سياره مسروقه

**abobido** · 13-01-2011 03:45 PM

بسم الله الرحمن الرحيم
يا جماعه انا هاحكيلكوا اتسرقت ازاى:
انا ركنت عربيتى جنب كشك على رصيف بشارع فيصل الرئيسى ونزلت من العربيه علشان اشترى حاجه وكنت سايب المفتاح لأنى كنت جنب الكشك بالضبط والموضوع هياخد اقل من دقيقه وفجأه جيت ارجع للعربيه مالقتهاش بصيت على الطريق لقيتها بتجرى من بعيد. حد يقدر يتخيل المنظر.أنا فضلت واقف مش مصدق. هوا احنا عايشين فين
الغريب ان الموضوع ده اتكرر اكير من مره بنفس الطريقه حول نفس المكان تقريبا وده اللى انا عرفته من الناس اصحاب المحلات. الأغرب ان مباحث قسم الهرم ومباحث مكافحة سرقة السيارات فى المديريه عارفين الكلام ده كله لكن بيعمل اى حاجه.
ياريت تساعدونى وتخلى بالكم من مواصفات العربيه
العربيه لسه عليها سنتين اقساط والتأمين رفض التعويض علشان المحضر مكتوب فيه ان المفتاح كان فى العربيه لما اتسرقت

ماركة :- بروتون جين 2 – اتوماتيك – موديل 2009

اللون :- أسود

رقم السيارة :- س ل – 5284

يوجد على الكابوت الأمامى أثار معجون دوكو أبيض كما يوجد على الشنطة الخلفية استيكر أبيض مكتوب عليه (Al Tarek)

من يجد السيارة أو يتوصل اليها يرجى الإتصال ب : 0196527722 /0165517598
أنا شاكر لكل واحد عايز يساعدنى حتى لو بقلبوا
ربنا مايحط حد فى موقف زى ده
انا مابنمش

انا رحت اماكن ما انزل الله بها من سلطان
أماكن بيبدلوا فيها العربيات بالمخدرات. أماكن بيبعوا فيها العربيات المسروقه. اماكن لبيع القطع اللى مالهاش ورق
الأماكن ديه كلها الحكومه عارفها

اديت فلوس لضباط وامناء وحراميه

عمار يا مصر

**Amrrr** · 13-01-2011 04:04 PM

ربنا يردهالك يارب
حاول تشوف حد تقيل في الداخلية طالما الموضوع بيتكرر كتير في المنطقة دي --- ربنا معاك

**bobo_8000** · 13-01-2011 06:56 PM

حسبى الله ونعم الوكيل عشان الواحد يدفع دم قلبة ويطلع عينه عشان يجيب حاجة نفسو فيها وفى الاخر تسرق ...المهم ان انت واسرتك بخير ...الحمدلله ...وربنا هيعوضك ان شاء الله...

**MISS_MONA** · 13-01-2011 07:00 PM

ربنا يكرم وترجعلك يا رب

**nicegypt** · 13-01-2011 08:00 PM

السلام عليكم ورحمة الله
انا ساكن فى فيصل وقريب من الجزء دة .. واول مرة اسمع ان فى المكان دة بيتسرق عربيات لزحمة الشارع دائماَ
عموما انت محتاج تنزل تدور على العربية بنفسك وتسأل ف كل حتة .. وانا على اتم استعداد ان اقابلك فى اي مكان وندور عليها لحد منلقيها بأذن الله
لان غالباَ اللى اخدها هيعمل بيها مصلحة ويسبها قريب .. عموما انا نسخت بيانات السيارة فى ورقة وهركز على الجين تو ف طريقي دايماَ
ياريت يا جماعة كلنا نتشارك سوى وناخد بيانات اي سيارة ونحتفظ بيها معانا .. وانا فى انتظار رد حضرتك .. انا بخلص شغلي الساعة 9 مساءاَ
ومستعد اترك شغلي كمان والله وادور معاك .. انت بس حدد الوقت والمكان .. لان كلنا معرضين لحاجة زى كدة .. حضرتك ادعى الدعاء دة

اللهم رد لي ضالتي اللهم يا جامع الناس في يوم لا ريب فيه اجمعني بضالتي اللهم يا عالم الغيب يسري لى امري اللهم امين
واقراء سورة الضحى .. وان شاء الله ربنا هيكرمك .. والله اضايقت كما لو كانت سيارتى .. وهى فعلا عربيتنا كلنا .. متنساش ليا لفة لما ترجع بأذن الله

**zalpany2000** · 13-01-2011 08:08 PM

اللهم رد اليك ضاااالتك يا كريم يا رب
والله انا حاسس بيك جدا جدا

انا عن نفسي اوقات كتير بانزل و اسيب المفاتيح في العربية
يمكن من بتاع شهرين من كتر حوادث السرقة اللي بنسمع بيها دي بطلت

حتي بقيت اشيل اي ورقة ولا كيس منديل علي التابلوه و انا خارج من العربية

ربنا يردها ليك يا رب و يحفظ الجميع من السرقات و كل مكروه يا رب

**Haitham10** · 13-01-2011 08:10 PM

حاسس بالنار الي جواك
ربنا يصبرك ويجحمهم ويريحنا منهم امين

بإذن الله هتلاقيها بس متيأسش وان شاء الله الي اخدها يكون تافهه خدها لغرض شبهه ويسيبها في اي حته

**Karim_Mohy** · 13-01-2011 08:26 PM

حسبنا الله ونعم الوكيل

ان شاء الله ترجع سليمة

**Ashraf_Ibrahim** · 13-01-2011 10:30 PM

لا حول ولا قوة إلا بالله
مبنزلش واسيب مفتاح العربية فيها ابدا
اسيبها مفتوحة ماشي انما مفتاحها فيها لا
هركز مع الجين تو وانا ماشي وربنا يعترنا فيها ويارب تلاقيها ويارب يصبرك
بس انت شوف عسكري او ظابط وفهمه انك هتديله حلاوة كبيرة لو جابها وهما هيعرفوا يوصلولها
مشكلة الحكومة بتاعتنا تنابل مش عايزين يتحركوا
حاجة تحرق الدم