إستشارة فنية في معاملة موتور تويوتا كورولا الملكة 1993 -1300 سي سي 2e

**Mohamed.Mohsen** · 13-01-2011 01:51 PM

الاعضاء المحترمين خبراء المواتير والكورولا الملكة والزيوت

عربيتي تويوتا كورولا 1993 1300 سي سي معايا من شهرين تقريبا اول ما اخدتها كانت بتغير زيت موبيل xhp super وكان الزيت محروق وبيطلع دخان من الشكمان وناقص شوية (واضح انه لم يتغير من فترة طويلة)وحتي وانا بكشف ع الموتور فني البنزينة الفني لم يقيسه وافتكر ان الموتور محتاج عمره مع انه سحبه ممتاز وصوته هادي جدا ومعملش اي حاجة عمرة تقيله فيه ممكن يكون بس شغل خفيف جدا وصيانته بالتوكيل وعامل 189 الف كيلو ومفيش اي اصوات تخبيط او اثار زيت بقربة المياه او .....
المهم غيرت لزيت توتال كوارتز 3000 والفلتر الزيت الياباني الاصلي تويوتا (طبعا مع الصيانة الميكانيكية الكاملة من تغيير جميع الزيوت والبوجيهات والسيور والفلاتر وغسيل الردياتير ومياه التبريد كولر ودورة الوقود والصيانة الكهربائية وضبط العفشة ومراجعة الفتيس وتغيير زيته 90 والفرامل والتيل والزيت والدبرياج وضبط الزوايا وتبديل الكاوتش والغسيل والتشحيم وتنظيف الموتور هواء )ولقيت صوت الموتور تحسن جدا وفاق ونعومته زادت وسحبه واتضبط والدخان من الشكمان توقف ومفيش نقص زيت ع المقياس بالموتور هل هذا التغيير لنوع الزيت مضبوط في حالة موتور استهلك نوعا ما او كفائته قلت وبماذا تنصحوني هل اقيس كبس الموتور واحدد اتعامل معاه ازاي (رحت لميكانيكي كويس جدا وقال يمشي مش محتاج اي شنبر او جوانات أو عمرات طبعا بدون ان يفتح الموتور )ولا اخلط زيت احادي مع توتال 3000 ولا أضيف قليلا من زيت شنبر ولا ابقي اغير المرة الجايه توتال كوارتز 5000 درجة وهل لزوجته اعلي من التوتال ال 3000 (اللي بصراحة ريح الموتور جدا بالرغم من خفته كلزوجة نوعا ما) و هل توتال 5000 كوارتز يفيد اكثر وهل ينفع التغيير من توتال 3000 الي توتال كوارتز 5000 بدون تغيير فلتر الزيت لاني لقيت الفلتر الاصلي تويوتا الياباني بصعوبة.
كل ماسبق الغرض منه تاجيل الفتح او العمرة لان الموتور ال 1300 2E غير موجود في الاستيراد تماما وان وجد واحد صدفة بيكون غالي جدا وطبعا الموتور 1500 أو ال 4A ليس بنفس باقي قطع الغيار للموتور ال 1300 2E الوحيد الصالح للملكة هو ال 1600 الانجكشن بس تعديلاته و المستندات والترخيص و تكلفته كبيرة ومن جهة اخري اكيد طبعا لن اثق باي شغل شنبر او جزء من عمرة للموتور الحالي ال2E ,عايز احافظ عليه قدر المستطاع بدون فتح ولعب فيه . ولضيق الوقت حالياً .

