** تنبيه هام : اصحاب الزينون و الفيميه بجميع انواعه **

حبيت احذركم فقط
امبارح انا كنت في كارفور المعادي و راجع علي مدينة نصر .. عيت علي 4 كمائن !
4
واحد في السابع و التاني في عباس العقاد و التالت في مكرم عبيد و الرابع في ميدان سان فاتيما . باليل ( كنت رايح ناحية نادي الشمس ) .

و ال 4 هدفهم الوحيد غير طبعا الحاجات الطبيعية ( حزام .. الخ )

" الزينون و الفيمية "

-الزينون المبالغ فيه لجميع السيارات الي مش نازل فيها زينون ( لانوس - فرنا - كورلا - ..... ) و الي بيعمونا علي الطريق الله يسامحهم !
-الفيميه بكل انواعه ... علي الزجاج الخلفي و الامامي و الفوانيس الامامية و الخلفية .

محادش جاب سيرة ال DVD .

بالنسبة لحجة الزينون للسيارات الي نازلة بيه اصلا ( و دي اشهر حجة بنسمعها - علي كلام ظابط الشرطة الي وقفني )
السيارات الي بينزل معاها زينون بيبقى 6k و مش مبهر زي اخوانا بتوع الانسر :) شمس عامياك وراك
و في كل بلاد العالم ممنوع منع بات تركبه
والفيمية ممنوع طول عمره حتى علي الفانوس لانه بيعتبروه تقليل الاضائة و في حالة الفوانيس الخلفية الي بيتحط عليها احمر كله
بيعمل تضللي في حالة ال Reverse او الاشارات !
وده الي خادت عليه مخالفة ! بس بصراحة معاهم حق .

فياريت بقى الناس من نفسها كدة تشيل الفيميه و الزينون بدل متلبس مخالفة او تتسحب رخصك و حرام عليك تعمي الناس الي حوليك .

خصوصا ان لو عملت احصاء حتلافي 95% من الي مركبين زينون " للابهار " فقط بدون اي فائدة حقيقية - و الي بيسافر كتير في زينون 6k او اقل .. اعلي الف مرة من الهالوجين ولكن غير مؤذي زي الزينون الي عامالين تضيعوا فلوسكم عليه .

كان في اكتر من 14 سيارة من مختلف انواع السيارات بما فيهم مرسديس و بي ام اتاخدو مخالفات
و في واحد قدامي جاه و قاله انا الظابط مش عارف مين مين فين .. قاله يبقى انت اول واحد عارف انك غلطان و حرره مخالفة .

اللهم اني بلغت .

والله يا كريم انا متردد جدا انى اركب الزينون علشان ما بحبش احط نفسى فى مواقف
زى دى

بس بالنسبة للفاميه اللى درجته 0\0 هل فى مشاكل ده كمال ولا لأ ؟؟

الحمد لله لانى فعلا الايام الاخيرة لاحظت ان الموضوع كتر
وهما والعياذ بالله ما عندهمش دم اما تبعد عن طريقة او يعميك بالزينون ده

اقتباس:

---

المشاركة الأصلية كتبت بواسطة CryptonX

و في واحد قدامي جاه و قاله انا الظابط مش عارف مين مين فين .. قاله يبقى انت اول واحد عارف انك غلطان و حرره مخالفة .

اللهم اني بلغت .

---

بجد حصل كده و الله الواحد يحس ان البلد فيها امل شويه

اه ده الي حصل .. . و الي كان بسحب كان ظابط شاب صغير يعني مش رتبة ولا حاجة .

