هل السواقه اثرت فى اخلاقك؟
الصراحه يا جماعه انا بقالى تقريبا سنه بسوق بس اكتشفت انى من بعد ما بقيت باسوق بكون فى العربيه حاجه و بره العربيه حاجه تانيه زى ما تقول كده انفصام فى الشخصيه:D الواحد و هو سايق العربيات اللى حواليه بتخليه يشتمهم بشتايم الواحد مبيحبش يقولها اللى خلانى اخد بالى من الموضوع ده انى انهارده وواحد صاحبى راكب معايا علق على و انا بسوق قالى انه مكنش متوقع انى عصبى للدرجه ديه بس يا جماعه اعمل ايه التاس اللى حواليا بتبقى مستفزه بتخلنى اخرج عن شعورى يعنى اى حد يحط نفسه مكانى (هتعمل ايه لما تلاقى اتوبيس بيكسر عليك و داخل بمبدأ انك مش هتقدر تعمله حاجه) (هتعمل ايه لما تلاقى 3 عربيات بتيكسروا على بعض مره واحد و كلهم طالعين على الحاره بتاعتك اللى انت ماشى فيها) (هتعمل ايه لما التاكسى اللى قدامك يقف فجأه علشان زبون بيشاورله من اخر الشارع و تتحرق الناس اللى وراه) (هتعمل ايه لما تلاقى واحد واقف فى نص الطريق بتاع الكورنيش بشاور عقله يعدى و لا لأ:mad:) و خد من المواقف ديه بالهبل هو جايز الطريق اللى انا بمشى فيه خنيق انا بروح كل يوم من شبرا لبين السرايات و الطريق ده من اكتر الطرق اللى ممكن تخنقك فى حياتك و بعد ده كله لما توصل عند الكليه يا عالم هتلاقى ركنه و لا البشوات اللى فى المرور بتاع بين السرايات خدوها كلها و حطوا على الضغط العصبى ده كله ان العربيه لسه جديده فأنا خايف عليها من الهوا فبعد اللى انا حكتهلكوا ده كلوا هل ليا الحق انى اكون عصبى و انا سايق و لا لأ انا طبعا مش بقول ان العصبيه حق بس هو شىء بيفرض نفسه عليك نتيجة ضغط الاعصاب اللى الواحد بيبقى قاعد تحته و انا حاسس على الشكل ده ان السواقه هتقصر عمرى انا اكتر شىء مضايقنى هو ان الناس دايما كانت بتشهد باخلاقى اجى دلوقت بعد ما اسوق الناس تقولى اخلاقك بقت وحشه معلش ارفتكو معايا بس كنت عاوز افضفض شويه لأنى كنت مخنوق اوى من الموضع ده فقولت اما اشوف انا لوحدى اللى كده و لا ناس كتير