افيدونا افادكم الله

مع خالص الشكر والتقدير وجزاكم الله خيرا

**Mohamed.Mohsen** · 16-01-2011 12:10 PM

بعد سرعة 100 كم بيطلع صوت نحرة بدون تخبيط او علو صوت وتحس الكبس مش مليان قوي اعتقد ده يكون الجوانات او الشنبر

**pro_samir** · 17-01-2011 04:02 AM

بالنسبه للزيت أظن الأفضل للمواتير القديمه يكون معدني بلاش تخليقي (حسب كلام ناس كتير) ، جرب شيل الأصفر الناس كلها بتشكر فيه جدا جدا ، وانا اشتريته ولسه هحطه ان شاء الله

الموتور زي ما بتقول حاول تقيس كبسه الأول شوفه عامل ايه وتابع حالة البوجيهات لو بتعرق زيت ، وهل الزيت هينقص علي المقاس مع الوقت ولا لأ ومقدار النقص ايه .. كل ده هيعرفك وضع الموتور

بالنسبه للعمره ان شاء الله معتقدش انها هتحتاج عمره كامله ، يعني حتي لو هتعمل حاجه هيبقي نضافه + جوانات كامله + تطبيع صبابات مع وش السلندر + طقم شنبر .. وده عن تجربه لنفس الموتور لكن 1000 سي سي موديل 91 عامل 182000 كم ومتعمرش قبل كده وما شاء الله حالته حلوه وشوية الشغل دول فرقو فيه فرق السما من الأرض وبتكلفه موصلتش 1000 ج بقطع الغيار الأصليه كله موجود + ميكانيكي نضيف

ملحوظه: متنساش تغير السير الكاتينه لو مغيرتوش

**ahmed_soft89** · 17-01-2011 09:20 AM

معايا كورلا 1300 ال 4 غيار نفس المكنه 2e عداد 140 الف مكنه بصراحة يجب الوقوف لها احتراما
بقالها معايا 16 شهر معملتش فيها صيانه غير ( تغير بوجيهات يباني - فلتر زيت وهواء - تنظيف كرباتير وتغير البكههات - وتغير كاوتش ) وفي مساعدين خلفي وكبالن هغيرهم قريب
انا بغيرلها زيت موبيل ال 1000 باستمرار والصراحة مافيش اي مشاكل معاها مع تغير الفلتر مرة ومرة
مش شايف اي مشاكل من الزيت نهائي والمكنه في كبسه علي الاول تاكل في الاسفلت وعلي السرعات بتشد جامد بالذات الغيار ال3 عندي ومافيش اي صوت نهائي علي اي سرعه انا مشيت بيها اول ما جبتها كنت علي الدائري 150 والعربية مكانش فيها اي حاجه والحرارة كمان في المزبوط

**Mohamed.Mohsen** · 17-01-2011 09:36 AM

المشاركة الأصلية كتبت بواسطة ahmed_soft89

معايا كورلا 1300 ال 4 غيار نفس المكنه 2e عداد 140 الف مكنه بصراحة يجب الوقوف لها احتراما
بقالها معايا 16 شهر معملتش فيها صيانه غير ( تغير بوجيهات يباني - فلتر زيت وهواء - تنظيف كرباتير وتغير البكههات - وتغير كاوتش ) وفي مساعدين خلفي وكبالن هغيرهم قريب
انا بغيرلها زيت موبيل ال 1000 باستمرار والصراحة مافيش اي مشاكل معاها مع تغير الفلتر مرة ومرة
مش شايف اي مشاكل من الزيت نهائي والمكنه في كبسه علي الاول تاكل في الاسفلت وعلي السرعات بتشد جامد بالذات الغيار ال3 عندي ومافيش اي صوت نهائي علي اي سرعه انا مشيت بيها اول ما جبتها كنت علي الدائري 150 والعربية مكانش فيها اي حاجه والحرارة كمان في المزبوط

ربنا يبارك لك فيها معاك في احترام الموتور العبقري ده رغم انه كاربراتير وليس انجكشن بس الزيت ال 1000 ده بيقولوا عليه زيت احادي بيبقي تقيل جدا صح الكلام ده وبيناسب المواتير المستهلكة نوعا 150 او 200 الف كم ؟
وياريت رايك في موضوعي واحساسي بخفة الموتور وصوت النحرة اللي فيه ع السرعات العالية بعد 100
بالتوفيق