بصراحة الزينون صعب جدا فوق ال 6000 K يركب على غير العدسات لأنة بجد بيعمى جامد جدا جدا و كمان الزجاج بتاعنا الامامى فى العربية بقى مجرح بسبب السايس بيمسحها بفوطة عادية و هية عليها رملة و طبعا بيصنفرة المهم ساعات مببقاش شايف حاجة خالص خالص من الزينون بس على العدسات تمام و مبيعميش حد

اقتباس:

---

المشاركة الأصلية كتبت بواسطة fahd_628

بصراحة الزينون صعب جدا فوق ال 6000 K يركب على غير العدسات لأنة بجد بيعمى جامد جدا جدا و كمان الزجاج بتاعنا الامامى فى العربية بقى مجرح بسبب السايس بيمسحها بفوطة عادية و هية عليها رملة و طبعا بيصنفرة المهم ساعات مببقاش شايف حاجة خالص خالص من الزينون بس على العدسات تمام و مبيعميش حد

---

مهو ده قصدي .. انا ركبت اوكتافيا اليجانس و كورولا الجديدة
كلهم فيهم زينوم و بينور الطريق بطريقة بشعة .. بس انزل اقد ادامه و بص فيه مش حتحس انه زينون خالص الا علشان لونه انقى شوية من الهالوجين - و بعدين موجه مظبوط علي الارض

مش معمول في مستوى المرايا !
وانا بقيت احلى تسلية عندي لما اكون ماشي في طريق سريع علي 90-100 وييجي واحد ورايا يقلبلي بالزينون ( ودي اول حاجة بتوع اليزنون يبقوللك متعملهاش علشان مبيظوش ) يا سلام بقى ! ببقى في قمة السعادة !
بدل ماممشي علي 100 .. بقلل ل 80 - 70 .

احب بس اوضح ان الزينون اللي بيعمي فيه مش كونة 6كيلفن او 8 او حتى 12
اللي بيعمي فيه كون الفانوس مش مظبوط وضارب لفوق بيعمل تشتت للاشعة بتاعتة وده في قمة الاذى
انا عن نفسي في عربيتين مركب ال 6000 كيلفن وده ممتاز عامة واللي اكتر من كدة صاحب العربية نفسة مابيبقاش شايف اكتر من 10 او 15 متر فقط لانه بيضر على ازرق وبعد كدة يضرب احمر
يعني مالوش اي لازمة غير الاذي

أنا والحمد لله مبشغلشى الزينون غير وأنا مسافر بس - جوة البلد مشغل الهالوجين الواطى - بس يا كريبتونكس أنت خوفتنى من فامية الفوانيس لأنى عاملة ورا وقدام - ربنا يستر عليا

اقتباس:

---

المشاركة الأصلية كتبت بواسطة CryptonX

و في واحد قدامي جاه و قاله انا الظابط مش عارف مين مين فين .. قاله يبقى انت اول واحد عارف انك غلطان و حرره مخالفة .

اللهم اني بلغت .

---

لا انتا اكييييييد بتهظر ... انا وانا بقرأ كلامك حسيت انك بتتكلم على لجنة فى مكان تانى غير مصر .... لولا انى عارف انك بتتكلم جد ... كن قولت دية اكيد كدبة ابريل ........
:confused: معقولة ... فعلا فى قانون بيطبق على الكل ؟؟ انا بحلم اكيد :rolleyes:


طيب سؤال فى لبُ الموضوع .... ازاى الظابط بيقدر يحدد اذا كان الزينون دة 6 k ولا لا .... ولا الموضوع بيتم ازاى ؟

السلام عليكم يبدو ان بشائر تغيير القيادات في مرور القاهره بدأت تؤتي ثمارها
الامر الثاني وهذه نصيحه لوجه الله والدال على الخير كفاعله

