ايه رايكم المبداي في القشقاي

**Bishoy.Girgis** · 14-01-2011 07:58 PM

معلش يا جماعة انا داخل احبطكم شوية
العربية ديه معرض فقط لا غير انما العربية اللي هتنزل مصر هيتشال منها كل الاوبشنز اللي انتوا شايفنها
الطارة المالتيفنكشنز و السقف الزجاجي و الشاشة الدجيتال و كل الكلام ده للاسف
و ان شاء الله احمد هيعمل تقرير متميز جدا جدا عن القشقاي المعروضة و اللي هتنزل مصر
لكن ان رأيي الشخصي انها لو فيها كل الفانكشنز اللي في الدنيا كلها و في الاخر مانيوال تبقي ماتسويش عندي بنكلة
يعني لازم اول شيئ عندي تكون اوتوماتيك بكل المقاييس

**Hossam_Zaky** · 14-01-2011 09:26 PM

السلام عليكم
يا ريت حضرتك توضح المعلومة منين لأن في المعرض قالو انها زي ماهي معروضة بس الكاسيت حيتغير عشان النافيجيشن مش حيكون موجود حتي تحديدا سألت علي زر التليفون بالطارة قالو مش حتنزل بالخاصية دي تحديدا لكن بقية الزراير بالطارة و التحكم الكامل بالكاسي

لأن لو كدة يبقي فيه معلومات ناقصة كتير او مندوبين الشركة معلوماتهم متضاربة و الله اعلم فيه ايه تاني

و انا متفق معاك في موضوع الفتيس الأتوماتيك في ظل بلدنا الزحمة دائما و ابدا

يعني يكون منها اتوماتيك بدون مانيوال عادي زي الجيتا
او اتوماتيك و مانيوال عادي برضه و انت تختار اللي يناسبك
انما تكون مانيوال بس في الفئة السعرية دي مش منطق ابدا

انا برضه بكرة حروح المعرض تاني و احاول اعرف معلومات اكتر

**epnmasr** · 14-01-2011 11:41 PM

المفروض الناس دي تبعت شكر لنايل موتورز على الدعايه اللي عملوها للعربيه دي
ومع كل إحترامي وتقديري فهي ينقصها أكثر من مستويين لكي تنافس في هذه الفئه
أولاً الأوتوماتيك ثانياً يشوفو حل للسقف ده وكمان ناقصه راكات الشبكه
ثالثاً الدفع الرباعي ولو إكتملت هذه النواقص تكون أفضل سياره في فئتها وهذا رأي المتواضع

**Ahmed.TV** · 15-01-2011 12:25 AM

ولو بقت دفع رباعى , حتكون بكام يا جماعة !! هل حتكون ب155 الف

وبعدين العربية الاتوماتيك منها فى ال1600 منزلش اصلا ومصنعوش منها اصلا

وبره ال1600 سى سى بينزل منها مانيول , هو فى عربيات محبوبة بره مانيول , وفى ناس بتعشق المانيول , واللى مش حتعجبنى اكيد حتعجب غيرى

وانا معاكم ان هنا فى مصر مطلوب الاتوماتيك , بس العربية لسه مفيش فيها اتوماتيك

والسقف البانوراما بردوا اللى مش حيعجبنى حيعجب غيرى

وخالى بالكم , لو العربية اذا نزل منها اتومايتك مثلا وسعرها زاد وبقا ب170 الف مثلا , وفتيس التيدا الاتوماتيك الناس بردوا مش حيعجبها العجب , وحيقولوا ان ماتور 1600 عادى اتوماتيك ب170 الف او 180 , ودفع امامى ,حيستغربوا

ده غير ان الفتيس الاتوماتيك بتاعت التيدا مش حينفع عليها

هما فى المستقبل قالوا انها احتمال ينزلوا عليها فتيس الاتوماتيك بتاع المورانو ويجربوا ايه الوضع

وقصة ان العربية بقالها بتنزل فترة بره ومش بتنزل مصر الا دلوقتى , ما السوق بتعنا وجماركه بيخضع الى مواصفات وشروط معينة , احنا بس هنا بنتكلم وخلاص ومش عارفين ايه اللى بيحصل فى الجمارك ,

هو بس فى نقطة فعلا تتحسب عليهم انه كان مفروض ينزلوا الموديل اللى حيتباع فى شهر 5 , مش ينزلوا عربية 2000 سى سى , وفيها امكانيات زيادة عن اللى حتتباع

وكل الاوبشن اللى فى العربية حتتنفض منها , وقريبا باذن الله حنزل موضوع عن الامكانيات المظبوطة بالشرح عن اوبشن اوبشن وبالصور عن المفصلة عن العربية باذن الله

**Hossam_Zaky** · 15-01-2011 05:33 AM

شكرا احمد باشا لمرورك و انا فعلا في انتظار تقرير سيادتك

و تصديقا علي كلام حضرتك فعلا في اوروبا بيعشقو العربيات المانيوال و معظم مبيعات العربيات في اوروبا مانيوال مش اتوماتيك و حتي في موديلات زي الجيتا بتنزل عندهم اساسا مانيوال و ده عكس اسواق امريكا الشمالية اللي المبيعات فيها اساسا للأتوماتيك و المانيوال فيها نادر جدا و مالهوش سوق في اعادة البيع كمان

