الموضوع: هل السواقه اثرت فى اخلاقك؟

اةةةةةةةة
للاسف بقيت اغلط في سري
بس المشكلة فعلا من سلوك الناس حواليك والمشكلة الاكبر لو انت ماشي صح . ودايما بتخانق مع واحد صاحبي يقولي انت ماشي روتيني امشي زي الناس اكسر عليهم وخش فيهم ولا يهمك
واضح ان دة المبدا عندنا في السواقة في مصر. ربنا يرحمنا. وفعلا انا بدات اتخنق من السواقة

في مقولة دايما بتتقال لي( تجنب خطا الغير )
بس مش عارف ازاي

للأسف بتعامل مع كل الناس على انهم اغبياء حتى يثبت العكس و لو حتى واحد مدي اشارة انه رايح يمين او شمال بشك في قواه العقلية لغاية لما يعمل اللي اشارته بتدل عليه
و ده للأسف بيخلليني مشدود طول ما انا سايق عمال اراقب الناس و حتى الناس اللي ماشية ورايا
اصل اخوكو مبيطيقش حتى الحكة في العربية
بس صوت العدة المرعب بيخللي الناس تجري بعيد عني على طول و بيفتكروا اني شاب مجنون و هطيح فيهم تكسير بالعربية اللي مامي جايباهالي
ميعرفوش ان ده اسلوب ارهابي بس على حساب وداني:)

و الله أنا أحيي صاحب الموضوع عليه لأني فعلاً بعاني من الموضوع ده و كان نفسي نتكلم عنها في المنتدى.. فعلاً أنا بره العربية عكس جوه العربية 180 درجة ... أنا في العادي هادي جداً و باخد بالي جداً من سلوكي و كلامي أما السواقة أنا نفسي ساعات باتخض من العصبية اللي بكون فيها.. و طبعاً القولون العصبي بعد 18 سنة سواقة ده أساسي.
و اللي بيعصبني أكتر البرود و البلادة عند الناس اللي بتغلط و الناس الللي بتغلطك و تبصلك كأنك مجنون علشان واقف قبل الخط الأبيض في الإشارة.
في لندن التاكسي كان بيبتدي يتحرك من الإشارة من غير ميبص شمال و لا يمين لما الإشارة تدي أصفر، طبعاً هنا لازم تستنى بعد اللون الأخضر شوية لحد الناس حنفية العربيات اللي ماشية تبطل تنقط و إنت و حظك لو لحقت إشارتك أساساً.
الموضوع ده عنه أبحاث في الدنيا كلها يعني إعملو بحث عن كلة Road-Rage في جووجل هتلاقوا 3.8 مليون نتيجة... و كل المواقع و المؤسسات المتخصصة بتقول نفس الكلام إن فعلاً سلوك الشخص العدواني في السواقة لا يدل إطلاقاً على سلوكه الطبيعي بره العربية و ده الحقيقة اللي بيريحني بعض الشيئ و هداني شوية.. لما أشوف واحد بيسوق بغباوة أو طريقة مستفزة شوية أقول أكيد راجل محترم و إبن ناس و له زوجة و أطفال بس السواقة كدة... مش عارف رأيكو إيه متفقين معايا و لا لأ؟