يا اخوان انا شايف ان من الافضل لوجه ان ننفق المال في ماهو خير
انا شايف انه الزينون او اي كماليات (اكرر كماليات) في السيارة امور ثانويه ليس لها اي لازمه في الظروف الحاليه
الحقيقه انا اقرا الجرائد وانا كلي حسره على طوابير العيش والاطفال المسممين في المدارس.
هذا المنتدى كله ناس مش حاقول مقتدره ولكن على الاقل مرتاحه
يا اخوان من لم يهتم بامر المسلمين فليس منهم
لذلك انا اقترح على الكل هنا ان يعيد النظر في الكماليات ويوجه المبلغ الى وجه من وجوه الخير وبحكم كوني خارج مصر لذلك انا اطلب من المشرفين الكرام انشاء حساب بنكي للتبرعات او على الاقل نشر حسابات بنكيه للتبرع من جهات اخرى وانا باذن الله ولوجه الله ساتبرع بما استطيعه و للاخوه المشرفين حرية التصرف في هذه الاموال بما يرضي الله ورسوله عنا جميعا
والسلام عليكم جميعا

طاب ياجماعه انا معايا فيرنا و بفكر اركب زينون عشان بجد مش بشوف الرصيف و الحفر بليل...اكثر من مره كنت هلبس فى الرصيف اللى فى الدائرى بتاع المطار....ايه احسن حاجه متعمليش مشكله؟؟؟
وهل فى لمبات نضيفه تتجاب و تركب وتنورلى كويس

اقتباس:

---

المشاركة الأصلية كتبت بواسطة a0abde01

وبحكم كوني خارج مصر لذلك انا اطلب من المشرفين الكرام انشاء حساب بنكي للتبرعات

---

للأسف فإن المنتدى ليس من سلطته جمع تبرعات من اى نوع لأن ذلك يسمح به فقط للجمعيات المسجلة بالشئون الإجتماعية، كما ان مسألة جمع التبرعات مسألة عليها رقابة صارمة من السلطات وذلك لسببين احدهما النصب باسم فعل الخير والآخر تمويل الجهات المتطرفة ، لذلك فان هذة مسألة تخرج عن نطاق صلاحيات المنتدى

لكن تبقى وجوه الخير مفتوحة دائما لكل منا ، فكل من ينظر حوله سيجد قريبا او صديقا معوزا يحتاج للإعانة ويتعفف عن طلبها، ولو تكفل كل منا ولو بشكل جزئى بالمعوزين من معارفه ، لما بقى فى بلدنا محتاج

اقتباس:

---

انا شايف انه الزينون او اي كماليات (اكرر كماليات) في السيارة امور ثانويه ليس لها اي لازمه في الظروف الحاليه

---

للأسف حضرتك بتفكرني لما الحكومه -و احنا كمان- كنا بنعتبر حزام الأمان و المرايه اليمين كماليات.

الزينون مش كماليات.. دا عنصر امان ايجابي لأنه بيمنع الحوادث (خصوصا في طرقنا عديمه الخطوط و العلامات الارشاديه) و ده عن طريق رؤيه افضل. موضوع النوار المبهره ده سببه ان كشافات العربيات راكبه غلط و مش مضبوطه و ده هيسبب ابهار حتى لو اللمبات مش زينون.

يا جماعه لما ينورو الشوارع الاول يبقو يتكلمو على مخالفات الزينون اغلب الشوارع مش منوره زى طريق المقطم من مدينة نصر كده و طريق التجمع الخامس..وكلها حفر واكوام رمل وتكسير
انا هستفاد ايه لما اعمل حادث والبس فى رصيف بسبب انهم مش منورين الشوارع المرور هيصلحوها؟؟
وبعدين الناس اللى الزينون بتاعهم بيتعب العين المفروض يضبطو الرجلاش بتاع الفانوس

والله يا اخي الاضواء المبهره سبب لا يستهان به للحوادث على طرق مصر المزدوجه واعتقد اننا في مصر عشنا سنين طويله من غير زينون ولا غيره
وكلنا نعلم ان كثير من السائقين يقومون بضبط الاضاءه حتي تعمي القادم في الاتجاه المعاكس
اما كوني بافكرك بالحكومه لما كانت بتعتبر الحزام كماليات فانا لا اعتقد ابدا ان تركيب سبويلر او جنوط او اضواء مبهره اساسيات باي حال من الاحوال.