**Ahmed Galal** · 17-01-2011 09:40 AM

اعمل الصيانات الدورية و حط موبيل سوبر و امشى بيه حوالى 2500 كم او 3 شهور وواظب على الموضوع ده لسنة و هاتلاقى الموتور بتاعك بقا زى الفل انا كان عندى نفس المشكلة و قست كبس موتورى كان كويس بس اول ما جبت العربية كان مش مظبوط و حاليا بعد سنة من اللى وصفتوهولك ده الامور مسقرة و كله تمام و عمرة ال 2e سهلة جدا و موجود قطع غياره كاملة جديدة بس الاستيراد ممه قليل قوى كمكنة

**Mohamed.Mohsen** · 17-01-2011 02:43 PM

المشاركة الأصلية كتبت بواسطة ahmed galal

اعمل الصيانات الدورية و حط موبيل سوبر و امشى بيه حوالى 2500 كم او 3 شهور وواظب على الموضوع ده لسنة و هاتلاقى الموتور بتاعك بقا زى الفل انا كان عندى نفس المشكلة و قست كبس موتورى كان كويس بس اول ما جبت العربية كان مش مظبوط و حاليا بعد سنة من اللى وصفتوهولك ده الامور مسقرة و كله تمام و عمرة ال 2e سهلة جدا و موجود قطع غياره كاملة جديدة بس الاستيراد ممه قليل قوى كمكنة

تمام يا أ.أحمد وعموما انا عندي ثقة كبيرة في اراؤك وخبراتك وتمكنك (ماشاء الله) في صيانة الكورولا الملكة من متابعتي لاستشاراتك الفنية للاعضاء اصحاب الملكة وبلاش فتح موتور دلوقتي واللي يؤكد صحة كلامك بعد تغيير الزيت والفلتر والصيانات الكاملة المشروحة بالتفصيل في الموضوع تحسن الموتور تحسن كبير جدا فاضل بس صوت النحرة او الونة في السرعات العالية جدا
دلوقتي اغير الزيت تاني لموبيل سوبر ولا اكمل شوية بالتوتال كانه تنظيف للموتور وابقي اكيد طبعا اغير فلتر تاني مع تغيير لموبيل سوبر لن ينفع الفلتر الحالي رغم انه بقاله اسبوعين بس وياريت تعرفني محل قطع غيار جديدة اصلي ياباني للملكة تكون تثق فيه .في وسط البلد او الجيزة او القاهرة او دمشق او ....

مع احترامي وتقديري

**Mohamed.Mohsen** · 17-01-2011 03:03 PM

وكمان عايز اناقشكم والمهندس احمد جلال في نوع الزيت هو بيطالب بالموبيل سوبر اللي طالع ان الموبيل سئ جدا ونوعيته ساءت مؤخرا اكتر هل انت لسة ماشي عليه؟ وعربيتي كانت ماشية موبيل طول عمرها واغلب الاراء بتقول الشل هيلكس الاصفر او التوتال احسن بكتير من الموبيل رايك ايه افيدني افادك الله بس عموما التوتال ال 3000 حاسس انه خفيف شوية في لزوجته بس هو فوق الموتور جدا بصراحة مجربتش الشل الاصفر اللي جربته في عربياتي ياباني قبل كده برضه وكان هايل ال أسو الاحمر اليونيفلو 3000 كم بس الموبيل مكانش كويس مع الموتور كان بينقص ويسود بسرعة ويدخن من الشكمان ولا يمكن عشان سابوه كتير بدون تغيير قبل ما اشتريها ؟؟ الله اعلم

**Ahmed Galal** · 17-01-2011 08:09 PM

هوا المهم ان بلاش تقعد تغير انواع زيوت كتير من ماركات مختلفة على المكنة اكيد اختلاط الزيوت ديه ببعضها هايعمل مشاكل فياريت تختار نوعية زيت واحدة و تستقر عليها اى بقا نوع يعجبك و ما تقعدوش كتير فى العربية و تغير فلتر كل مرة غيار زيت و ان شاء الله كله هايبقا تمام