و هنا اشير لنقطة الدراسات التسويقية للسوق مش مجرد انزل عربية يكون عندي تنويع زيادة في الموديلات

و موضوع السقف الزجاجي فعلا مسألة اذواق متفق معاك لكن كلامي من منطلق منطق تسعير العربية كمالية زيادة وكمالية ناقصة ممكن تفرق في تسعير العربية و رأيي كان ليه متنزلش كمالية اساسية في شراء شريحة من الناس للسيارة زي الأتوماتيك بدل كمالية أضافية زي السقف الزجاج

علما بأنه بغض النظر عن الناحية العملانية فشكله علي العربية روعة لكن انا انسان عملي بشوف محتاج ايه و ممكن ادلع نفسي بأيه و ايه الزيادة اللي ممكن استغني عنها ( وجهة نظر شخصية بحته )

و فيه ناس فعلا سجلو اعجابهم في المعرض بالعربية المانيوال و هم مبيحبوش الأتوماتيك اساسا

و كلامي هنا مكنش من منطلق ان العربية وحشة و ترجع بلدها , لأ العربية بوضعها الحالي حتبيع برضه بس مش المبيعات اللي كلنا نفسنا فيها عشان تحقق انتشار و قيمة بيعية

و بالنسبة للفتيس بتاع القشقاي الأتوماتيك هو فعلا نسخة من فتيس المورانو اللي هو من نوع الـ cvt و ده مش اسم من عند نيسان دي تقنية عمل الفتيس الأتوماتيك ده متعارف عليها في مسميات السيارات و بتنزل في عربيات ميتسوبيشي و عربيات امريكاني و هو عبارة عن ترس واحد متغير الحجم بدل مجموعة تروس مختلفة الأحجام و ده موجود في النيسان البلوبيرد في مصر و طبعا في المورانو و اختها الأنفينيتي fx بموديلاتها و لما قلت فتيس التيدا كان عشان تقنيته عادية فتكلفته ممكن تقل عن تكلفة تقنية الcvt

في النهاية احب اضيف ان وكالة ميتسوبيشي الجديدة كانت اعلنت ان اول دخول جديد للسوق المصري حيكون باللانسر ex طبعا بالأضافة للعربية الأوتلاندر سبورت 1600 سي سي اتوماتيك ( cvt) كل الكماليات اللي هي العربية asx ( ابحثو علي الجوجل صور بأسم asx ) الجديدة المنافس الرئيسي و القوي للقشقاي في اوروبا

و موضوع عدم نزول العربية لحد اليومين دول مش موضوع جمارك دي سياسات تسويقية و مش معقولة و العربية في عز نجاحها في اوروبا و فيه قوائم انتظار شهور عليها تسقطع جزء من انتاجها تجرب بيه في سوق جديد و كمان موضوع تحديد سعر و كماليات العربية في السوق مع انتظار طبعا لأول السنة دي عشان التخفيض التاني علي جمرك العربيات الأوروبية اللي حيفرق في التسعير ( جمرك الأوروبي 1600 سي سي اصبح 32% بداية من 2011 بدل الأساس 40 % )

و اخلص كلامي تاني بفين فريق التسويق و الدعاية بتاع نيسان

**BassamHafez** · 15-01-2011 12:31 PM

انا شفتها في المعرض بس مش هقدر احكم عليها خالص دلوقتي لان بصراحه اللي انا شفتها دي مش هي اللي هاتنزل مصر خالص

انا منتظر اشوف العربيه الاصليه اللي هاتيجي مصر

**Ahmed.TV** · 15-01-2011 01:28 PM

هو موضوع التسويق لكل سيارات نيسان على مستوى العالم , فقير فى العموم ,وليس هنا فى مصر

الدعايات بتاعتهم على سياراتهم ضعيفة مش قوية , والله اعلم ايه وجهة نظرهم فى النقطة دى ,

بخصوص العربية لما سالتهم على ليه مكنش تنزل العربية بفتيس الاتوماتيك حتى بتاع التيدا , قالوا مينفعش , عشان وزن العربية ومينفعش تنزل بفتيس الاتوماتيك ال1600 بتاع التيدا

وال2000 سى سى فى منها اتوماتيك , وعشان ينزلوها مصر .. قالوا بره مصر فى اوروبا مفيش فرق فى السعر بين ال1600 وال2000 سى سى , لكن هنا فى مصر فى الجمارك , بيكون فى فرق كبير فى السعر والجمارك , فعشان كدا الموضوع صعب شوية

على العموم انا بوعدكم حقابل حد من فريق التسويق اللى كان فى المعرض , واجرى معاه حوار على صفحات المنتدى وقسم نيسان عندنا باذن الله وحيكون فيه كل الاجابات على اسالتكم واستفساراتكم كلها باذن الله قريبااااااااااااا