وختا ما استعير توقيع الاخ سبعاوي
ومدعشر بالقحطلين تحشرمت ....شرافتاه فخر كالخربعصل
والهيكذوب الكيكذوب تهيهعت ....من ركفه العلقبوط المنف

واضيف (منقول)

تدفق في البـطـحـاء بعد تبهطلِ وقعقع في البيداء غير مزركلِ
وســار بأركان العقيش مقرنصاً وهام بكل القارطات بشنكــلِ
يقول وما بال البـحاط مـقرطماً ويسعى دواماً بين هك وهنكـلِ
إذا أقـبـل البعـراط طاح بهمةٍ وإن أقرط المحطوش ناء بكلكلِ
يكاد على فرط الحطيـف يبقبـق ويضرب ما بين الهماط وكندل
فيا أيها البغقوش لسـت بقاعـدٍ ولا أنت في كل البحيص بطنبلِ

معاني الكلمات لمن لم يفهم

تبهطل : أي تكرنف في المشاحط
المزركل : هو كل بعبيط أصابته فطاطة
العقيش : هو البقس المزركب
مقرنطاً : أي كثير التمقمق ليلاً
البحطاط : أي الفكاش المكتئب
مقرطماً : أي مزنفلاً
هك : الهك هو البقيص الصغير
البعراط : هو واحد البعاريط وهو العكوش المضيئة
أقرط : أي قرطف يده من شدة البرد
المحطوش : هو المتقارش بغير مهباج
يبقبق : أي يهرتج بشدة
الهماط : هي عكوط تظهر ليلاً وتختفي نهاراً
الكندل : هو العنجف المتمارط
البغوش : هو المعطاط المكتنف
البحيص : هو وادٍ بشمال المريخ
الطنبل : هو البعاق المتفرطش ساعة الغروب

ياجماعة والله مافيش احسن من الهالوجين العادى زى الفل وبينور تمام
سيبكوا من الزينون ده مصاريف زيادة

انا برضه يا جماعه كنت بفكر اركبه بس على الواطى و الفوجات مش العالى علشان زى ما حسام قال المطبات و الحفر اللى بتبقى مستخبيه ديه

اقتباس:

---

المشاركة الأصلية كتبت بواسطة a0abde01

وختا ما استعير توقيع الاخ سبعاوي
ومدعشر بالقحطلين تحشرمت ....شرافتاه فخر كالخربعصل
والهيكذوب الكيكذوب تهيهعت ....من ركفه العلقبوط المنف

واضيف (منقول)

تدفق في البـطـحـاء بعد تبهطلِ وقعقع في البيداء غير مزركلِ
وســار بأركان العقيش مقرنصاً وهام بكل القارطات بشنكــلِ
يقول وما بال البـحاط مـقرطماً ويسعى دواماً بين هك وهنكـلِ
إذا أقـبـل البعـراط طاح بهمةٍ وإن أقرط المحطوش ناء بكلكلِ
يكاد على فرط الحطيـف يبقبـق ويضرب ما بين الهماط وكندل
فيا أيها البغقوش لسـت بقاعـدٍ ولا أنت في كل البحيص بطنبلِ

معاني الكلمات لمن لم يفهم

تبهطل : أي تكرنف في المشاحط
المزركل : هو كل بعبيط أصابته فطاطة
العقيش : هو البقس المزركب
مقرنطاً : أي كثير التمقمق ليلاً
البحطاط : أي الفكاش المكتئب
مقرطماً : أي مزنفلاً
هك : الهك هو البقيص الصغير
البعراط : هو واحد البعاريط وهو العكوش المضيئة
أقرط : أي قرطف يده من شدة البرد
المحطوش : هو المتقارش بغير مهباج
يبقبق : أي يهرتج بشدة
الهماط : هي عكوط تظهر ليلاً وتختفي نهاراً
الكندل : هو العنجف المتمارط
البغوش : هو المعطاط المكتنف
البحيص : هو وادٍ بشمال المريخ
الطنبل : هو البعاق المتفرطش ساعة الغروب

