شمالك - امشي الطريق لحد ما يطلعك علي شارع رئيسي - الزم شمالك و اطلع عشان تبقي علي الشارع الرئيسي ده و لف الــ u-turn و ارجع تاني

[img2]http://img191.imageshack.us/img191/3449/23459352.jpg[/img2]


3- امشي زي ما انت علي طول - علي طول (محور الشهيد) و علي يمينك مدينة عباد الرحمن و علي شمالك نقطة اطفاء و صحراء جرداء :)

[img2]http://img38.imageshack.us/img38/6789/62511080.jpg[/img2]

4- كمل الطريق لاخره - هدي عند الميدان و انزل النفق - و لف لفة صغيرة قدام مصنع الغاز عشان تبقي محطة بنزين وطنية علي ايدك اليمين و عندها مدخل طريق العين السخنة :)

[img2]http://img821.imageshack.us/img821/5529/43492281.jpg[/img2]

جزاك الله خيراعلى تعبك ومجهودك بس انا رايح من الزراعى ومش داخل البلد

المشاركة الأصلية كتبت بواسطة islamnabil

ياجماعة انت حتوهو الراجل ليه
الراجل جاي من الزراعي على الدائري ايلي حيوديه عباس العقاد
حضرتك وانت جاي من الزراعي تطلع الدائري في اتجاه مدينة نصر
يعني تسيب اول طلعة و تعدي من تحت الدائري و بعدين تطلع من اليمين على طول
كده انت في اتجاه مدينة نصر
وانت على الدائري حتعد 3 انفاق
الاول نفق السلام و ده نفق كبير جدا حتعدي عليه في الاول و بعدين حتلاقي منزل طريق الاسماعيلية
تفضل ماشي لغاية ماتعدي نفقين كمان نفق التجمع الاول و نفق التجمع الخامس او الزهراء
بعد ماتعدي الثلاث انفاق حتلاقي نزلة للقاهرة الجديدة تسيبها و تكمل شوية حوالي 10 كيلو و حتلاقي نزلة طريق العين السخنة
حتنزل و حتلاقي علامات توديك لحد اول طريق العين السخنة زي ما الاخ ahmedhossam86 شارح في اخر صورة من اول كلمة ميدان

السرعة على الدائري 90 و يوجد كاميرات ثابتة من اول طريق السويس حتى المعادي يعني حضرتك حتعدي عليهم خلي بالك

السرعة في طريق العين السخنة 120 و يوجد اكمنة رادارات متحركة
او ماتخلص طريق العين السخنة حسب بقى حضرتك عايز تروح فين
لو في اتجاه السويس يبقى حتلف شمال لو في اتجاه الغردقة يبقى حتكمل يمين

بالنسبة للبيات لو انت رايح اتجاه السويس حتعدي على قرية تابعة للجيش و اعتقد حتلاقي اسعارها كويسة

لو في اتجاه الغردقة ممكن حضرتك تسأل في القرى اللي على الطريق اعتقد ممكن تلاقي حاجة مناسبة

جزاك الله خيرا وصفه واضحه جدا والف شكر ليك

المشاركة الأصلية كتبت بواسطة amribrahim

على فكرة الرادار في طريق السخنة رخم أوي و مش ثابت زي زمان أنا كنت حافظ الرادارات اللي على الطريق .. بس هو فيه واحد لسة موجود عند العلامة اللي بتقول إن فاضل 32 ك على السخنة الراجل قاعد على اليمين و الحتة ديه فيها جزيرة أو جبل في النص ديه لسة بلاقي الراجل موجود عندها

جزاك الله خيرا

المشاركة الأصلية كتبت بواسطة alaa99991111

بعد ما تعدي اكاديمية مبارك الجديدة حيقابلك نفقين تقريبا وانت ماشي في طريقك علي الدائري حضرتك حتلاقي يفط طريق القطامية و ده مخرج من الدائري تخش فيه تمشي شويه وبعد كده حتلاقي صينية حتاخد u turn وتكمل علي طول حتعدي من تحت كوبري ( يعتبر اسفل الدائري) خلي بالك من اسفل الكوبري وبعد كده في نهاية الطريق وهو قصير تخش شمال بزاوية 90 درجة (لانك ممكن لو دخلت شمال 180 بيكون الطريق المقابل وانت جاي)
بعد ما تمشي شمال مسافة قصيرة حتلاقي بنزينة وطنية علي اليمين بعدها علي طول حتلاقي اول طريق القطامية علي يمينك

بطول 120 كم وسرعته القانونية 120 كم والرادارت غالبا بين الجبلين قبل البوابة التانية و ممكن بيكون بعد البوابة التانية

و احيانا في منتصف الطريق و نصيحتي متدش عن السرعة المقررة 120 كم لانها كافية

الف شكر ياباشا وكده حلو اوى 120 سرعه كويسه جدا بس بالنسبه للبيات ياجماعه انا اخرى العين السخنه وعاوز ابيت هناك ليله ومش حاكمل فى حته تانيه

شكرا ليكم ياجماعه