---

:D:D:D
لأ فعلاً المعانى وضحت كل حاجة :D ........ أكيد العيب فيا :confused:

^^ أسف للخروج عن الموضوع الأصلى :)

طب انا معاكم فعلا لانو بيتعب العين بس يا ريت حد يقولى على حل معقول للاضاءة ازودها شويه انا لسه معووج عندى جنط بسبب نقره فى اللطريق اللى بيطلع من مدينه نصر لطريق العين السخنه مشوفتهاش خالص غير و انا باسمع الرزعه و بسبب الحكايه دى كنت بافكر اركبه عندى فى دايو لانوس

افيدونا افادكم الله

اللي اعرفه ان فيه تشديد جامد في المرور الأيام الجاية

و اللي بيعدي من التحرير العصر يشوف مدير امن العاصمة (تقريبا اسمه اسماعيل الشاعر) .. واقف بنفسه في الميدان لابس بدلة و بيبعت موتوسيكل ورا اي عربية مخالفة خصوصا الفيميه ..

عامة انا مع النظام .. و فيه ناس فعلا بتعميني بالزينون خصوصا في التحويلة عالمحور بالليل و هما جايين في وشي او في ضهري

النظام حلو برده خصوصا لو هيمشي عالكل

يا اخوانى كل واحد لو ظبط النور بتاعة
الفوانيس والمبات مش حيحتاج لا زينون ولا دياولو
خد مثلا اى عربية جديدة مفيهاش زينون بتكون الاضاءة بتاعتها زى الفل
ومع مرور الزمن احنا الى بنهمل فيها وبعدين نقول مش بنشوف
مش كدة ولا اية

يا جماعه كل حاجة وليها اصول وقواعد
الزينون المفروض يركب على عدسات عشان يوزع قوة الاضاءه بطريقه سليمه
من غير العدسه بيكون الزينون شعاع مستقيم ومبهر جدا خصوصا للعربيه اللى ماشيه امامك
ده غير ان اغلب الناس بتركبه عشان المنظره فقط وما بستعملوش الا عشان يخلى اللى قدامه يوسع للباشا
انا عن نفسى لما بيحصل معايا كده بروح زانقه ورايا وبقفل مراياتى الجانبيه (ضم كهرباء) وطبعا هو لما بشوف كده بيبقى هاين عليه يعيط عشان مش عارف يضايقنى :)

لو التزمنا بالاصول والقواعد هنستفاد كلنا من غير ما نضر حد تانى

اقتباس:

---

المشاركة الأصلية كتبت بواسطة hamedo0

بجد حصل كده و الله الواحد يحس ان البلد فيها امل شويه

---

ما شاء الله

اكيد معاه ميزان

اقتباس:

---

المشاركة الأصلية كتبت بواسطة sherif_84

ياجماعة والله مافيش احسن من الهالوجين العادى زى الفل وبينور تمام
سيبكوا من الزينون ده مصاريف زيادة

---

ايه الهالوجين ده ياجدعان انا معرفهوش....بكام ومنين؟؟وهل الاضاءه بتكون كويسه؟

أشكرك على الخبر السعيد ده
لإن بتوع الزينزن أبو تركيب (لانسر وماتريكس وخلافه ) بيطلعوا عيني وأنا ماشي والله بيقى هاين عليا أزعقله من الإزعاج الضوئي الجامد إلي عامله مش فاهم إيه المنظرة إلي في كده
وربنا يبعد عننا موضوع اللجان ده لإني السنادي ممسوك 5 مرات سرعة لحد أما زهقت من مشاوير مرور الدراسة
وأنا شايف المرور في مصر في تطور يعني الواحد لو شاف مقطورة ماشية على اليمين مايستغربش بس الكلام ده طبعا مش قبل سنسيين